سائنس و ٹیکنالوجی، ارضیاتی سائنسز، وزیر اعظم کے دفتر، عملہ، عوامی شکایات، پنشن، ایٹمی توانائی اور خلا کے مرکزی وزیر مملکت (آزادانہ چارج) جتیندر سنگھ نے بنارس ہندو یونیورسٹی (بی ایچ یو) کا دورہ کیا اور محکمہ سائنس و ٹیکنالوجی، حکومت ہند کے تعاون سے قائم بین شعبہ جاتی سہولت ”ساتھی“ کا معائنہ کیا۔

وزیر موصوف نے وائس چانسلر پروفیسر اے کے چترویدی اور فیکلٹی کو مبارکباد پیش کرتے ہوئے کہا کہ انہوں نے دوسروں کے لیے ایک کامیاب مثال قائم کی ہے۔

ڈاکٹر جتیندر سنگھ نے کہا کہ محکمہ سائنس و ٹیکنالوجی (ڈی ایس ٹی) ملک بھر کی یونیورسٹیوں اور اعلیٰ تعلیمی اداروں میں سائنسی بنیادی ڈھانچے اور تحقیقی معاونتی نظام کو وسعت دے رہا ہے تاکہ جدید ٹیکنالوجی، اختراع اور سائنسی سہولیات تک رسائی کو جمہوری بنایا جا سکے۔

وزیر نے کہا کہ ساتھی، ایف آئی ایس ٹی، اے آر آر ایف سے منسلک تحقیقی معاونتی نظام اور دیگر ادارہ جاتی پروگرام جیسے اقدامات تحقیق، اختراع، اسٹارٹ اپ اور صنعت و تعلیمی اداروں کے اشتراک پر مبنی ایک مضبوط نظام کی تشکیل میں مدد دے رہے ہیں، خاص طور پر نوجوان محققین، ایم ایس ایم ای اور ابھرتے ہوئے اداروں کے لیے۔

ڈاکٹر جتیندر سنگھ نے کہا کہ ڈی ایس ٹی کے آؤٹ ریچ پروگرام ملک بھر میں جدید سائنسی بنیادی ڈھانچے اور تکنیکی تعلیم تک وسیع تر رسائی پیدا کر رہے ہیں، جس کے لیے یونیورسٹیوں اور تحقیقی اداروں میں اختراعی نظام کو مضبوط بنایا جا رہا ہے۔ انہوں نے کہا کہ کئی یونیورسٹیوں اور کالجوں کو خلا سے متعلق تجربہ گاہوں اور تحقیقی پروگراموں کے ذریعے بھی منسلک کیا جا رہا ہے تاکہ طلبہ اور نوجوان محققین میں سائنسی مزاج، اختراع پر مبنی تعلیم، اور ابھرتی ہوئی ٹیکنالوجیز کی صلاحیتوں کو فروغ دیا جا سکے۔

ڈاکٹر جتیندر سنگھ نے بنارس ہندو یونیورسٹی (بی ایچ یو) میں واقع سوفِسٹی کیٹڈ اینالیٹیکل اینڈ ٹیکنیکل ہیلپ انسٹی ٹیوٹ (ساتھی) کا دورہ کیا اور ادارے کے بنیادی ڈھانچے، تجزیاتی صلاحیتوں، کامیابیوں اور مستقبل کے لائحۂ عمل سمیت اس سہولت کا جامع جائزہ لیا۔ دورے کے دوران وزیر کو مرکز کے کام کاج کے بارے میں بریفنگ دی گئی اور انہوں نے ادارے میں نصب اہم سائنسی آلات اور جدید تجزیاتی سہولیات کا بھی معائنہ کیا۔

اس دورے کے موقع پر محکمۂ سائنس و ٹیکنالوجی، بنارس ہندو یونیورسٹی کے سینیئر حکام، سائنس دان، فیکلٹی اراکین اور ساتھی مرکز کے نمائندگان بھی موجود تھے۔

ساتھی-بی ایچ یو کو محکمہ سائنس و ٹیکنالوجی کی جانب سے تقریباً 72 کروڑ روپے کی معاونت سے ایک قومی سطح کی مشترکہ سائنسی بنیادی ڈھانچہ جاتی سہولت کے طور پر قائم کیا گیا ہے، جو تعلیمی اداروں، تحقیقی مراکز، صنعتوں، ایم ایس ایم ای اور اسٹارٹ اپ کو جدید آلات، تجزیاتی خدمات اور تکنیکی مہارت تک رسائی فراہم کرتی ہے۔ یہ سہولت یونیورسٹی کے نظام کے اندر سیکشن 8 کمپنی ماڈل کے تحت کام کرتی ہے اور ایک اہم کثیر شعبہ جاتی تجزیاتی و تحقیقی معاونتی مرکز کے طور پر ترقی کر چکی ہے۔

وزیر نے کہا کہ یونیورسٹیوں میں سائنسی بنیادی ڈھانچے کو مضبوط بنانا آتم نربھر بھارت کے وژن کو حقیقت بنانے اور بھارت کو ابھرتی ہوئی ٹیکنالوجیز اور جدید تحقیقی شعبوں میں عالمی سطح پر مسابقتی بنانے کے لیے ضروری ہے۔ انہوں نے کہا کہ وزیرِ اعظم نریندر مودی کی قیادت میں حکومت مسلسل ادارہ جاتی تحقیقی صلاحیت، مقامی اختراع اور ٹیکنالوجی پر مبنی ترقی کی حوصلہ افزائی کر رہی ہے، جس کے لیے ہدفی سائنسی مداخلتوں اور اشتراکی تحقیقی پلیٹ فارموں کو فروغ دیا جا رہا ہے۔

ڈاکٹر جتیندر سنگھ کو بتایا گیا کہ ساتھی-بی ایچ یو میں کئی جدید ترین سہولیات موجود ہیں، جن میں لائیو سیل امیجنگ کے ساتھ سپر ریزولوشن کنفوکل مائیکروسکوپی، جدید این ایم آر اسپیکٹروسکوپی نظام، ہائی ریزولوشن ایکیوریٹ ماس اسپیکٹرو میٹری، کلین روم سہولیات، الیکٹرو کیمیکل ورک اسٹیشن، کرومیٹوگرافی پلیٹ فارم اور آئیسوٹوپ تجزیاتی نظام شامل ہیں۔ یہ سہولیات لائف سائنسز، فارماسیوٹیکلز، صحت، سیمی کنڈکٹر، فوڈ سائنسز، ماحولیاتی سائنسز، بایوٹیکنالوجی اور جدید مواد سے متعلق تحقیق میں معاون ثابت ہو رہی ہیں۔

وزیر کو یہ بھی بتایا گیا کہ مرکز اپنے قیام کے بعد سے اب تک تعلیمی اداروں، تحقیقی تنظیموں اور صنعتوں سے وابستہ تقریباً 1,100 صارفین کو خدمات فراہم کر چکا ہے، 30,000 سے زائد نمونوں کا تجزیہ کر چکا ہے، اور تقریباً 1,000 محققین اور متعلقہ فریقین کو تربیت دے چکا ہے۔ صلاحیت سازی اور صارفین میں آگاہی کے لیے تقریباً 60 مختصر مدتی تربیتی پروگرام بھی منعقد کیے جا چکے ہیں۔

وزیر نے ساتھی-بی ایچ یو کی جانب سے این اے بی ایل منظوری حاصل کرنے اور صنعت و تحقیقی شعبوں کے مضبوط اشتراک کے ساتھ ایک پائیدار تجزیاتی خدماتی ماڈل تیار کرنے کی کوششوں کو سراہا۔ اس سہولت نے اعلیٰ اثرات والی تحقیقی اشاعتوں، پیٹنٹ اور قومی تجربہ گاہوں و صنعتی شراکت داروں کے ساتھ اشتراکی روابط میں بھی اہم کردار ادا کیا ہے، جس سے سائنس، اختراع اور معاشی ترقی کے درمیان تعلق مزید مضبوط ہوا ہے۔

************

ش ح۔ ف ش ع

                                                                                                                                       U: 6877

(ریلیز آئی ڈی: 2259583) وزیٹر کاؤنٹر : 7