وزارتِ علومِ ارض (ایم او ای ایس) اور محکمۂ موسمیاتِ ہند (آئی ایم ڈی) نے آج نئی دہلی کے موسَم بھون میں بارہواں عالمی یومِ یوگا منایا۔ ’’صحت مند بڑھاپے کے لیے یوگا‘‘ کے موضوع کے تحت منعقدہ اس تقریب میں افسران اور عملے نے شرکت کی، جس کا مقصد یوگا کی قدیم روایت کے ذریعے ہمہ جہت صحت اور فلاح و بہبود کو فروغ دینا تھا۔

پروگرام کا آغاز وزیرِ اعظم جناب نریندر مودی کے خطاب کی براہِ راست نشریات دیکھنے سے ہوا، جس میں شرکاء نے پوری قوم کے ساتھ شمولیت اختیار کی۔ اس کے بعد ماہر یوگا اساتذہ کی رہنمائی میں مشترکہ یوگا پروٹوکول کا عملی مظاہرہ پیش کیا گیا، جس میں مختلف آسنوں اور پرانایام کی مشقیں شامل تھیں۔

اپنے خطاب میں محکمۂ موسمیاتِ ہند کے ڈائریکٹر جنرل جناب ڈاکٹر مرتیونجے موہاپاترا نے اس بات پر زور دیا کہ یوگا کو محض ایک روایت کے طور پر نہیں بلکہ روزمرہ زندگی کا لازمی حصہ بنانا چاہیے۔

’’جیسا کہ معزز وزیرِ اعظم نے فرمایا، یہ ایک مسلسل کوشش ہے۔ ہمیں یوگا کو اپنانا چاہیے، اسے اپنی زندگی کا حصہ بنانا چاہیے اور اس کے ذریعے خوش و خرم رہنا چاہیے۔ ہم یوگا کو اپنی روزمرہ سرگرمی بنائیں گے، ہر روز اس کی مشق کریں گے اور یوگا کے ذریعے صحت مند رہیں گے۔ کیونکہ صحت مند زندگی ہی خوشحال زندگی ہے۔ صحت مند معاشرہ ہی خوشحال معاشرہ ہوتا ہے، اور ایک صحت مند و خوشحال معاشرہ ہی ایک صحت مند ملک اور ایک بہتر دنیا کی بنیاد فراہم کر سکتا ہے۔‘‘

اس موقع پر سائنسی اور فلسفیانہ نقطۂ نظر پیش کرتے ہوئے وزارتِ علومِ ارض کے جوائنٹ سیکریٹری جناب سرینواس راؤ گنگی ریڈی نے انسان اور کائنات کے درمیان گہرے تعلق پر روشنی ڈالی اور یوگا کو خود شناسی، شعوری بیداری اور باطنی ادراک کا راستہ قرار دیا۔ انہوں نے کہا:

’’آج کی دنیا میں ہم ایک ایسی کشتی کی مانند ہیں جو بے شمار معلومات اور لاتعداد توجہ بٹانے والے عوامل کے سمندر میں بغیر پتوار کے سفر کر رہی ہو۔ ہمیں ایک بیدار شعور کی ضرورت ہے۔ ہمیں ذہنی یکسوئی اور باخبر آگہی درکار ہے۔ اپنی سوچ میں وضاحت پیدا کرکے ہی ہم انسانی روح کی حقیقی صلاحیتوں کو دریافت کر سکتے ہیں۔ روزمرہ زندگی میں اپنی کارکردگی بہتر بنانے، جذباتی بصیرت حاصل کرنے اور مضبوط باہمی تعلقات استوار کرنے کے لیے واضح اور متوازن سوچ ناگزیر ہے، تاکہ ہماری زندگی کا سفر ہموار اور پُرسکون رہے۔‘‘

جناب ریڈی نے مزید وضاحت کرتے ہوئے یوگا کے چار روایتی راستوں—بھکتی یوگ، گیان یوگ، کرم یوگ اور راج یوگ—کا ذکر کیا اور شرکاء کو ترغیب دی کہ وہ شعوری عمل، نظم و ضبط اور باقاعدہ مشق کے ذریعے اپنی زندگی میں توازن پیدا کریں۔

تقریب کے اختتام پر اعزازی تقریب منعقد کی گئی، جس میں وزارتِ علومِ ارض اور محکمۂ موسمیاتِ ہند کے عہدیداروں نے یوگا اساتذہ کو تنظیم کے اندر صحت اور فلاح و بہبود کے فروغ میں ان کی گراں قدر خدمات کے اعتراف میں اعزازات پیش کیے۔

یہ تقریب اس عزم کی تجدید کا مظہر تھی کہ وزارتِ علومِ ارض اور محکمۂ موسمیاتِ ہند یوگا کی لازوال حکمت سے رہنمائی حاصل کرتے ہوئے ایک زیادہ صحت مند، باصلاحیت، یکسو اور پیداواری کام کے ماحول کے فروغ کے لیے اپنی کوششیں جاری رکھیں گے۔

******

ش ح۔ ش ا ر۔ ول

Uno-8959

(रिलीज़ आईडी: 2275994) आगंतुक पटल : 9