سائنسی و صنعتی تحقیق کی کونسل (سی ایس آئی آر) نے آج نئی دہلی میں اپنے ہیڈکوارٹر میں ٹیکنالوجی ٹرانسفر اور بھارتیہ نردیشک دستاویز (بی این ڈی) اجرا تقریب کا انعقاد کیا، جس میں سائنس دانوں، صنعتی شراکت داروں، ٹیکنالوجی اپنانے والی صنعتوں اور دیگر اہم فریقوں نے شرکت کی۔

سی ایس آئی آر-نیشنل فزیکل لیبارٹری (سی ایس آئی آر-این پی ایل) اور سی ایس آئی آر-سنٹرل روڈ ریسرچ انسٹی ٹیوٹ (سی ایس آئی آر-سی آر آر آئی) کے اشتراک سے منعقدہ اس پروگرام میں سات ٹیکنالوجیز صنعتوں کو منتقل کی گئیں، دس بھارتیہ نردیشک درویات جاری کیے گئے اور کوانٹم سینسنگ ایپلی کیشنز کے لیے تیار کردہ اہم اجزا دفاعی تحقیق و ترقی کی تنظیم (ڈی آر ڈی او) کے حوالے کیے گئے۔

تقریب سے خطاب کرتے ہوئے سی ایس آئی آر-این پی ایل کے ڈائریکٹر پروفیسر وینو گوپال اچنتا نے سائنسی ترقی، صنعتی فروغ اور قومی معیار کے بنیادی ڈھانچے میں پیمائشی سائنس (میٹرولوجی) کے کلیدی کردار پر روشنی ڈالی۔ انہوں نے کہا کہ درست اور قابلِ اعتماد پیمائشیں جدید صنعت، تجارت، صحت، ماحولیاتی نگرانی اور ابھرتی ہوئی ٹیکنالوجیز کی بنیاد ہیں۔

انہوں نے اطمینان کا اظہار کرتے ہوئے بتایا کہ سی ایس آئی آر-این پی ایل اور اس کے شراکت دار اداروں کی جانب سے تیار کیے جانے والے بھارتیہ نردیشک درویات کے ذخیرے میں مسلسل اضافہ ہو رہا ہے، جو ملک کے معیار کے نظام کو مضبوط بنانے اور درآمدی حوالہ جاتی معیارات پر انحصار کم کرنے میں معاون ثابت ہو رہے ہیں۔

پروگرام کی ایک اہم جھلک دس بھارتیہ نردیشک درویات کا اجرا تھا، جن میں آٹھ فائٹو کیمیکلز، ایک قیمتی دھات اور ایک پروپین گیس شامل ہیں۔ یہ معیاری حوالہ جاتی مواد اور پیمائشی معیارات لیبارٹریوں، صنعتوں اور ریگولیٹری اداروں کو درستگی، قابلِ سراغیت اور معیار کی یقین دہانی بہتر بنانے میں مدد فراہم کریں گے، جس سے مختلف شعبوں میں معیار اور اعتماد کو مزید فروغ ملے گا۔

 

اس تقریب نے بھارت کے کوانٹم ٹیکنالوجی سفر میں ایک اور اہم سنگِ میل عبور کیا، جب سی ایس آئی آر-این پی ایل کی جانب سے تیار کردہ پانچ ویپر سیلز   کو کوانٹم سینسنگ ایپلی کیشنز کے لیے ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) کی سالڈ اسٹیٹ فزکس لیبارٹری (ایس ایس پی ایل) کے حوالے کیا گیا۔

یہ منتقلی اس بات کی عکاسی کرتی ہے کہ بھارتی تحقیقی ادارے اگلی نسل کی اسٹریٹجک اور جدید ٹیکنالوجیز کے لیے درکار اعلیٰ درجے کے اجزا تیار کرنے کی صلاحیت میں مسلسل پیش رفت کر رہے ہیں، اور ملک کو کوانٹم ٹیکنالوجی کے شعبے میں خود کفالت کی جانب لے جا رہے ہیں۔

 

 

سی ایس آئی آر-سینٹرل انسٹی ٹیوٹ آف میڈیسنل اینڈ ایروماٹک پلانٹس (سی ایس آئی آر-سی آئی میپ) کے ڈائریکٹر ڈاکٹر پی۔ کے۔ ترویدی نے اپنے خطاب میں بھارت کی بایو اکانومی اور فائٹو کیمیکل شعبے کی ترقی کے لیے معیاری پیمانوں اور حوالہ جاتی مواد کی اہمیت پر زور دیا۔ انہوں نے کہا کہ سائنسی معیار بندی پودوں پر مبنی مصنوعات اور قدرتی اجزا کے معیار، اعتبار اور عالمی سطح پر قبولیت کو مضبوط بنانے میں کلیدی کردار ادا کرتی ہے۔

سی ایس آئی آر-سنٹرل روڈ ریسرچ انسٹی ٹیوٹ (سی ایس آئی آر-سی آر آر آئی) کے ڈائریکٹر ڈاکٹر چ۔ روی شیکھر نے ادارے میں ٹیکنالوجی کی تجارتی منتقلی کی بڑھتی ہوئی رفتار کو اجاگر کرتے ہوئے کہا کہ گزشتہ چند برسوں میں ٹیکنالوجی ٹرانسفر کی تعداد مسلسل بڑھی ہے، جو ایک جانب سی ایس آئی آر کی تیار کردہ ٹیکنالوجیز پر صنعت کے اعتماد اور دوسری جانب بنیادی ڈھانچے، نقل و حمل، سڑکوں کی حفاظت اور ماحولیاتی پائیداری کے لیے عملی حل تیار کرنے کے ادارے کے عزم کی عکاسی کرتی ہے۔

سی ایس آئی آر کی ڈائریکٹر جنرل اور محکمہ برائے سائنسی و صنعتی تحقیق (ڈی ایس آئی آر) کی سیکریٹری ڈاکٹر این۔ کلائی سیلوی نے کہا کہ سی ایس آئی آر ہیڈکوارٹر میں منعقد ہونے والی ماہانہ ٹیکنالوجی ٹرانسفر تقریبات، سی ایس آئی آر نیٹ ورک کی اختراعات کو صنعتوں تک پہنچانے اور ان کے عملی استعمال کو فروغ دینے کا مؤثر پلیٹ فارم بن چکی ہیں۔ انہوں نے کہا کہ ٹیکنالوجی کی منتقلی محض ایک تجارتی عمل نہیں بلکہ سائنسی تحقیق کے ثمرات کو صنعتی شراکت داری کے ذریعے معاشرے تک پہنچانے کا عمل ہے۔

انہوں نے "آتم نربھر بھارت" کے وژن کے مطابق صنعتوں کے ساتھ مضبوط اشتراک، تحقیق کے نتائج کی تجارتی کاری اور مقامی ٹیکنالوجیز کی ترقی کے ذریعے اختراع پر مبنی ترقی کو تیز کرنے کے لیے سی ایس آئی آر کے عزم کا اعادہ بھی کیا۔

صنعتوں کو منتقل کی گئی ٹیکنالوجیز

سی ایس آئی آر-این پی ایل

• رائیڈبرگ سسٹمز پر مبنی براڈ بینڈ ای فیلڈ سینسنگ ٹیکنالوجی، حیدرآباد کی نوسترادامس ٹیکنالوجیز پرائیویٹ لمیٹڈ کو منتقل کی گئی۔
• ہائی والیوم پی ایم 2.5 امپیکٹر سیمپلر ٹیکنالوجی، علی گڑھ کی انجینئرنگ اینڈ انوائرنمنٹل سلوشنز پرائیویٹ لمیٹڈ کو منتقل کی گئی۔
• فارماسیوٹیکل بلسٹرز اور متعلقہ پیکیجنگ فضلے کی ماحول دوست اور قابلِ توسیع ری سائیکلنگ ٹیکنالوجی، نئی دہلی کی جی ایم انڈسٹریز کو دی گئی۔

سی ایس آئی آر-سی آر آر آئی

• وِن ایس ڈی-وی اے آئی یو: پلوں کے معائنے کے لیے ڈرون پر مبنی نان ڈسٹرکٹیو ٹیسٹنگ نظام، چنئی کی ڈرونکس ٹیکنالوجیز پرائیویٹ لمیٹڈ (ایرو 360) کو منتقل کیا گیا۔
• پیو سیل: فضائی آلودگی کم کرنے والی نینو فوٹوکیٹالیٹک سڑک سیلنگ ایمولشن، مظفر نگر کی اشیتا رینیوایبلز کو دی گئی۔
• پیچ فل: سڑکوں کے گڑھوں کی مرمت کرنے والی مشین، پیٹروکیم اسپیشلٹیز مظفر نگر کو منتقل کی گئی۔
• کلیری وائزر: گاڑیوں کی روشنی سے پیدا ہونے والی چکاچوند کم کرنے والا آلہ، گڑگاؤں کی انٹیلیجنٹ ڈائیگنوسس ایل ایل پی کو دیا گیا۔

جاری کیے گئے بھارتیہ نردیشک درویات

• فائٹو کیمیکلز کے لیے   بی این ڈی   
• قیمتی دھاتوں کے لیے بی این ڈی   
• پروپین گیس کے لیے بی این ڈی 

************

ش ح ۔   م  د ۔  م  ص

(U :8720  )

(रिलीज़ आईडी: 2273775) आगंतुक पटल : 8