تبدیلی پسند حکمرانی کے بارہ سال کے ملک گیر جشن کے ایک حصے کے طور پر، اقلیتی امور کی وزارت آج حکومت ہند کی پہلی وزارت بن گئی ہے جس نے اصلاحات پر مبنی حکمرانی اور شہریوں پر مرتکز خدمات کی فراہمی کے بارہ سال مکمل ہونے کی یاد میں ایک خصوصی "اصلاحات اتسو" کا اہتمام کیا ہے۔

نئی دہلی کے بھارت منڈپم میں منعقدہ تقریب میں وزارت کے اصلاحات پر مبنی اقدامات کی نمائش کی گئی جس کا مقصد ملک بھر میں اقلیتی برادریوں کے لیے جامع ترقی، شفافیت، رسائی میں آسانی اور ٹیکنالوجی کے ذریعے خدمات کی فراہمی کو یقینی بنانا تھا۔

 

اس پروگرام میں پارلیمانی امور اور اقلیتی امور کے مرکزی وزیر جناب کرن رجیجو، ​​اقلیتی امور کے مرکزی وزیر مملکت جناب جارج کورین، اقلیتی امور کی وزارت کے سکریٹری ڈاکٹر سریوتسا کرشنا اور وزارت کے سینئر افسران اورتمام چھ نوٹیفائی شدہ اقلیتی برادریوں کے نمائندے؛ اور ملک بھر سے وزارت کی مختلف اسکیموں کے استفادہ کنندگان نے شرکت کی۔

اپنے خطاب میں جناب کرن رجیجو نے سماج کے تمام طبقات کی جامع ترقی اور بااختیار بنانے کے لیے حکومت کےغیرمتزلزل عزم پر زور دیا۔ انہوں نے کہا کہ ٹیکنالوجی گورننس کو بہتر بنانے، شفافیت کو بڑھانے اور فلاحی اسکیموں کو مؤثر طریقے سے پہنچانے کے لیے ایک طاقتور ٹول کے طور پر ابھری ہے۔ انہوں نے وضاحت کی کہ گزشتہ بارہ سالوں میں، وزارت نے اپنے پروگراموں کو مزید قابل رسائی، جوابدہ اور نتائج پر مبنی بنانے کے لیے کئی اصلاحات کی ہیں۔

وزیرموصوف  نے 2047 تک ایک 'ترقی یافتہ ہندوستان' بنانے کے حکومت کے وژن کو دہرایا، جہاں ہر شہری کو مواقع، اچھی تعلیم، ہنر، رہائش، صحت کی دیکھ بھال، ڈیجیٹل کنیکٹیویٹی، اور باوقار روزی روٹی تک رسائی حاصل ہو۔ انہوں نے کہا کہ اس تقریب کے دوران فائدہ اٹھانے والوں کی طرف سے شیئر کیے گئے تجربات وزارت کی طرف سے نافذ کی جا رہی مختلف ا سکیموں اور پروگراموں کے مثبت اثرات کی عکاسی کرتے ہیں۔

 

اپنے خطاب میں، مسٹر جارج کورین نے اس بات پر زور دیا کہ حکومتی اسکیموں کے فوائد ہر اہل مستفید تک پہنچنے کو یقینی بنانے کے لیے آخری میل کی ترسیل اور کمیونٹی کی شرکت بہت ضروری ہے۔ انہوں نے ڈیجیٹل پلیٹ فارمز اور نچلی سطح کے نیٹ ورکس کے ذریعے رابطہ کاری کو بڑھانے اور شہریوں کی شرکت کو بہتر بنانے کے لیے وزارت کی کوششوں پر بھی روشنی ڈالی۔

اقلیتی امور کی وزارت کے سکریٹری، ڈاکٹر سریوتسا کرشنا نے "اصلاح، کارکردگی، تبدیلی، اور اطلاع" کے اصولوں پر مبنی اپنی تیسری مدت کے لیے وزارت کے وژن کا خاکہ پیش کیا۔ انہوں نے ڈیجیٹلائزیشن، ہنر مندی کی ترقی، تعلیمی اعتبار سے بااختیار بنانے اور خدمات کی فراہمی میں شفافیت میں نمایاں پیش رفت کو اجاگر کیا۔ انہوں نے حکمرانی کے نتائج اور شہریوں کے تجربے کو مزید بہتر بنانے کے لیے مصنوعی ذہانت(اے آئی) جیسی ابھرتی ہوئی ٹیکنالوجیز سے فائدہ اٹھانے کی ضرورت پر زور دیا۔ اسکالرشپ سے لے کر ہنر، کریڈٹ اور دستکاری تک- انہوں نے اعداد و شمار اور مثالوں کے ذریعے اقلیتوں کے بارے میں حکومت کی پالیسیوں کے بارے میں منفی تاثرات کو مؤثر طریقے سے دور کرنے کی کوشش کی۔

اس تقریب کی ایک خاص بات وزارت اقلیتی امور اور ‘ایک اسٹیپ فاؤنڈیشن ’کے درمیان مفاہمت کی یادداشت پر دستخط کرنا تھا۔ اس کا مقصد ڈیجیٹل پبلک انفراسٹرکچر اوراے آئی پر مبنی اقدامات پر تعاون کرنا ہے تاکہ فائدہ اٹھانے والوں کو خدمات کی فراہمی کو بہتر بنایا جا سکے۔ اس شراکت داری سے نوجوانوں کو مقامی روزگار کے مواقع سے جوڑنے کے لیے اختراعی ڈیجیٹل حل کی تیاری میں مدد ملے گی، ساتھ ہی سرکاری خدمات تک رسائی بڑھانے اور اسکیموں کے بارے میں بیداری کو بہتر بنانے میں مدد ملے گی۔

اس تقریب میں Gnani.ai، ہندوستان کی معروف خودمختار اے آئی کمپنی کی جانب سے پریزنٹیشنز اور لائیو ڈیمو پیش کیے گئے۔ Sarvam.AI نے AI کی صلاحیت کو بھی ظاہر کیا۔ جس نے اقلیتی امور کی وزارت کے لیے تیار کیے جانے والے تصوراتی حل کی نمائش کی، جس کا مقصد اے آئی کو مختلف اسکیموں میں شامل کرکے وزارت کے بنیادی کام کاج کو تبدیل کرنا ہے۔

"اصلاحات اتسو" کی ایک خاص بات ملک بھر میں مختلف اقلیتی برادریوں کے استفادہ کنندگان کے ساتھ ایک انٹرایکٹو سیشن تھا۔ استفادہ کنندگان نے  اپنے تجربات اور کامیابی کی کہانیاں شیئر کیں، جس میں تعلیم، ہنر مندی کی ترقی، صنعت کاری، اور ذریعہ معاش پیدا کرنے کے شعبوں میں وزارت کی مختلف اسکیموں اور اقدامات کے مثبت اثرات کو اجاگر کیا۔

 

********

 

ش ح۔ا ک۔ج ا

U. No. 8102

(रिलीज़ आईडी: 2270291) आगंतुक पटल : 18