فضائیہ کی اسپیشل فورس ’گروڑ‘ کے جوانوں کی تربیت کی کامیاب تکمیل کے موقع پر 23 مئی 2026 کو گروڑ رجمنٹل ٹریننگ سینٹر (جی آر ٹی سی)، ایئر فورس اسٹیشن چندی نگر میں میرون بیریٹ تقریبِ پریڈ کا انعقاد کیا گیا۔ اس تقریب میں اے وی ایم راہل گپتا، اے سی اے ایس آپریشنز (اسپیس) نے بطور مہمانِ خصوصی پریڈ کا معائنہ کیا۔

گروڑ رجمنٹل تربیتی مرکز کے کمانڈنٹ نے مہمانِ خصوصی کا استقبال کیا اور تربیت کے مختلف پہلوؤں پر بریفنگ دی۔ مہمانِ خصوصی نے کامیابی سے تربیت مکمل کرنے والے ’گروڑز‘ کو مبارکباد پیش کی۔ نوجوان کمانڈوز سے خطاب کرتے ہوئے انہوں نے بدلتے ہوئے سلامتی کے منظرنامے سے ہم آہنگ رہنے کے لیے سخت تربیت اور خصوصی دستوں کی مہارتوں کو نکھارنے کی اہمیت پر زور دیا۔ انہوں نے کامیاب ’گروڑ‘ تربیت یافتگان کو میرون بیریٹ، گروڑ مہارت نشان اور خصوصی دستوں کے ٹیبس عطا کیے، جبکہ نمایاں کارکردگی دکھانے والوں میں انعامات بھی تقسیم کیے گئے۔

پاسنگ آؤٹ تقریب کے دوران ’گروڑز‘ نے مختلف مہارتوں کا مظاہرہ کیا، جن میں جنگی فائرنگ، یرغمالیوں کی بازیابی، فائرنگ مشق، دھماکہ خیز حملے کی کارروائیاں، رکاوٹیں عبور کرنا، دیوار پر چڑھائی، رسی کے ذریعے اترنا، ریپلنگ اور فوجی مارشل آرٹس شامل تھے۔

میرون بیریٹ کی رسمی پریڈ ’گروڑز‘ کے لیے فخر اور کامیابی کا لمحہ ہے، جو نہایت سخت تربیتی مرحلے کی کامیاب تکمیل اور ان کی ایک ممتاز ’خصوصی فورس آپریٹر‘ کے طور پر اشرافیہ ’گروڑ‘ فورس میں شمولیت کی علامت ہے۔

آپریشن سندور میں بھارتی فضائیہ کے خصوصی دستوں کے کردار کو مدنظر رکھتے ہوئے نئے تربیت یافتہ خصوصی فورس آپریٹرز بھارتی فضائیہ کی نئی نوعیت کے خصوصی مشن انجام دینے کی صلاحیت کو مزید مضبوط بنائیں گے۔

******

ش ح۔ ش ا ر۔ ول

Uno-7461

 

(ریلیز آئی ڈی: 2264514) وزیٹر کاؤنٹر : 12