ભારતના BRICS 2026 અધ્યક્ષપદ હેઠળ, ભારત સરકારના કાયદા અને ન્યાય મંત્રાલયના કાનૂની બાબતોના વિભાગે વૈકલ્પિક વિવાદ નિવારણ (ADR) પર સહયોગને વધુ ગાઢ બનાવવા માટે 19 થી 20 મે 2026 ના રોજ ગુજરાતના ગાંધીનગરમાં વરિષ્ઠ અધિકારીઓની બેઠકનું સમાપન કર્યું. આ બેઠક હાઇબ્રિડ મોડમાં યોજાઈ હતી, જેમાં બ્રાઝિલ, ચીન, ભારત, ઇજિપ્ત, ઇથોપિયા, ઇરાન, ઇન્ડોનેશિયા, રશિયા, દક્ષિણ આફ્રિકા અને સંયુક્ત આરબ અમીરાતના વરિષ્ઠ અધિકારીઓએ રૂબરૂ અને ઓનલાઈન બંને રીતે ભાગ લીધો હતો. આ બેઠક "મધ્યસ્થતા અને આર્બિટ્રેશનમાં ક્ષમતા નિર્માણ દ્વારા વૈકલ્પિક વિવાદ નિવારણને મજબૂત કરવા અંગે BRICS દેશોના ન્યાય મંત્રીઓનું જાહેરનામું" શીર્ષક ધરાવતા સંયુક્ત જાહેરનામા પર સહિયારી સર્વસંમતિ સાથે સમાપ્ત થઈ હતી, જેને 21 થી 22 મે 2026 દરમિયાન ગાંધીનગરમાં યોજાનારી બ્રિક્સના ન્યાય મંત્રીઓની બેઠકમાં ઔપચારિક સ્વીકૃતિ માટે રજૂ કરવામાં આવશે.

આ બેઠકમાં ADR સંબંધિત મુદ્દાઓ પર વ્યાપક ચર્ચા કરવા માટે BRICS દેશોના વરિષ્ઠ ન્યાય અધિકારીઓને એકસાથે લાવવામાં આવ્યા હતા. પ્રતિનિધિઓએ સંસ્થાકીય મધ્યસ્થતા, આર્બિટ્રેશનના સુધારાઓ અને વ્યાપારી તેમજ જાહેર ક્ષેત્રના વિવાદોમાં ADR ની ભૂમિકા પર ચર્ચા કરી હતી, જેમાં તેમના સંબંધિત અધિકારક્ષેત્રોમાં અનુભવો, પડકારો અને ઉભરતા પ્રવાહો પર પ્રકાશ પાડ્યો હતો. વ્યાપક અને રચનાત્મક સંવાદ પછી, વરિષ્ઠ અધિકારીઓએ જાહેરનામાના લખાણને આખરી ઓપ આપ્યો હતો, જે મધ્યસ્થતા અને આર્બિટ્રેશનને સુલભ અને અસરકારક સાધનો તરીકે વિસ્તારવા, વ્યાવસાયિક બનાવવા અને મુખ્ય પ્રવાહમાં લાવવા માટે BRICS દેશોની સામૂહિક પ્રતિબદ્ધતાને દર્શાવે છે. પરિણામ BRICS સભ્યોના સ્થિતિસ્થાપક, નવીન અને સહકારી કાનૂની ઇકોસિસ્ટમ બનાવવાના સહિયારા દ્રષ્ટિકોણને પ્રતિબિંબિત કરે છે.

IJ/BS/JD