ભારતીય રેલવેએ આજે ​​રેલવે મંત્રાલય ખાતે એક વિશેષ કાર્યક્રમ સાથે વિશ્વ પર્યાવરણ દિવસ 2026ની ઉજવણી કરી હતી, જે સમગ્ર રેલવે નેટવર્કમાં પર્યાવરણીય ટકાઉપણું, સ્વચ્છતા અને જવાબદારીપૂર્વક સંસાધન સંચાલન પ્રત્યેની તેની પ્રતિબદ્ધતાનો પુનરોચ્ચાર કરે છે.

આ કાર્યક્રમનું એક મુખ્ય આકર્ષણ રેલવે બોર્ડના ચેરમેન અને મુખ્ય કાર્યકારી અધિકારી (CEO) શ્રી સતીશ કુમાર દ્વારા 'ઘન કચરા વ્યવસ્થાપન નિયમો, 2026 - સ્ટાન્ડર્ડ ઓપરેટિંગ પ્રોસિજર્સ (SOP) પુસ્તિકા'નું વિમોચન (લોન્ચ) હતું. આ પુસ્તિકા કચરાના સંચાલનની પદ્ધતિઓને સુવ્યવસ્થિત કરવા, પર્યાવરણીય અનુપાલન (compliance) ને મજબૂત કરવા અને ભારતીય રેલવેમાં ટકાઉ કચરા વ્યવસ્થાપન પ્રણાલીઓના સમાન અમલીકરણને પ્રોત્સાહન આપવા માટે વિકસાવવામાં આવી છે.

ઉપસ્થિત જનમેદનીને સંબોધતા, રેલવે બોર્ડના ચેરમેન અને સીઈઓએ રેલવેની રોજિંદી કામગીરીમાં ટકાઉપણું સાંકળવા અને સ્વચ્છતા, પર્યાવરણીય જવાબદારી તેમજ જવાબદેહીની સંસ્કૃતિને પ્રોત્સાહન આપવાના મહત્વ પર ભાર મૂક્યો હતો. તેમણે તમામ ઝોનલ રેલવેને રેલવે સંસ્થાનોમાં ઘન કચરા વ્યવસ્થાપન નિયમો, 2026 નું અસરકારક અને સમયસર અમલીકરણ સુનિશ્ચિત કરવા વિનંતી કરી હતી અને સમગ્ર રેલવે પ્રણાલીમાં કચરાના સંચાલનના બહેતર પરિણામો પ્રાપ્ત કરવા માટે મજબૂત દેખરેખ તંત્ર (monitoring mechanisms) અને શ્રેષ્ઠ પદ્ધતિઓ અપનાવવાની જરૂરિયાત પર ભાર મૂક્યો હતો.

આ કાર્યક્રમના ભાગ રૂપે, અધિકારીઓ અને કર્મચારીઓને પર્યાવરણીય પ્રતિજ્ઞા લેવડાવવામાં આવી હતી, જે વધુ સ્વચ્છ, હરિયાળા અને વધુ ટકાઉ રેલવે નેટવર્કનું નિર્માણ કરવાના પ્રયાસોમાં સક્રિય ભાગીદારીને પ્રોત્સાહિત કરે છે.

આ પ્રસંગે સ્વચ્છતા અને સફાઈને પ્રોત્સાહન આપવા માટે ઝોનલ રેલવે દ્વારા કરવામાં આવેલા ઉત્કૃષ્ટ પ્રયાસોની પ્રશંસા કરતા 'સ્વચ્છતા પખવાડિયા પુરસ્કારો' પણ એનાયત કરવામાં આવ્યા હતા. આ સ્વચ્છતા અભિયાન દરમિયાન પ્રશંસનીય પ્રદર્શન માટે ઉત્તર-પૂર્વીય રેલવેએ પ્રથમ સ્થાન મેળવ્યું હતું, જ્યારે ઉત્તર-પશ્ચિમ રેલવે અને સધર્ન રેલવેને અનુક્રમે દ્વિતીય અને તૃતીય સ્થાન આપવામાં આવ્યું હતું.

આ કાર્યક્રમ પર્યાવરણીય નેતૃત્વને મજબૂત કરવા, ટકાઉ પદ્ધતિઓને પ્રોત્સાહન આપવા અને રાષ્ટ્ર માટે વધુ સ્વચ્છ, હરિયાળી અને પર્યાવરણ પ્રત્યે જવાબદાર પરિવહન પ્રણાલીના નિર્માણના ભારતીય રેલવેના વિઝનને આગળ વધારવાની નવીકરણ કરાયેલી પ્રતિબદ્ધતા સાથે સંપન્ન થયો હતો.

SM/IJ/JD