भारतीय नौदलाचे सागरी संशोधन जहाज ‘आयएनएस सागरध्वनी’ रॉयल मलेशियन नौदलासोबत एक यशस्वी कार्यक्रम पार पाडल्यानंतर 15 मे 2026 रोजी मलेशियातील पोर्ट क्लांग येथून रवाना झाले. या बंदर भेटीमुळे भारतीय नौदल आणि रॉयल मलेशियन नौदल यांच्यात विविध व्यावसायिक आणि वैज्ञानिक संवादांच्या माध्यमातून फलदायी संवाद साधला गेला.

दोन्ही देशांच्या नौदल अधिकाऱ्यांनी आधुनिक जलसर्वेक्षण पद्धती, सागरी पर्यावरण संशोधन आणि सागरी वैज्ञानिक तंत्रज्ञानातील उदयोन्मुख प्रगती यावर आपले विचार मांडले. या कार्यक्रमाचा एक भाग म्हणून, रॉयल मलेशियन नौदलाच्या जलसर्वेक्षण विभागाच्या एका शिष्टमंडळाने जहाजाला भेट दिली. या शिष्टमंडळाला जहाजावरील सागरी प्रणालींची माहिती देण्यात आली. विशेषज्ञ अधिकाऱ्यांमधील विषय तज्ञ आदान-प्रदान (SMEE) कार्यक्रमात डेटा-केंद्रित देखभाल पद्धती, ट्रेंड मूल्यांकन पद्धती, नौवहन सुरक्षा साधने आणि तंत्रज्ञान आधारित निर्णय-सहाय्य यंत्रणा यावरही चर्चा करण्यात आली.

या वास्तव्यादरम्यान, आयएनएस सागरध्वनीच्या कमांडिंग ऑफिसरनी क्वालालंपूर येथे मलेशियातील भारतीय उच्चायुक्तांची भेट घेतली. जहाजाची सुरू असलेली सागरी मोहीम आणि अधिक सखोल वैज्ञानिक सहकार्य यावर त्यांची चर्चा केंद्रित होती.

ही तैनाती भारत आणि मलेशिया यांच्यातील अधिक दृढ होत असलेल्या सागरी संबंधांवर प्रकाश टाकते, तसेच प्रादेशिक सहभाग, ज्ञान विनिमय आणि अधिक घनिष्ठ व्यावसायिक संबंधांप्रति दोन्ही नौदलांच्या सामायिक वचनबद्धतेची पुष्टी करते.

***

माधुरी पांगे/श्रद्धा मुखेडकर/परशुराम कोर

*** 

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 2261770) अभ्यागत कक्ष : 6