રાષ્ટ્રીય માનવાધિકાર આયોગ, ભારતે મીડિયા અહેવાલ પર સુઓ મોટો (સ્વયં સંજ્ઞાન) લીધું છે કે ઉત્તર પ્રદેશના શાહજહાંપુર જિલ્લાના એક 16 વર્ષના છોકરાની ધરપકડ કરવામાં આવી હતી અને ગૌતમ બુદ્ધ નગર જિલ્લાની કાસના જેલમાં બે મહિના સુધી પુખ્ત વયના કેદી તરીકે ગેરકાયદેસર રીતે રાખવામાં આવ્યો હતો. ઓસિફિકેશન ટેસ્ટ (અસ્થિ પરીક્ષણ) માં તે સગીર હોવાની પુષ્ટિ થયા પછી તેને જિલ્લાના ચિલ્ડ્રન હોમ (બાલ ગૃહ) માં ખસેડવામાં બીજા છ દિવસ લાગ્યા હતા. પરંતુ કોર્ટ દ્વારા જામીન મંજૂર કરવામાં આવ્યા હોવા છતાં તે હજુ પણ ચિલ્ડ્રન હોમમાં જ રહેવા મજબૂર છે, કારણ કે તેનો ગરીબ પરિવાર જામીન બોન્ડની વ્યવસ્થા કરી શક્યો નથી. અહેવાલ મુજબ, જિલ્લામાં શ્રમિકો દ્વારા વેતન વધારા અને કામકાજની સ્થિતિમાં સુધારાની માંગ સાથે કરવામાં આવેલા વિરોધ પ્રદર્શન બાદ તેની ધરપકડ કરવામાં આવી હતી.

આયોગે અવલોકન કર્યું છે કે સમાચાર અહેવાલની વિગતો જો સાચી હોય, તો તે ભોગ બનનારના માનવાધિકાર ઉલ્લંઘનનો ગંભીર મુદ્દો ઊભો કરે છે. તેથી, તેણે ઉત્તર પ્રદેશના જેલ વહીવટીતંત્ર અને સુધારા સેવાઓના મહાનિર્દેશક તથા પોલીસ મહાનિર્દેશકને નોટિસ પાઠવીને બે અઠવાડિયામાં આ બાબતે વિગતવાર અહેવાલ માંગ્યો છે. સાથે આયોગના મહાનિર્દેશક (તપાસ)ને પણ એક અઠવાડિયાની અંદર સ્થળ પર તપાસ કરવા અને અહેવાલ સુપરત કરવા માટે અધિકારીઓની એક ટીમ નિયુક્ત કરવાનો નિર્દેશ આપ્યો છે.

16 જૂન 2026 ના રોજ પ્રકાશિત થયેલા મીડિયા અહેવાલ અનુસાર, છોકરા પર 14 એપ્રિલ 2026 ના રોજ તેના નામના પાર્સલ અંગે એક ફોન કોલ આવ્યો હતો. જો કે, તે સ્થળ પર પહોંચતા જ ત્યાં હાજર પોલીસે તેની ધરપકડ કરી લીધી હતી. તેની સામે ભારતીય ન્યાય સંહિતાની કેટલીક ગંભીર કલમો હેઠળ એફઆઈઆર (FIR) નોંધવામાં આવી હતી. પોલીસે કથિત રીતે તેની સાથે મારપીટ કરી હતી અને કેટલાક દસ્તાવેજો પર સહી કરવા માટે દબાણ કર્યું હતું.

SM/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com