جموں و کشمیر کا وفد، جس کی قیادت آئی آئی ایم جموں نے کی، وزارتِ تعلیم کے ایک بھارت شریشٹھ بھارت اقدام کے تحت یووا سنگم مرحلہ VI کے سلسلے میں کیرالہ پہنچا۔جموں و کشمیر سے تعلق رکھنے والے شرکاء پر مشتمل اس وفد کا پرتپاک استقبال کیا گیا اور ان کی میزبانی انڈین انسٹی ٹیوٹ آف مینجمنٹ (آئی آئی ایم) کوزی کوڈ نے کی۔یہ پروگرام بھارت کے مختلف خطوں سے آنے والے نوجوانوں کے درمیان ثقافتی تبادلے، تجرباتی تعلیم اور قومی یکجہتی کو فروغ دینے کے لیے منعقد کیا جا رہا ہے۔

معزز گورنر کیرالہ، جناب راجندر وشواناتھ آرلیکَر نے آئی آئی ایم کوزی کوڈ کے گروکل میں مندوبین سے ملاقات اور تبادلۂ خیال کیا۔گورنر نے شرکاء کے ساتھ قیادت، قوم سازی اور وِکست بھارت کی تشکیل میں نوجوانوں کے کردار جیسے موضوعات پر گفتگو کی۔ انہوں نے نوجوانوں کو ترغیب دی کہ وہ بھارت کی ترقی کی کہانی میں فعال کردار ادا کریں اور ایک بھارت شریشٹھ بھارت کے جذبے کو مزید مضبوط بنائیں۔

دورے کے دوران وفد نے کیرالہ کے اہم تعلیمی، سائنسی اور ثقافتی اداروں کا مشاہدہ کیا۔سنٹر فار واٹر ریسورسز ڈیولپمنٹ اینڈ مینجمنٹ (سی ڈبلیو آر ڈی ایم) میں وفد نے واٹر ہیریٹیج میوزیم اور کلائمیٹ چینج لرننگ لیب کا دورہ کیا، جہاں انہیں پانی کے تحفظ اور ماحولیاتی تبدیلیوں کے بارے میں آگاہی حاصل ہوئی۔وفد نے بنسوڑا ساگر ڈیم، کارلاڈ جھیل، چائے میوزیم، شہد میوزیم، چین ٹری کنزرویشن سائٹ اور اڈیانپارا آبشار کا بھی دورہ کیا۔ اس کے ساتھ ساتھ اڈیانپارا ہائیڈرو الیکٹرک پاور پلانٹ کا مشاہدہ کیا اور ماحولیات، حیاتیاتی تنوع اور پائیدار ترقی کے طریقوں کے بارے میں معلومات حاصل کیں۔

وفد نے ایری نگل میں واقع سرگالیا آرٹس اینڈ کرافٹس ولیج کا بھی دورہ کیا، جہاں انہوں نے مقامی ہنرمندوں سے ملاقات کی اور کیرالہ کے روایتی دستکاری کے فن کا مشاہدہ کیا۔اس دورے کے دوران کشتی کی سیر کا تجربہ بھی شامل تھا اور مقامی ثقافتی ورثے سے آگاہی حاصل کی گئی، جس کے بعد کپاڈ بیچ پر غروبِ آفتاب کا دلکش منظر دیکھا گیا۔بعد ازاں وفد نے پونپارا ہلز میں ٹریکنگ کی اور حیاتیاتی تنوع اور ماحولیاتی تحفظ سے متعلق سیشنز میں شرکت کی۔ انہیں دریائی زراعت اور علاقائی غذائی روایات کے بارے میں بھی تفصیلی معلومات فراہم کی گئیں۔

وفد نے کیرالہ کوآپریٹو ملک مارکیٹنگ فیڈریشن (ملما)، نیلمبور ٹیک میوزیم اور بایو ریسورسز نیچر پارک کا بھی دورہ کیا، جہاں شرکاء نے ڈیری مصنوعات کی تیاری، جنگلاتی ورثے اور حیاتیاتی تنوع کے تحفظ کے بارے میں معلومات حاصل کیں۔ اس کے علاوہ انہوں نے ریجنل سائنس سینٹر اور پلانیٹیریم کا بھی مشاہدہ کیا۔یہ پورا سفر کیرالہ کے ثقافتی، ماحولیاتی اور ترقیاتی پہلوؤں کا جامع اور ہمہ گیر تجربہ فراہم کر رہا ہے، جو یووا سنگم مرحلہ VI کے تحت قومی یکجہتی اور تجرباتی تعلیم کے جذبے کو مزید مضبوط بناتا ہے۔

**********

ش ح۔۔ ش ت۔ ر ب

U-8170

(रिलीज़ आईडी: 2270846) आगंतुक पटल : 5