قومی انسانی حقوق کمیشن(این ایچ آرسی)انڈیا نے سال 2025 کے لیے انسانی حقوق پرمبنی مختصر فلموں کے اپنے ’’گیارہویں سالانہ مقابلے‘‘ کے سات فاتحین کا اعلان کیا۔

مکمل کمیشن کے جیوری پینل نے پہلی پوزیشن کے لیے فلم ’’رانی‘‘ کا انتخاب کیا ہے، جس کو دو لاکھ روپے نقد انعام بھی دیا جائے گا۔ اتر پردیش کی محترمہ ساریکا جین کی بنائی گئی یہ فلم نہایت مؤثر انداز میں دکھاتی ہے کہ فرسودہ سماجی تصورات طبقاتی تقسیم اور عدم مساوات کو فروغ دیتے ہیں۔ یہ فلم گھریلو ملازم خواتین کی جدوجہد اور ان کے انسانی حقوق سے متعلق مسائل کو ایک نوجوان خاتون کے انقلابی نقطۂ نظر سے پیش کرتی ہے۔ یہ فلم ہندی زبان میں ہے جبکہ اس کے ذیلی عنوانات انگریزی میں ہیں۔

کیرالہ کے جناب امل ایس کی فلم ’’مین وائل شی۔۔‘‘ کو دوسری پوزیشن کے لیے منتخب کیا گیا ہے، جس کے تحت ڈیڑھ لاکھ روپے کا انعام دیا جائے گا۔ یہ فلم صنفی تعصبات اور گھریلو تشدد جیسے چیلنجوں کے درمیان کام کرنے والی خواتین پر پڑنے والے غیر مساوی بوجھ کے مسئلے کو اجاگر کرتی ہے۔ یہ فلم ملیالم زبان میں ہے جبکہ اس کے سب ٹائٹلز انگریزی میں ہیں۔

تمل ناڈو کے جناب سائی ششانک تاتی کی فلم ’’دی ڈلیوری‘‘ کو ایک لاکھ روپے کے تیسرے انعام کے لیے منتخب کیا گیا ہے۔ یہ فلم ایک لڑکے کی دل کو چھو لینے والی کہانی کے ذریعے گِگ ورکرز کی جدوجہد، جیسے ملازمت کا عدم تحفظ، سخت کام کے حالات اور سماجی تحفظ کی کمی کو پیش کرتی ہے۔ یہ فلم تمل زبان میں ہے جبکہ اس کے سب ٹائٹلز انگریزی میں ہیں۔

کمیشن نے ’’خصوصی تذکیری سند‘‘ کے لیے منتخب کی گئی چار مختصر فلموں میں سے ہر ایک کو پچاس ہزار روپے نقد انعام دینے کا بھی فیصلہ کیا ہے۔ یہ فلمیں درج ذیل ہیں:

i) ’’مالتی‘‘ مغربی بنگال کی محترمہ فالگنی بھکت کی بنائی ہوئی فلم ہے۔ یہ دستاویزی فلم بنگالی زبان میں ہے جبکہ اس کے سب ٹائٹلز انگریزی میں ہیں۔ فلم ایک قبائلی خاتون کی جانب سے اپنے سماج کے بچوں کو تعلیم دینے کی رضاکارانہ کوششوں اور تعلیم کی اہمیت کو پیش کرتی ہے۔

ii) ’’سیکنڈ چانس‘‘ اتر پردیش کے جناب روی کرنوال کی تیار کردہ دستاویزی فلم ہے۔ یہ فلم اتراکھنڈ کی ایک جیل پر مبنی ہے۔ فلم ہندی زبان میں ہے جبکہ اس کے سب ٹائٹلز انگریزی میں ہیں۔ یہ فلم قیدیوں کو مشاورت، بازآبادکاری اور مناسب ہنر مندی کی تربیت کے ذریعے نئی زندگی دینے میں جیل اصلاحات کی اہمیت کو اجاگر کرتی ہے۔

iii) ’’ڈسک آف لائف‘‘ مہاراشٹر کے جناب دامودر ڈی پاور کی بنائی ہوئی فلم ہے۔ یہ فلم مراٹھی زبان میں ہے جبکہ اس کے سب ٹائٹلز انگریزی میں ہیں۔ یہ دستاویزی فلم ایک بے اولاد معمر قبائلی جوڑے کی زندگی کے مسائل، ان کی ثابت قدمی، وقار کے ساتھ زندگی گزارنے اور روزگار کے حق کو پیش کرتی ہے۔

iv) ’’بھاگیہ شری‘‘ مہاراشٹر کے جناب منوج اپپاسو جانویکر کی بنائی ہوئی فلم ہے۔ یہ فلم مراٹھی زبان میں ہے جبکہ اس کے سب ٹائٹلز انگریزی میں ہیں۔ یہ فلم دیہی خاندانوں میں نوجوان بیواؤں کو درپیش مشکلات اور باوقار زندگی گزارنے کے ان کے حق کو اجاگر کرتی ہے۔

مکمل کمیشن کے جیوری پینل کی صدارت این ایچ آر سی کے چیئرمین جسٹس جناب وی راماسبرامنیم نے کی۔ اس میں رکن جسٹس ڈاکٹر بدیوت رنجن سارنگی، محترمہ وجیا بھارتی سیانی، سیکریٹری جنرل جناب بھرت لال، رجسٹرار (قانون) جناب جوگیندر سنگھ، جوائنٹ سیکریٹری جناب سمیر کمار اور محترمہ  سیندی گپوئی چھکچھواک شامل تھے۔

این ایچ آر سی مختصر فلم ایوارڈ کا آغاز سال 2015 میں اس مقصد کے تحت کیا گیا تھا کہ شہریوں کو انسانی حقوق کے تحفظ اور فروغ سے متعلق مسائل اجاگر کرنے، بیداری پھیلانے اور تخلیقی کردار ادا کرنے کی ترغیب دی جا سکے۔ سال 2025 کے مقابلے میں ملک کے مختلف حصوں سے ہندی اور انگریزی سمیت تقریباً چوبیس زبانوں اور بولیوں میں مجموعی طور پر پانچ سو چھبیس مختصر فلمیں موصول ہوئیں۔ ان میں سے قواعد و ضوابط پر پورا اترنے والی چار سو اڑتیس فلموں کو ایوارڈ کے لیے زیر غور لایا گیا۔

ان فلموں کا انتخاب تین مرحلوں پر مشتمل جیوری عمل کے ذریعے کیا گیا۔ پہلے مرحلے میں تین پینلوں نے 48فلموں کو شارٹ لسٹ کیا۔ اس کے بعد دوسرے مرحلے کی جیوری، جس کی صدارت این ایچ آر سی کی رکن محترمہ وجیا بھارتی سیانی نے کی، نے بیس فلموں کو شارٹ لسٹ کیا۔ آخری مرحلے میں مکمل کمیشن کے جیوری پینل نے سات فاتحین کا انتخاب کیا۔ ایوارڈ تقسیم کی تقریب بعد میں منعقد کی جائے گی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔ ع ح۔ع د)

U. No.6795