محکمہ اراضی وسائل (ڈی او ایل آر) کے سکریٹری، جناب نریندر بھوشن نے 15 جون 2026 کو نئی دہلی میں بھارت کے لیے کنٹری ڈائریکٹر جناب پال پروسی کی قیادت میں عالمی بینک کے ایک وفد کے ساتھ گفت و شنید کی۔ محکمے کے اعلیٰ اہلکاران اور عالمی بینک کے ماہرین نے ان مباحثوں میں شرکت کی۔

وفد کا خیرمقدم کرتے ہوئے، جناب نریندر بھوشن نے زور دیا کہ اراضی بھارتی گھرانوں کو دستیاب سب سے اہم پیداواری اثاثوں میں سے ایک ہے اور یہ زرعی پیداوار، دیہی خوشحالی، شہری ترقی، مالی شمولیت اور اقتصادی ترقی میں ایک اہم کردار ادا کرتی ہے۔

سکریٹری نے زور دے کر کہا کہ اگرچہ اراضی زیادہ تر بھارتی خاندانوں کے لیے سب سے بڑا اثاثہ ہے، لیکن اس کی اقتصادی صلاحیت کا پوری طرح استعمال نہیں کیا گیا ہے۔ انھوں نے جدید، شفاف اور ٹیکنالوجی پر مبنی اراضی کی حکمرانی کے نظام کی ضرورت کو اجاگر کیا جو املاک کے محفوظ حقوق کو سہولت فراہم کر سکے، ادارہ جاتی قرضوں تک رسائی کو بہتر بنائے، سرمایہ کاری میں معاونت کرے اور شہریوں کے لیے زندگی گزارنے میں آسانی کو بڑھا سکے۔

جناب بھوشن نے اراضی کے انتظام اور خدمات کی فراہمی کو بہتر بنانے کے لیے جیو اسپیشل سسٹمز، اے آئی، ڈیجیٹل پلیٹ فارمز اور ڈیٹا پر مبنی حکمرانی کے آلات سمیت ابھرتی ہوئی ٹیکنالوجیز سے فائدہ اٹھانے کی اہمیت پر زور دیا۔ انھوں نے مسلسل صلاحیت سازی اور قومی و بین الاقوامی بہترین طور طریقوں سے سیکھنے کی ضرورت پر بھی زور دیا۔

سکریٹری نے محکمے کی جاری پہل قدمیوں کو اجاگر کیا، جن میں اراضی کے ریکارڈ کی جدید کاری، سروے اور دوبارہ سروے، شہری املاک کے ریکارڈ کی تیاری، واٹرشیڈ کی ترقی اور اراضی سے متعلق ڈیجیٹل سسٹمز کی انٹرآپریبلٹی کی کوششیں شامل ہیں۔ انھوں نے ایک مربوط ایکو سسٹم بنانے کی اہمیت پر زور دیا جس میں اراضی کے ریکارڈ زراعت، قرض کی فراہمی، منصوبہ بندی اور شہریوں کی خدمات میں معاونت کر سکیں۔

گفت و شنید کے دوران، ریاستوں میں اراضی کی حکمرانی کی اصلاحات کا جائزہ لینے کے لیے بھارت کے لیے مخصوص فریم ورک تیار کرنے کے امکان پر بھی غور کیا گیا۔ اس طرح کا فریم ورک پیش رفت کی بینچ مارکنگ، بہترین طور طریقوں کی تشہیر اور اراضی کے شعبے میں شواہد پر مبنی پالیسی مداخلتوں میں سہولت فراہم کر سکتا ہے۔

عالمی بینک کے وفد نے اراضی کے انتظام، ڈیجیٹل اراضی ریکارڈ، املاک کی حکمرانی، ادارہ جاتی مضبوطی اور ٹیکنالوجی کو اپنانے سے متعلق بین الاقوامی تجربات اور عالمی بہترین طور طریقوں کا اشتراک کیا۔ گفت و شنید میں علم کے تبادلے، پالیسی تحقیق اور صلاحیت سازی کے مواقع کا بھی احاطہ کیا گیا۔

محکمہ اراضی وسائل نے وِکست بھارت کے وژن سے ہم آہنگ شفاف، موثر اور شہریوں پر مرکوز اراضی کی حکمرانی کے نظام کو فروغ دینے کے لیے نالج پارٹنرز اور اداروں کے ساتھ مل کر کام کرنے کے اپنے عزم کا اعادہ کیا۔ اس میٹنگ میں عالمی بینک کے لیڈ اکانومسٹ جناب کلاؤس ڈبلیو ڈیننگر؛ محکمہ اراضی وسائل کے جوائنٹ سکریٹری جناب پی نرہری؛ محکمہ اراضی وسائل کے جوائنٹ سکریٹری (ڈبلیو ایم) جناب نتن کھاڈے؛ اور وزارتِ خزانہ کے اقتصادی امور کے محکمے کے ڈائریکٹر (ایف بی) جناب پنیت کمار کے ساتھ دیگر اعلیٰ اہلکاران نے بھی شرکت کی۔

***

(ش ح - ع ا)

U.No. 8714

(ریلیز آئی ڈی: 2273742) وزیٹر کاؤنٹر : 9