بھارت–فلپائن مشترکہ ورکنگ گروپ برائے تجارت و سرمایہ کاری (جے ڈبلیو جی ٹی آئی) کا چودھواں اجلاس 05 جون 2026 کو فلپائن کے دارالحکومت منیلا میں منعقد ہوا۔ اس اجلاس کی مشترکہ صدارت بھارت کی وزارتِ تجارت و صنعت، محکمہ تجارت کے جوائنٹ سکریٹری جناب  امیت ورما اور فلپائن کی جانب سے  محکمہ تجارت و صنعت، انٹرنیشنل ٹریڈ گروپ کے انڈر سیکریٹری جناب ایلن بی جیپٹی نے کی۔ متعلقہ وزارتوں، محکموں اور اداروں کے نمائندوں نے بھی ویڈیو کانفرنسنگ کے ذریعے اجلاس میں شرکت کی۔

دونوں فریقین نے بھارت اور فلپائن کے درمیان دوطرفہ تجارت میں مضبوط اور مسلسل اضافہ کو تسلیم کیا، جو سال 2025–26 میں 3.9 ارب امریکی ڈالر تک پہنچ گئی، اور یہ ایک واضح ترقیاتی رجحان کی عکاسی کرتا ہے۔اجلاس میں دوطرفہ تجارت اور سرمایہ کاری کے رجحانات، ترجیحی مصنوعات و خدمات کی نشاندہی، اور مختلف شعبوں میں فروغی سرگرمیوں اور تعاون پر تفصیلی گفتگو کی گئی۔ اس کے علاوہ فلم، توانائی، تعمیرات و بنیادی ڈھانچہ، آئی سی ٹی/آئی ٹی-بی پی ایم/اے آئی اور دواسازی (فارماسیوٹیکل) جیسے اہم شعبوں میں تعاون کے امکانات کا بھی جائزہ لیا گیا۔دونوں فریقین نے اس بات پر اتفاق کیا کہ ان شعبوں میں گہرا تعاون دونوں ممالک کے لیے دیرپا اور پائیدار فوائد کا باعث بن سکتا ہے، جو ترقیاتی اہداف کے حصول میں معاون ہوگا اور باہمی تعاون کے ایک مضبوط فریم ورک کو مزید مستحکم کرے گا۔

تجارت کو فروغ دینے کے لیے کاروباری ماحول کو بہتر بنانا بھی اجلاس کا ایک اہم نکتہ تھا۔ اس حوالے سے کسٹمز تعاون اور سہولت کاری، زرعی تعاون اور مخصوص مصنوعات کی منڈیوں تک رسائی، اور قومی کرنسیوں میں تجارتی تصفیے جیسے امور پر تفصیلی گفتگو کی گئی۔

میٹنگ میں آسیان-بھارت تجارتی سامان کے معاہدے (اے آئی ٹی آئی جی اے) کے جائزے کے جلد اختتام اور اس کے بعد دو طرفہ بھارت-فلپائن ترجیحی تجارتی معاہدے (پی ٹی اے) کے لیے مصروفیات پر بھی تبادلہ خیال کیا گیا ۔

مجموعی طور پر اجلاس نے دوطرفہ اقتصادی تعلقات کو مضبوط بنانے کی اسٹریٹجک اہمیت کو اجاگر کیا اور دونوں ممالک کے اس عزم کی توثیق کی کہ وہ ایک زیادہ متحرک اور باہمی طور پر فائدہ مند شراکت داری کی تعمیر جاری رکھیں گے۔

14ویں مشترکہ ورکنگ گروپ برائے تجارت و سرمایہ کاری (جے ڈبلیو جی ٹی آئی) کے اجلاس کے موقع پر 04 جون 2026 کو فلپائن میں سرگرم بھارتی کاروباری اداروں کے ساتھ ایک خصوصی نشست بھی منعقد کی گئی۔ اس نشست نے تجارت، سرمایہ کاری، منڈی کے مواقع اور بھارت–فلپائن تجارتی تعلقات کو مزید مستحکم بنانے کے طریقوں پر تبادلۂ خیال کے لیے ایک اہم پلیٹ فارم فراہم کیا۔

بھارت اور فلپائن کے درمیان جے ڈبلیو جی ٹی آئی کا آئندہ اجلاس نئی دہلی، بھارت میں منعقد ہوگا۔ یہ اجلاس دونوں ممالک کے لیے ایک مؤثر پلیٹ فارم ثابت ہوا جس کے ذریعے عالمی، علاقائی اور دوطرفہ پیش رفت پر خیالات کا تبادلہ کیا گیا، خاص طور پر اشیاء و خدمات کی تجارت اور سرمایہ کاری کے تعلقات کو مزید فروغ دینے پر زور دیا گیا۔

********

ش ح ۔ ا م ۔ م ا

UR No-8021

(रिलीज़ आईडी: 2269401) आगंतुक पटल : 12