تلنگانہ کے گورنر جناب شیو پرتاپ شکلا نے 18 مئی 2026 کو یووا سنگم کے تحت انڈین انسٹی ٹیوٹ آف ٹیکنالوجی تروپتی کا دورہ کرنے والے مہاراشٹر کے نوجوانوں کے ایک وفد سے ملاقات کی۔

یہ وفد انڈین انسٹی ٹیوٹ آف سائنس ایجوکیشن اینڈ ریسرچ (آئی آئی ایس ای آر) پونے کی قیادت میں مختلف علمی، ثقافتی اور عملی سرگرمیوں میں حصہ لے رہا ہے، جن کا مقصد پورے بھارت میں بین ریاستی ہم آہنگی اور نوجوانوں کے باہمی رابطے کو مضبوط بنانا ہے۔

 

 

طلبا سے خطاب کرتے ہوئے جناب شیو پرتاپ شکلا نے ملک کی تعمیر میں نوجوانوں کی شمولیت کی اہمیت کو اجاگر کیا اور بھارت کے تنوع میں اتحاد کو مضبوط بنانے کے لیے ثقافتی ہم آہنگی اور بین ریاستی تعاون کے کردار پر زور دیا۔ انہوں نے کہا کہ یووا سنگم جیسے اقدامات نوجوان شہریوں کو مختلف خطوں، ثقافتوں اور روایات سے جڑنے کے بامعنی مواقع فراہم کرتے ہیں، جس سے جذباتی یکجہتی اور قومی ہم آہنگی کو فروغ ملتا ہے۔

گورنر نے عوامی سطح پر روابط کو فروغ دینے اور طلبا کو بھارت کی ثقافتی دولت اور ترقیاتی کامیابیوں کا براہ راست تجربہ فراہم کرنے میں یووا سنگم کے کردار کی تعریف کی۔ انہوں نے وفد کے اراکین کو ترغیب دی کہ وہ قومی یکجہتی کے سفیر کے طور پر باہمی احترام، سیکھنے اور تعاون کے جذبے کو آگے بڑھائیں۔

 

 

اپنے دورے کے دوران وفد نے آئی آئی ٹی تروپتی میں اساتذہ، محققین، اختراع کاروں اور طلبا کے ساتھ تبادلہ خیال کیا، جس کے ذریعے انہیں جدید سائنسی تحقیق، تعلیمی برتری اور تکنیکی ترقی سے آگاہی حاصل ہوئی۔ وفد نے ثقافتی تبادلوں اور سماجی سرگرمیوں کے ذریعے جنوبی بھارت کے متحرک ثقافتی ورثے اور روایات کا بھی تجربہ کیا۔

 

 

وزارتِ تعلیم کے محکمۂ اعلیٰ تعلیم کی جانب سے شروع کیے گئے یووا سنگم مرحلہ ششم کا مقصد جامع تعلیمی اور ثقافتی تبادلوں کے ذریعے قومی یکجہتی، ثقافتی ہم آہنگی اور جذباتی اتحاد کو مضبوط بنانا ہے۔ یہ اقدام 22 جوڑی ریاستوں اور مرکز زیر انتظام علاقوں کے شرکا کو ایک پلیٹ فارم پر لاتا ہے، جس سے بھارت کے تنوع، اختراعی نظاموں اور ملک کی تعمیر سے متعلق مشترکہ امنگوں کو بہتر طور پر سمجھنے کے مواقع پیدا ہوتے ہیں۔

********

ش ح۔ ف ش ع

U: 7352

(ریلیز آئی ڈی: 2263512) وزیٹر کاؤنٹر : 5