ہندوستانی بحریہ نے بحرِ ہند کے خطے (آئی او آر) میں ایک وسیع کثیر القومی تعیناتی کے بعد 20 مئی 2026 کو کوچی میں آئی این ایس سنینا کے فلیگ اِن کے ساتھ تاریخی آئی او ایس ساگر تعیناتی کے کامیاب اختتام کا جشن منایا۔ 16 شراکت دار ممالک کے 38 اہلکاروں پر مشتمل یہ مشترکہ مشن خطے میں ترجیحی سکیورٹی پارٹنر کے طور پر ہندوستان کے ابھرتے کردار اور آئی او آر بحری افواج کے درمیان سمندری تعاون، باہمی اشتراک اور صلاحیت سازی کو مستحکم کرنے کے لیے اس کے پائیدار عزم کا اہم مظہر ہے۔

ہندوستانی بحریہ اور شراکت دار ممالک — بنگلہ دیش، انڈونیشیا، کینیا، ملائیشیا، ماریشس، مالدیپ، موزمبیق، میانمار، سیشلز، سنگاپور، جنوبی افریقہ، سری لنکا، تنزانیہ، تھائی لینڈ، تیمور لیستے اور متحدہ عرب امارات — کی جانب سے مشترکہ طور پر انجام دی گئی یہ تعیناتی خطے میں منعقد کی جانے والی جامع ترین کثیر القومی آپریشنل سرگرمیوں میں سے ایک کی نمائندگی کرتی ہے۔

’’ایک سمندر، ایک مشن‘‘ کے جذبے کی عکاسی کرتے ہوئے، آئی او ایس ساگر نے پائیدار علاقائی روابط اور آپریشنل تعاون کے ذریعے ایک جامع، اشتراکی اور قواعد پر مبنی بحری نظام کو فروغ دینے کے لیے ہندوستانی بحریہ کے عزم کا اظہار کیا۔

یہ مشن وزیر اعظم جناب نریندر مودی کی جانب سے پیش کردہ ہندوستان کے سمندری اقدامات ساگر — ’’خطے میں سب کے لیے سلامتی اور ترقی‘‘ — اور مہاساگر — ’’خطوں میں سلامتی اور ترقی کے لیے باہمی اور جامع ترقی‘‘ — کے وژن کی عکاسی کرتا ہے، جن کا مقصد بحرِ ہند کے پورے خطے میں اجتماعی سلامتی، علاقائی استحکام اور تعاون پر مبنی بحری ترقی کو یقینی بنانا ہے۔

کوچی بندرگاہ پر واپسی کے موقع پر آئی این ایس سنینا کا واٹر کینن سلامی کے ساتھ رسمی استقبال کیا گیا۔ نیول فاسٹ انٹرسیپٹر کرافٹس کی معاونت سے جہاز کا جنوبی بحری کمان کے سینئر بحری افسران نے پرتپاک خیرمقدم کیا۔ وائس ایڈمرل سمیر سکسینہ، فلیگ آفیسر کمانڈنگ اِن چیف، سدرن نیول کمانڈ، آئی او ایس ساگر کی فلیگ اِن تقریب کے مہمانِ خصوصی تھے۔ جہاز کی آمد پر ایف او سی اِن سی ساؤتھ نے طویل تعیناتی کے دوران کثیر القومی عملے کی پیشہ ورانہ مہارت، مؤثر انضمام اور غیر معمولی ٹیم ورک کو سراہا۔

تقریب کے دوران اہلکاروں سے خطاب کرتے ہوئے، ایف او سی اِن سی ساؤتھ نے اس بات پر روشنی ڈالی کہ آئی او ایس ساگر شراکت دار بحری افواج کے درمیان باہمی تعاون کو فروغ دینے اور آئی او آر میں ابھرتے ہوئے سکیورٹی چیلنجوں سے نمٹنے کے لیے مربوط بحری ردِعمل کو مضبوط بنانے کے سلسلے میں ہندوستانی بحریہ کے فعال نقطۂ نظر کی عکاسی کرتا ہے۔ انہوں نے اس بات پر زور دیا کہ ایک محفوظ، مستحکم اور خوشحال بحری ماحول کو یقینی بنانے کے لیے علاقائی بحری افواج کے درمیان پائیدار باہمی تعاون اور آپریشنل ہم آہنگی ناگزیر ہے۔

انہوں نے مزید کہا کہ اس تعیناتی کے نتیجے میں مشترکہ تربیت، پیشہ ورانہ تبادلوں اور باہمی آپریشنل سرگرمیوں کے ذریعے باہمی تعاون، آپریشنل رابطہ کاری اور باہمی افہام و تفہیم میں نمایاں اضافہ ہوا ہے۔ اس نوعیت کی سرگرمیاں سمندری قزاقی، غیر قانونی ماہی گیری، اسلحہ اور منشیات کی اسمگلنگ، انسانی اسمگلنگ اور سمندر میں دیگر غیر قانونی سرگرمیوں سمیت غیر روایتی بحری خطرات سے مؤثر طور پر نمٹنے کے لیے علاقائی بحری افواج کی اجتماعی صلاحیت کو مضبوط بناتی ہیں۔

آئی او ایس ساگر کو 2 اپریل 2026 کو ممبئی سے عزت مآب رکشا راجیہ منتری جناب سنجے سیٹھ نے جھنڈی دکھا کر روانہ کیا تھا۔ تعیناتی کے دوران جہاز نے مالے، فوکیٹ، جکارتہ، سنگاپور، ینگون، چٹوگرام اور کولمبو میں پورٹ کالز کیں۔

اس تعیناتی میں باہمی تعاون پر مبنی متعدد سرگرمیاں شامل تھیں، جن میں گزرگاہی مشقیں، کراس ڈیک روابط، سبجیکٹ میٹر ایکسپرٹ تبادلے، مربوط سمنشپ ارتقا، سمندری سلامتی سے متعلق تبادلۂ خیال، اور شراکت دار بحری افواج و سمندری ایجنسیوں کے ساتھ پیشہ ورانہ تعامل شامل تھے۔ ان سرگرمیوں نے بحرِ ہند کے خطے میں سمندری حفاظت، سلامتی اور جہاز رانی کی آزادی کو برقرار رکھنے کے مشترکہ عزم کو مزید مضبوط کیا۔

تعیناتی سے قبل کثیر القومی عملے نے جنوبی بحری کمان، کوچی میں جامع بندرگاہی تربیت حاصل کی، جس میں جہاز رانی، نیویگیشن، فائر فائٹنگ، نقصان پر قابو پانے، مواصلاتی طریقۂ کار، وی بی ایس ایس آپریشنز اور جدید برج مین شپ شامل تھے۔ عملے نے کوچی میں آئی او این ایس میری ٹائم مشق آئی ایم ای ایکس 2026 کی ٹیبل ٹاپ مشق میں بھی حصہ لیا، جس سے پیشہ ورانہ باہمی تعاون اور آپریشنل تیاریوں کو مزید تقویت ملی۔

آئی او ایس ساگر کی کامیاب تکمیل ہندوستان کے سمندری روابط اور علاقائی مشغولیت کے اقدامات میں ایک اہم سنگِ میل کی حیثیت رکھتی ہے، جو قابلِ اعتماد شراکت داریوں کی تعمیر، اجتماعی سمندری صلاحیت میں اضافے اور بحرِ ہند کے پورے خطے میں تعاون پر مبنی سلامتی کو فروغ دینے کے لیے ہندوستانی بحریہ کے مسلسل عزم کی توثیق کرتی ہے۔

 

***

UR-7334

(ش ح۔اس ک  )

(ریلیز آئی ڈی: 2263490) وزیٹر کاؤنٹر : 7