سائنس اور ٹیکنالوجی اور ارضیاتی علوم کے مرکزی وزیر مملکت (آزادانہ چارج) اور وزیر اعظم کے دفتر ، عملہ ، عوامی شکایات اور پنشن ، جوہری توانائی اور خلا کے وزیر مملکت ڈاکٹر جتیندر سنگھ نے آج ریاستی حکومتوں پر زور دیا کہ وہ مرکزی حکومت کے بہترین طرزِ حکمرانی کے پلیٹ فارموں ، انتظامی اصلاحات اور شہری مرکوز خدمات کی فراہمی کے ماڈل کو فعال طور پر اپنائیں۔ انہوں نے کہا کہ ان اقدامات نے عوامی انتظامیہ کو تبدیل کیا ہے، شہری اعتماد کو مضبوط بنایا ہے اور اب انہیں بین الاقوامی سطح پر کامیاب حکمرانی کے ماڈل کے طور پر بھی مطالعہ کیا جا رہا ہے۔

وزیر نے کہا کہ مشن کرم یوگی، سی پی جی آر اے ایم ایس، ڈیجیٹل لائف سرٹیفکیٹ اور دیگر ٹیکنالوجی پر مبنی حکمرانی کے نظاموں نے یہ ثابت کیا ہے کہ اصلاحات شہریوں کی زندگی بہتر بنانے کے ساتھ ساتھ شفافیت، جوابدہی اور کارکردگی میں بھی اضافہ کر سکتی ہیں۔ انہوں نے زور دیا کہ ان نظاموں کو ملک بھر میں زیادہ وسیع پیمانے پر اپنایا جانا چاہیے تاکہ وکست بھارت 2047 کے سفر کو تیز کیا جا سکے۔

عملے ، عوامی شکایات اور پنشن کی وزارت کی 12 سالہ کامیابیوں کے موضوع پر ایک پریس کانفرنس سے خطاب کرتے ہوئے ڈاکٹر جتیندر سنگھ نے کہا کہ وزیر اعظم نریندر مودی کی قیادت میں حکمرانی میں اصلاحات محض انتظامی مشقیں نہیں رہیں بلکہ یہ سماجی اور اقتصادی تبدیلی کے ایک مؤثر ذریعہ کے طور پر ابھری ہیں۔اس تقریب میں محکمہ عملہ و تربیت (ڈی او پی ٹی) کی سیکریٹری محترمہ رچنا شاہ، محکمہ انتظامی اصلاحات و عوامی شکایات (ڈی اے آر پی جی ) اور محکمہ پنشن و پنشنرز ویلفیئر (ڈی او پی پی ڈبلیو) کی سیکریٹری محترمہ نِوِدیتا شکلا ورما، پریس انفارمیشن بیورو کی ڈائریکٹر جنرل محترمہ نانو بھاسن اور حکومتِ ہند کے سینئر افسران نے شرکت کی۔

وزیر اعظم نریندر مودی کے اس وژن کو یاد کرتے ہوئے کہ “اچھی حکمرانی کسی بھی قوم کی ترقی کی کلید ہے”، ڈاکٹر جتیندر سنگھ نے کہا کہ گزشتہ بارہ برسوں کے دوران عملہ، انتظامی اصلاحات اور پنشن یافتگان کی فلاح و بہبود سے متعلق اداروں کے کام اور شناخت میں ایک گہری تبدیلی دیکھنے میں آئی ہے۔ انہوں نے کہا کہ جو محکمے پہلے پس منظر میں کام کرتے تھے، وہ آج اصلاحات، جدت اور شہری مرکوز حکمرانی کے اہم محرک بن چکے ہیں۔انہوں نے مزید کہا کہ محکمہ عملہ و تربیت  پورے سرکاری نظام میں اصلاحات کا محرک بن کر ابھرا ہے، محکمہ انتظامی اصلاحات و عوامی شکایات خدمات کی فراہمی اور جوابدہی کو بہتر بنانے میں مرکزی حیثیت اختیار کر چکا ہے، جبکہ محکمہ پنشن و پنشنرز ویلفیئر (ڈی او پی پی ڈبلیو) نے پنشن کے عمل سے آگے بڑھ کر ریٹائرڈ افراد کے وقار، فلاح و بہبود اور معیارِ زندگی کو یقینی بنانے پر اپنی توجہ مرکوز کی ہے۔

ڈاکٹر جتیندر سنگھ نے کہا کہ تبدیلی کی رہنمائی تین بنیادی اصولوں-اختراع ، تخیل اور شمولیت سے ہوئی ہے ۔  انہوں نے کہا کہ یہ اصلاحات ٹیکنالوجی ، انتظامی حساسیت اور بدلتے ہوئے ہندوستان کی امنگوں کی سمجھ سے کارفرما ہیں ۔  اس کے نتیجے میں ، ہندوستانی حکمرانی کے متعدد اقدامات اب عالمی توجہ مبذول کروا رہے ہیں ، جن میں جنوبی افریقہ ، منگولیا اور مالدیپ سمیت ممالک کے وفود عوامی انتظامیہ ، ڈیجیٹل گورننس ، شکایات کے ازالے اور سول سروس اصلاحات میں ہندوستان کے تجربات کا مطالعہ کر رہے ہیں ۔

ڈاکٹر جتیندر سنگھ نے ان اہم اصلاحات کو اجاگر کرتے ہوئے کہا کہ جو تبدیلی شہریوں اور ریاست کے درمیان تعلق کو بدلنے کا باعث بنی، اس کی ایک نمایاں مثال حکومت کا 2014 میں اقتدار سنبھالنے کے فوراً بعد دستاویزات کی خود تصدیق کا نظام متعارف کرانا ہے۔ انہوں نے اسے نوآبادیاتی دور کی روایات سے ایک علامتی اور عملی انحراف قرار دیا، جس نے بیوروکریسی کی رکاوٹوں کی جگہ شہریوں پر اعتماد کو فروغ دیا۔انہوں نے کہا کہ یہ اصلاح ایک مضبوط پیغام دیتی ہے کہ جدید جمہوریت میں حکمرانی کی بنیاد شک و شبہ پر نہیں بلکہ اعتماد پر ہونی چاہیے۔

وزیر نے کہا کہ ایک اور انقلابی فیصلہ گروپ بی (نان-گیزیٹیڈ) اور گروپ سی آسامیوں کے لیے انٹرویوز کا خاتمہ تھا، جس سے شخصی صوابدید کم ہوئی اور میرٹ پر مبنی بھرتی کے نظام کو تقویت ملی۔ انہوں نے کہا کہ اس اصلاح کے ساتھ ٹیکنالوجی پر مبنی امتحانی نظام، آدھار سے منسلک تصدیق، کمپیوٹر بیسڈ ٹیسٹنگ اور عوامی امتحانات (غلط طریقوں کی روک تھام) ایکٹ 2024 جیسے قانونی تحفظات نے بھرتی کے عمل کو زیادہ تیز، شفاف اور قابلِ اعتماد بنایا ہے۔انہوں نے مزید کہا کہ حکومت کے منصفانہ بھرتی کے عزم کی ایک جھلک نیشنل روزگار میلہ کی کامیابی میں بھی نظر آتی ہے، جس کے ذریعے اکتوبر 2022 سے اب تک 19 تقاریب میں 12 لاکھ سے زائد تقرر نامے تقسیم کیے جا چکے ہیں۔

ڈاکٹر جتیندر سنگھ نے کہا کہ سماجی انصاف عملہ جاتی پالیسیوں کا بنیادی ستون رہا ہے۔ انہوں نے اقتصادی طور پر کمزور طبقات کے لیے ریزرویشن کے نفاذ، معذور افراد کے لیے بہتر مواقع، بیک لاگ آسامیوں کو پر کرنے کے لیے خصوصی مہمات اور پسماندہ طبقات کی سرکاری ملازمتوں میں نمائندگی بہتر بنانے کی مسلسل کوششوں کو اجاگر کیا۔انہوں نے کہا کہ ان اقدامات نے اس بات کو یقینی بنایا ہے کہ حکمرانی میں اصلاحات کے ساتھ ساتھ سماجی مساوات اور شمولیت کو بھی فروغ حاصل ہو۔

وزیر نے مشن کرم یوگی کو دنیا میں کسی بھی جگہ کیے گئے سب سے زیادہ پرعزم سول سروس اصلاحات میں سے ایک قرار دیتے ہوئے کہا کہ اس نے استعداد کار بڑھانے کے فلسفے کو بنیادی طور پر بدل دیا ہے، جہاں قواعد پر مبنی انتظامیہ سے ہٹ کر کردار پر مبنی اور مہارت پر مبنی حکمرانی کی طرف پیش رفت کی گئی ہے۔انہوں نے کہا کہ آئی جی او ٹی کرم یوگی پلیٹ فارم، جس پر 1.65 کروڑ سے زائد رجسٹرڈ صارفین موجود ہیں اور تقریباً 13 کروڑ کورسز مکمل کیے جا چکے ہیں، نے سرکاری ملازمین کے لیے مسلسل سیکھنے کا ایک مؤثر نظام قائم کیا ہے۔انہوں نے مزید کہا کہ مصنوعی ذہانت کے انضمام، جیسے اے آئی سارتھی،اے آئی ٹیوٹر اور دیگر اے آئی  پر مبنی تعلیمی ٹولز کے ذریعے ایک مستقبل کے تقاضوں سے ہم آہنگ سول سروس تیار کی جا رہی ہے، جو ابھرتے ہوئے چیلنجوں سے نمٹنے کی صلاحیت رکھتی ہے۔

ڈاکٹر جتیندر سنگھ نے کہا کہ حکمرانی میں اصلاحات کے سب سے نمایاں نتائج شہری شکایات کے ازالے اور عوامی خدمات کی فراہمی میں دیکھے گئے ہیں۔ انہوں نے کہا کہ حکومت کے پاس درج ہونے والی سالانہ شکایات تقریباً دو لاکھ سے بڑھ کر قریب پچیس لاکھ تک پہنچ گئی ہیں، جو ادارہ جاتی جوابدہی پر عوام کے بڑھتے ہوئے اعتماد کی عکاسی کرتی ہے۔اسی کے ساتھ انہوں نے کہا کہ شکایات کے ازالے کے دورانیے میں نمایاں کمی آئی ہے، جہاں اوسط وقت 157 دن سے کم ہو کر صرف 13 دن رہ گیا ہے، جو ٹیکنالوجی، جوابدہی اور مسلسل نگرانی کے مؤثر استعمال کو ظاہر کرتا ہے۔انہوں نے سی پی جی آر اے ایم ایس کو دنیا کے سب سے بڑے اور مؤثر شہری شکایات کے ازالے کے پلیٹ فارمز میں سے ایک قرار دیا۔

وزیر نے کہا کہ گزشتہ بارہ برسوں میں ٹیکنالوجی حکمرانی میں اصلاحات کی سب سے اہم معاون قوت کے طور پر ابھری ہے۔ آن لائن آر ٹی آئی نظام، ای-ایچ آر ایم ایس، ای-آفس، ڈیجیٹل پرفارمنس ایپریزل سسٹم، اے آئی پر مبنی شہری رابطہ نظام اور کاغذ سے پاک انتظامی عمل نے کارکردگی، شفافیت اور رسائی میں نمایاں بہتری پیدا کی ہے۔انہوں نے کہا کہ بھارت اب صرف عالمی بہترین طریقہ کار کو اختیار نہیں کر رہا بلکہ ایسے حکمرانی کے حل بھی تیار کر رہا ہے جنہیں دیگر ممالک میں بھی اپنایا جا رہا ہے۔

انسداد بدعنوانی اور شفافیت کے اقدامات کا حوالہ دیتے ہوئے ڈاکٹر جتیندر سنگھ نے کہا کہ حکومت نے لوک پال کو عملی جامہ پہنانے ، بدعنوانی کی روک تھام کے قانون میں ترامیم اور ٹیکنالوجی سے چلنے والے نگرانی کے طریقہ کار کے ذریعے ادارہ جاتی ڈھانچے کو مضبوط کیا ہے ۔  انہوں نے کہا کہ اصلاحات نے جوابدگی کو یقینی بنانے کے ساتھ ساتھ ایک ایسا ماحول پیدا کرنے کی کوشش کی ہے جس میں ایماندار اور نیک نیت سے فیصلہ سازی کی حوصلہ افزائی اور تحفظ کیا جائے ۔

وزیر نے ملازمین مرکوز اصلاحات کے ایک سلسلے کو بھی اجاگر کیا جنہوں نے حکمرانی میں زیادہ ہمدردی اور انسانی پہلو کو شامل کیا ہے۔ ان میں زچگی اور بچوں کی دیکھ بھال سے متعلق توسیع شدہ سہولیات، سروگیسی سے متعلق چھٹی کے فوائد، اعضا کے عطیے کے لیے خصوصی رخصت اور معذور بچوں کی تعلیمی معاونت میں اضافہ شامل ہے۔انہوں نے خاص طور پر اس بات کا ذکر کیا کہ مردہ بچے کی پیدائش کی صورت میں خصوصی زچگی چھٹی کا آغاز اور طلاق یافتہ و علیحدہ رہنے والی بیٹیوں کے لیے فیملی پنشن کے حقوق میں توسیع جیسے اقدامات ایک ایسے طرزِ حکمرانی کی عکاسی کرتے ہیں جو انسانی حقیقتوں کو تسلیم کرتا ہے اور دیرینہ عدم مساوات کو دور کرنے کی کوشش کرتا ہے۔

پنشن اصلاحات کے حوالے سے ڈاکٹر جتیندر سنگھ نے کہا کہ حکومت نے اس بات کو یقینی بنانے کے لیے کام کیا ہے کہ ریٹائرمنٹ وقار، سہولت اور تحفظ کے ساتھ ہو۔ انہوں نے ڈیجیٹل لائف سرٹیفکیٹ اقدام کی کامیابی کو اجاگر کیا، جس میں چہرہ شناختی ٹیکنالوجی کے استعمال نے بزرگ پنشن یافتگان کے لیے دفاتر میں ذاتی طور پر جانے کی ضرورت کو بڑی حد تک ختم کر دیا ہے۔انہوں نے پنشن عدالتوں، پنشن شکایات کے ازالے کے نظام اور انُوبھَو پلیٹ فارم کا بھی ذکر کیا، جو ریٹائر ہونے والے ملازمین کے علم اور تجربے کو محفوظ کر کے اسے آئندہ نسلوں کے لیے ایک ادارہ جاتی اثاثہ بناتا ہے۔

ڈاکٹر جتیندر سنگھ نے کہا کہ بھارت شفافیت اور انسدادِ بدعنوانی سے متعلق عالمی کوششوں میں ایک نمایاں آواز کے طور پر ابھرا ہے۔ انہوں نے بھارت کی جی20 صدارت کے دوران کیے گئے اقدامات، برکس کے تحت شمولیت اور بھارت پول پلیٹ فارم اور “ابھے اے آئی  چیٹ بوٹ” جیسی اختراعات کا حوالہ دیا، جو بین الاقوامی تعاون کو مضبوط بنا رہے ہیں، جرائم کی نئی اقسام کے خلاف مؤثر اقدامات میں مدد دے رہے ہیں اور ڈیجیٹل دور میں شہریوں کو بااختیار بنا رہے ہیں۔

محکمہ عملہ و تربیت ڈی او پی ٹی  کی کامیابیوں کو پیش کرتے ہوئے سیکریٹری رچنا شاہ نے بھرتی اصلاحات، عملہ جاتی انتظام اور استعداد کار میں اضافے کے شعبوں میں نمایاں پیش رفت کو اجاگر کیا۔ انہوں نے آئی جی او ٹی  کرم یوگی ایکوسسٹم کی توسیع، یو پی ایس سی اور ایس ایس سی کی جانب سے کی گئی اصلاحات، تربیت اور انسانی وسائل کے انتظام کے لیے اے آئی پر مبنی ٹولز کے تعارف، کیڈرکے جائزے، بھرتی قواعد میں اصلاحات اور ایک زیادہ فعال، ہنر مند اور کارکردگی پر مبنی سول سروس کے قیام کے لیے کیے گئے اقدامات کی تفصیل بیان کی۔

انتظامی اصلاحات اور عوامی شکایات کے محکمے اور پنشن اور پنشن یافتگان کی بہبود کے محکمے کی کامیابیوں پر روشنی ڈالتے ہوئے نویدیتا شکلا ورما نے کہا کہ حکومت نے گزشتہ دہائی کے دوران ڈیجیٹل گورننس سسٹم اور شہریوں پر مرکوز خدمات کی فراہمی کے طریقہ کار کو نمایاں طور پر وسعت دی ہے ۔  انہوں نے ای-آفس کی ملک گیر توسیع ، سوچھتا کے لیے خصوصی مہمات کی کامیابی اور زیر التواء کو کم کرنے ، اے آئی سے چلنے والے شکایات کے ازالے کے ٹولز جیسے سمادھن دیدی کے تعارف ، بھاوشیہ پورٹل کی بڑھتی ہوئی رسائی ، اور کثیر لسانی تعاون کے ساتھ ایک مربوط اے آئی سے چلنے والے سنگل ونڈو پنشن پلیٹ فارم کے منصوبوں پر روشنی ڈالی جس کا مقصد صفر تاخیر پنشن نظام حاصل کرنا ہے ۔

اختتامی گفتگو میں ڈاکٹر جتیندر سنگھ نے کہا کہ گزشتہ بارہ برسوں کی کامیابیاں یہ ظاہر کرتی ہیں کہ جب حکمرانی میں اصلاحات کو اعتماد، ٹیکنالوجی اور شہری اولیت کے نقطۂ نظر سے آگے بڑھایا جائے تو یہ قومی تبدیلی کا ایک طاقتور ذریعہ بن سکتی ہیں۔انہوں نے کہا کہ طریقہ کار پر مبنی انتظامیہ سے جوابدہ اور مؤثر حکمرانی کی طرف سفر نے عوامی اعتماد کو مضبوط کیا ہے، خدمات کی فراہمی کو بہتر بنایا ہے اور 2047 تک ایک ترقی یافتہ بھارت کی تعمیر کے لیے ایک مضبوط بنیاد فراہم کی ہے۔

 

********

) ش ح ۔ ش آ۔ن ع)

U.No. 8767

(रिलीज़ आईडी: 2274213) आगंतुक पटल : 9