ماحولیات، جنگلات اور ماحولیاتی تبدیلی کے مرکزی وزیر ، جناب بھوپندر یادو نے آج این سی ٹی دہلی کی وزیر اعلیٰ محترمہ ریکھا گپتا اور دہلی حکومت کے سینئر حکام کے ساتھ ایک جامع جائزہ اجلاس منعقد کیا تاکہ قومی دارالحکومت میں ہوا کے معیار کو بہتر بنانے کے لیے جاری اقدامات کی پیش رفت کا جائزہ لیا جا سکے۔ اجلاس کے دوران، وزیر موصوف نے تیز تر نفاذ، مضبوط بین الاداروں کے تعاون اور سخت نفاذ کی ضرورت پر زور دیا تاکہ سردیوں کے موسم کے آغاز سے پہلے آلودگی کی سطح میں نمایاں کمی یقینی بنائی جا سکے۔ اجلاس میں موجود دیگر معززین میں جناب پرویش صاحب سنگھ، وزیر برائے پبلک ورکس ڈیپارٹمنٹ، اور سردار منجندر سنگھ سرسا، وزیر ماحولیات، جنگلات اور جنگلی حیات، جی این سی ٹی ڈی شامل تھے۔

جناب یادو نے زور دیا کہ فضائی آلودگی کو کم کرنے کے لیے تمام اسٹیک ہولڈروں کی مسلسل اور مربوط کارروائی ضروری ہے۔ انھوں نے دہلی حکومت کے ذریعے کی جانے والی کوششوں کو سراہا اور اس بات پر زور دیا کہ نشاندہی شدہ نفاذ کے خلا کو مشن موڈ میں دور کیا جانا چاہیے۔ انھوں نے کہا، ’’آنے والے مہینے دہلی کے فضائی معیار کے انتظام کے لیے نہایت اہم ہیں۔ منصوبہ بند مداخلتوں کی بروقت تکمیل، سخت نفاذ اور زمینی سطح پر مربوط اقدامات عوامی صحت کے تحفظ اور شہریوں کی زندگی کے معیار کو بہتر بنانے کے لیے ضروری ہیں۔‘‘

روڈ ڈسٹ کم کرنے کے مسئلے کا جائزہ لیتے ہوئے، وزیر موصوف نے سڑکوں کی سالانہ ترقی کے اہداف کو پورا کرنے اور منصوبہ بندی، ٹینڈرنگ، ورک آرڈرز کے اجرا اور سپلائی چین میں خلل میں تاخیر کو دور کرنے کے لیے زیادہ مرکوز طریقہ کار کی ضرورت کو اجاگر کیا۔ انھوں نے دہلی حکومت پر زور دیا کہ وہ ہدفی ایکشن پلان کے مطابق عمل درآمد کو تیز کرے تاکہ اکتوبر 2026 تک تمام زیر التوا ترقیاتی کام مکمل ہو جائیں۔ جناب یادو نے سڑکوں کے ساتھ کھلے مقامات کی نشاندہی کر کے وسیع پیمانے پر سبز کاری کی سرگرمیوں کا مطالبہ کیا تاکہ گرد و غبار کی آلودگی کو کم کیا جا سکے۔ انھوں نے مزید کہا کہ سنٹرل روڈ ریسرچ انسٹی ٹیوٹ (سی آر آر آئی) اور اسکول آف پلاننگ اینڈ آرکیٹیکچر (ایس پی اے) کے ساتھ زیر التواء میمورنڈم آف ایگریمنٹ (ایم او اے) مئی 2026 کے آخر تک حتمی شکل دی جا سکتی ہے تاکہ مقررہ سڑک کی ترقی کے معیارات کی پابندی یقینی بنائی جا سکے۔

وزیر موصوف نے میکانائزڈ روڈ سویپنگ مشینوں (ایم آر ایس ایمز) کی تعیناتی کا بھی جائزہ لیا اور ان کی موجودہ تعداد میں نمایاں اضافے کی ضرورت کو اجاگر کیا۔ انھوں نے دہلی حکومت سے درخواست کی کہ وہ سڑکوں کی صفائی کے آپریشنز کو تیز کرے اور ستمبر 2026 تک 78 بڑے اور درمیانے درجے کے ایم آر ایس ایمز کے ساتھ ساتھ 1,000 کچرا چننے والوں کی تعیناتی کو یقینی بنائے جیسا کہ پہلے تجویز کیا گیا تھا۔ انھوں نے کہا کہ شدید اور گہری سڑکوں کی صفائی اور گرد و غبار کو کم کرنا شہری علاقوں میں ذرات کی آلودگی کو کم کرنے کے لیے سب سے مؤثر اقدامات میں شامل ہیں۔

پبلک ٹرانسپورٹ اور الیکٹرک موبلٹی کے حوالے سے، جناب یادو نے مزید الیکٹرک بسوں کی خریداری کی ضرورت پر زور دیا اور دہلی حکومت سے مطالبہ کیا کہ وہ اکتوبر 2026 تک مرحلہ وار ایکشن پلان کے ذریعے اس فرق کو پر کرے۔ انھوں نے شہر بھر میں ای وی پبلک چارجنگ انفراسٹرکچر کی تیز رفتار بہتری کی ضرورت پر بھی زور دیا۔ علاقائی ہم آہنگی کی اہمیت پر زور دیتے ہوئے، وزیر موصوف نے کہا کہ وسیع این سی آر خطے میں ای وی اپنانے کی ترغیب بھی دی جانی چاہیے۔

وزیر موصوف نے دہلی کے میٹرو نیٹ ورک کو مضبوط بنانے اور ملٹی موڈل آخری میل کنیکٹیویٹی کو بہتر بنانے کی ضرورت پر زور دیا تاکہ طلب اور رسد کے فرق کو پر کیا جا سکے، اس طرح عوامی نقل و حمل کے زیادہ استعمال کی حوصلہ افزائی کی جائے اور گاڑیوں کے اخراج میں کمی کی جا سکے۔ انھوں نے زور دیا کہ آخری میل کنیکٹیویٹی اقدامات کو وسیع تر شہر کی نقل و حمل کے منصوبے کے ساتھ مکمل طور پر مربوط کیا جانا چاہیے تاکہ مسافروں کے لیے ہموار اور آسان نقل و حمل یقینی بنایا جا سکے۔

اینڈ آف لائف (ای او ایل) گاڑیوں سے متعلق اقدامات کا جائزہ لیتے ہوئے، جناب یادو نے حکام سے کہا کہ وہ این سی آر ریجن سے باہر ای او ایل گاڑیوں کی منتقلی کے لیے نو آبجیکشن سرٹیفکیٹس (این او سی) جاری کرنے میں جلدی کریں۔ انھوں نے یہ بھی درخواست کی کہ ستمبر 2026 تک تمام سرحدی داخلی مقامات پر خودکار نمبر پلیٹ ریکگنیشن (اے این پی آر) کیمرے نصب کیے جائیں تاکہ نگرانی اور نفاذ کو مضبوط بنایا جا سکے۔ جناب یادو نے دہلی میں کمرشل گاڑیوں کی جانچ کی صلاحیت بڑھانے پر بھی زور دیا۔

وزیر موصوف نے مزید زور دیا کہ دہلی کے 15 حصے ستمبر 2026 تک سگنل فری کوریڈورز کے طور پر شناخت اور ترقی دیے جائیں تاکہ بھیڑ اور گاڑیوں کے آئیڈلنگ اخراجات کو کم کیا جا سکے۔ انھوں نے متعلقہ اداروں سے بھی کہا کہ وہ بڑے آلودگی کے ہاٹ اسپاٹس کی نشاندہی کریں اور بھیڑ کم کرنے اور آلودگی میں کمی کے لیے ہدفی اقدامات کریں۔

عوامی پارکنگ انفراسٹرکچر کے جائزے کے دوران، جناب یادو نے منصوبہ بند اہداف کو پورا کرنے کے لیے نئی پارکنگ سہولیات کی ترقی میں اضافہ کرنے کی اپیل کی۔ انھوں نے دہلی حکومت پر زور دیا کہ وہ دسمبر 2026 تک منظور شدہ منصوبے کے مطابق مناسب پارکنگ سہولیات فراہم کرنے اور توجہ مرکوز کرے۔

صنعتی آلودگی کے حوالے سے، وزیر موصوف نے زور دیا کہ آن لائن مسلسل اخراج مانیٹرنگ سسٹمز (او سی ایم ایمز) اور ایئر پولوشن کنٹرول ڈیوائسز (اے پی سی ڈیز) کی باقاعدہ کیلیبریشن اور مناسب کارکردگی کو صنعتی یونٹس میں یقینی بنایا جائے، اور سے اے کیو ایم کے ذریعے جاری کردہ صنعتی اخراج کے نئے معیارات کے حوالے سے اے پی سی ڈیز کی مناسب کارکردگی کو یقینی بنایا جائے۔ انھوں نے زور دیا کہ معائنے باقاعدگی سے کیے جانے چاہئیں اور جی این سی ٹی ڈی کو یقینی بنانا چاہیے کہ ان او سی ای ایمز ڈیوائسز سے ڈیٹا مسلسل سی پی سی بی سرور تک پہنچتا رہے تاکہ نگرانی کی جا سکے۔ انھوں نے مزید کہا کہ غیر تعمیل کرنے والے یونٹس کو سخت نفاذی کارروائی کا سامنا کرنا چاہیے، جس میں ضرورت پڑنے پر سیلنگ بھی شامل ہے۔

جناب یادو نے غیر مطابقت پذیر علاقوں میں کام کرنے والی صنعتوں کے معائنے کو سخت کرنے کا مطالبہ کیا اور حکام کو ہدایت دی کہ وہ ایسے یونٹس کی ماحولیاتی اصولوں کے مطابق منتقلی کے لیے مناسب اقدامات کریں، جس میں ضلع انتظامیہ کو شامل کیا جائے۔ انھوں نے مزید ہدایت دی کہ شہر بھر میں غیر تعمیل کرنے والے ڈیزل جنریٹر سیٹوں کے خلاف نفاذ کی مہمات کو تیز کیا جائے۔

تعمیراتی اور انہدامی (ڈی اینڈ سی) کے فضلے کے انتظام کا جائزہ لیتے ہوئے، وزیر موصوف نے پراسیسنگ صلاحیت میں روزانہ تقریبا 1,000 ٹن کے موجودہ خلا کو اجاگر کیا اور درخواست کی کہ دسمبر 2026 تک اضافی پروسیسنگ سہولیات میں اضافہ کیا جائے۔ انھوں نے دہلی میونسپل کارپوریشن سے بھی زور دیا کہ وہ جولائی 2026 تک تمام ڈی اینڈ سی ویسٹ ٹرانسپورٹ گاڑیوں کی جیو ٹیگنگ کو یقینی بنائیں۔ سخت نگرانی کی ضرورت پر زور دیتے ہوئے، جناب یادو نے ڈی پی سی سی، ایم سی ڈی اور این ڈی ایم سی سے درخواست کی کہ تعمیراتی مقامات پر معائنے سخت کیے جائیں اور ہر فعال تعمیراتی سائٹ کا کم از کم ہر ماہ ایک بار معائنہ کیا جائے۔ انھوں نے مزید غیر تعمیل کرنے والی سائٹس کے خلاف سخت نفاذ کی اپیل کی اور حکومتی اداروں پر زور دیا کہ وہ پروسیسڈ ڈی ایند سی فضلہ کے استعمال اور اخراج کے لیے واضح اہداف مقرر کریں۔

میونسپل ٹھوس فضلہ کے انتظام کے حوالے سے، وزیر موصوف نے دہلی حکومت سے درخواست کی کہ وہ پرانے فضلہ کی صفائی کے اہداف کو مقررہ وقت کے اندر حاصل کرنے کو یقینی بنائے۔ انھوں نے ستمبر 2026 تک تازہ میونسپل ٹھوس فضلہ پروسیسنگ سہولیات میں اضافے کی ضرورت پر بھی زور دیا اور ویسٹ ٹو توانائی پلانٹس کی کمیشننگ کے لیے حتمی ٹائم لائنز کا مطالبہ کیا۔

سردیوں کے مہینوں میں فضلہ جلانے کے واقعات پر تشویش کا اظہار کرتے ہوئے، جناب یادو نے کھلے کچرا جلانے کے خلاف زیرو ٹالرنس پالیسی کی ضرورت کو دہرایا۔ انھوں نے حکام سے مطالبہ کیا کہ وہ خلاف ورزیوں کو روکنے کے لیے مناسب نفاذ ٹیمیں تعینات کریں اور ریزیڈنٹ ویلفیئر ایسوسی ایشنز (آر ڈبلیو ایز) کو مشورہ دیا کہ وہ سردیوں میں کارکنوں کو حرارتی سہولیات فراہم کریں تاکہ کھلے عام آگ لگانے کے طریقوں کی حوصلہ شکنی کی جا سکے۔

وزیر موصوف نے انفارمیشن، ایجوکیشن اینڈ کمیونی کیشن (آئی ای سی) کی سرگرمیوں کی اہمیت پر بھی زور دیا تاکہ مؤثر فضلہ انتظام کیا جا سکے اور ہدایت دی کہ تمام اسٹیک ہولڈروں کو سی اے کیو ایم آئی ای سی فریم ورک کے مطابق آگاہ کیا جائے۔ انھوں نے مزید درخواست کی کہ دہلی کے تمام 36 شناخت شدہ مقامات پر گرین کریمیٹوریم کی سہولیات کو یقینی بنایا جائے۔

عوامی شرکت اور مربوط ادارہ جاتی کارروائی کی اہمیت کو اجاگر کرتے ہوئے، جناب یادو نے تجویز دی کہ فوری طور پر گہری سبز کاری اور گہری صفائی کی مہمات شروع کی جا سکتی ہیں، اور مون سون کے ختم ہونے کے بعد انھیں بھی منظم کیا جا سکتا ہے۔ یہ بارش کے بعد سڑکوں/نالوں/ریل ٹریکس پر جمع ہونے والی پرانی گرد کے مسئلے کو حل کرنے میں مدد دے گا اور فضائی آلودگی کی بڑی وجہ بن جاتی ہے۔ جناب یادو نے مزید کہا کہ یہ مہمات ’پورے حکومت‘ اور ’پورے معاشرے‘ کے نقطہ نظر پر چل سکتی ہیں، جس میں یونین اور دہلی حکومتوں کی مشترکہ کوششوں سے عوامی شرکت کی حوصلہ افزائی کی جا سکتی ہے۔

وزیر موصوف نے کہا، ’’فضائی آلودگی کے کنٹرول کے لیے اجتماعی ذمہ داری اور ہر سطح پر مسلسل کارروائی ضروری ہے۔ مرکز دہلی حکومت اور تمام متعلقہ فریقین کے ساتھ قریبی تعاون کے لیے عہدبستہ ہے تاکہ دہلی کے عوام کے لیے صاف ہوا کو یقینی بنایا جا سکے۔‘‘ انھوں نے مزید مشورہ دیا کہ دہلی حکومت سیاسی اور سرکاری نمائندوں پر مشتمل ٹاسک فورسز بنا سکتی ہے تاکہ قومی دارالحکومت میں فضائی آلودگی کے ہاٹ اسپاٹس سے نمٹا جا سکے۔ ٹیمیں متعلقہ اداروں کے ساتھ رابطہ کر سکتی ہیں اور ماہانہ جائزے کر سکتی ہیں تاکہ نفاذ کی سخت نگرانی کی جا سکے اور مقررہ ٹائم لائنز پر جوابدہی کو یقینی بنایا جا سکے، انھوں نے نتیجہ اخذ کیا۔

اس اجلاس میں سیکرٹری (وزرات ماحولیات)، چیئرمین، کمیشن فار ایئر کوالٹی مینجمنٹ (سی اے کیو ایم وزرات ماھولیات و جنگلات اور این سی ٹی دہلی کی ریاستی حکومت کے سینئر افسران نے شرکت کی۔ اجلاس میں سی پی سی بی، دہلی پولوشن کنٹرول کمیٹی (ڈی پی سی سی)، این ڈی ایم سی، دہلی میٹرو، دہلی پولیس اور پی ڈبلیو ڈی کے سینئر افسران بھی موجود تھے۔

***

(ش ح – ع ا)

U. No. 7593

(ریلیز آئی ڈی: 2265653) وزیٹر کاؤنٹر : 8