سڑک  ٹرانسپورٹ اور قومی شاہراہوں کے مرکزی وزیر جناب نتن گڈکری نے آج میڈیا اور سوشل میڈیا پلیٹ فارمز کے ذریعے ملنے والی معلومات کی بنیاد پر راجستھان اور ہماچل پردیش میں نیشنل ہائی وے پروجیکٹوں کے معیار اور دیکھ بھال کی صورتحال پر جامع جائزہ میٹنگیں کیں۔ یہ میٹنگیں نئی دہلی میں مرکزی وزرائے مملکت جناب اجے ٹمٹا اور جناب  ہرش ملہوترا، این ایچ اے آئی اور ایم او آر ٹی ایچ  کے سینئر عہدیداروں اور پروجیکٹ ٹھیکیداروں کی موجودگی میں منعقد ہوئیں۔

جائزے کے دوران، جناب  گڈکری نے راجستھان میں 10,064 کلومیٹر پر محیط نیشنل ہائی ویز کے معیار اور دیکھ بھال کی صورتحال کا جائزہ لیا اور ہماچل پردیش میں 1,947 کلومیٹر پر محیط نیشنل ہائی وے پروجیکٹوں کے معیار اور دیکھ بھال کی پیشرفت کا جائزہ لیا۔

جناب  گڈکری نے پروجیکٹوں کی بروقت تکمیل، کوالٹی  معیارات پر سختی سے عمل کرنے اور پائیدار، طویل المدت اور موثر ہائی وے انفراسٹرکچر کی ترقی کو یقینی بنانے کے لیے جدید ترین ٹیکنالوجیز اور جدید تعمیراتی طریقوں کو اپنانے پر زور دیا۔ انہوں نے اس بات پر روشنی ڈالی کہ رابطے کو بہتر بنانے، اقتصادی ترقی کو تیز کرنے، مسافروں کی سہولت بڑھانے اور اہم راہداریوں میں بلاتعطل آمدورفت کو یقینی بنانے کے لیے مضبوط ہائی وے نیٹ ورک انتہائی اہم ہیں۔

مرکزی وزیر نے عہدیداروں کو مانسون کے لیے جامع تیاریوں کے اقدامات کرنے کی بھی ہدایت دی، جس میں پانی کی نکاسی کا موثر انتظام، ڈھلوانوں کے تحفظ کا کام، پیشگی حفاظتی دیکھ بھال اور رکاوٹوں کو کم کرنے، سڑک کی حفاظت کو برقرار رکھنے اور اثاثوں کی طویل مدتی پائیداری کو بڑھانے کے لیے فوری ردعمل کا طریقہ کار شامل ہے۔

****

ش ح۔ا ک۔ن م۔

U- 7512

(ریلیز آئی ڈی: 2265022) وزیٹر کاؤنٹر : 12