ہندوستان کے قومی  کمیشن برائے انسانی حقوق ( این ایچ آر سی)،  نے ایک میڈیا رپورٹ کا ازخود نوٹس لیا ہے جس میں کہا گیا ہے کہ اتر پردیش کے ضلع شاہجہاںپور سے تعلق رکھنے والے 16 سالہ لڑکے کو گرفتار کر کے تقریباً دو ماہ تک گوتم بدھ نگر کے کاسنا جیل میں غیر قانونی طور پر ایک بالغ قیدی کے طور پر رکھا گیا۔ بعد ازاں ہڈیوں کے معائنے سے اس کے نابالغ ہونے کی تصدیق کے بعد اسے ضلع کے جووینائل ہوم منتقل کرنے میں مزید چھ دن لگے۔ تاہم عدالت سے ضمانت ملنے کے باوجود وہ اب بھی جووینائل ہوم میں موجود ہے کیونکہ اس کا غریب خاندان ضمانتی مچلکہ  فراہم کرنے سے قاصر ہے۔ رپورٹ کے مطابق اسے ضلع میں اجرت میں اضافے اور بہتر کام کے حالات کے مطالبے کے لیے مزدوروں کے احتجاج کے بعد گرفتار کیا گیا تھا۔

کمیشن نے کہا ہے کہ اگر یہ الزامات درست ثابت ہوتے ہیں تو یہ متاثرہ بچے کے انسانی حقوق کی سنگین خلاف ورزی ہے۔ اسی لیے اس نے اتر پردیش کے جیل  انتظامیہ و اصلاحی خدمات  کے ڈائریکٹر جنرل اور پولیس کے ڈائریکٹر جنرل کو نوٹس جاری کرتے ہوئے دو ہفتوں کے اندر تفصیلی رپورٹ طلب کی ہے۔ اسی کے ساتھ ہی کمیشن نے اپنے ڈائریکٹر جنرل (تحقیقات) کو بھی ہدایت دی ہے کہ ایک ٹیم تعینات کر کے موقع پر معائنہ کرے اور ایک ہفتے کے اندر رپورٹ پیش کرے۔

گزشتہ 16 جون 2026 کو شائع ہوئی میڈیا رپورٹ کے مطابق  لڑکے کو 14 اپریل 2026 کو اس وقت فون کال موصول ہوئی جس میں اس کے نام پر پارسل کا ذکر تھا۔ جب وہ وہاں پہنچا تو موجود پولیس اہلکاروں نے اسے گرفتار کر لیا۔ اس کے خلاف بھارتیہ نیائے سنہیتا کی کئی سنگین دفعات کے تحت ایف آئی آر درج کی گئی۔ الزام ہے کہ پولیس نے اس پر تشدد کیا اور زبردستی کچھ دستاویزات پر دستخط کرائے۔

****

ش ح ۔   م  ش ۔ش ب ن

U. No. 8894