محکمہ مالیاتی خدمات کی جانب سے آج نئی دہلی کے وگیان بھون میں ڈیبٹ ریکوری اپیلیٹ ٹریبونلز (ڈی آر اے ٹی) کے چیئرمین اور ڈیبٹ ریکوری ٹریبونلز (ڈی آر ٹی) کے پریزائیڈنگ افسران کا ایک اجلاس منعقد کیا گیا۔ محکمہ مالیاتی خدمات کے سکریٹری  نے شرکاء سے خطاب کیا، جن میں محکمہ کے سینئر افسران، سرکاری و نجی شعبے کے بینکوں کے نمائندے اور انڈین بینکس ایسوسی ایشن کے اراکین شامل تھے۔مذاکرات کا اہم مرکز زیر التواء مقدمات کی تعداد میں کمی لانا اور ان کے فیصلے کے عمل کو تیز کرنا تھا۔ استعداد کار میں اضافے اور ہدف بند تربیتی پروگراموں کے ذریعے بنیادی ڈھانچے کو مضبوط بنانے پر نئے زور کے باعث ڈیبٹ ریکوری  ٹریبونلز (ڈی آر ٹی) میں ماہانہ تصفیہ کی شرح میں حوصلہ افزا اضافہ دیکھا گیا ہے۔ ٹریبونلز پر زور دیا گیا کہ وہ بہتر کارکردگی دکھانے والی ڈیبٹ ریکوری  ٹریبونلز (ڈی آر ٹی) کی بہترین عملی مثالوں کو اپنائیں۔

محکمہ مالیاتی خدمات (ڈی ایف ایس) کی طرف سے  ڈیبٹ ریکوری  اپیلیٹ ٹریبونلز (ڈی آر اے ٹی) کے چیئرمین اور ڈیبٹ ریکوری  ٹریبونلز (ڈی آر ٹی) کے پریزائیڈنگ افسران کے باقاعدہ اجلاس مسلسل منعقد کیا جاتا رہا ہے، جو پالیسی پر بات چیت، اصلاحات اور کارکردگی میں بہتری کے لیے اہم پلیٹ فارم کی حیثیت رکھتے ہیں۔ان نشستوں سے  خیالات کے تعمیری تبادلے کو فروغ ملا  ہے، جن میں سے متعدد تجاویز ٹریبونلز کے نظامِ کار میں بہتری کی صورت میں سامنے آئی ہیں۔ ان اجلاسوں کے ذریعے مختلف ٹریبونلز کے درمیان بہترین طریقۂ کار کے تبادلے کو بھی ممکن بنایا گیا، جس سے انہیں کامیاب نمونے اپنانے کی ترغیب ملی۔

 محکمہ مالیاتی خدمات (ڈی ایف ایس)  کے سکریٹری نے ٹریبونلز کے طریقۂ کار کو ہموار بنانے کے لیے ڈیجیٹل نظام کو مزید گہرا اور مؤثر بنانے پر محکمہ کی حکمتِ عملی پر زور دیا۔اہم موضوعات میں بینکوں کے اندر نگرانی اور مانیٹرنگ کے نظام کو مضبوط بنانا تاکہ ڈیبٹ ریکوری  ٹریبونلز (ڈی آر ٹی) کے ذریعے  قرض کی وصولیوں میں اضافہ ہو سکے، بہتر نتائج کے لیے زیادہ مالیت والے مقدمات کو ترجیح دینا، جلد فیصلوں کے لیے لوک عدالتوں کو متبادل حل کے مؤثر نظام کے طور پر استعمال کرنا، مقدمات کے جلد تصفیے کے لیے طریقۂ کار میں اصلاحات کو فروغ دینا، اور جامع استعداد کار پروگرام شروع کرنا شامل تھے۔ ان اقدامات میں پریزائیڈنگ افسران، رجسٹرار، اسسٹنٹ رجسٹرار، ریکوری افسران اور دیگر عملہ کے لیے منظم تربیتی پروگرام بھی شامل ہیں۔ٹریبونلز میں زیر التوا مقدمات کے مسئلے کے حل کے لیے یہ تجویز بھی  دی گئی کہ پرانے اور نئے دونوں قسم کے مقدمات میں مصالحت کے قابل معاملات کی نشاندہی کی جائے۔

ٹیکنالوجی کے محاذ پر لازمی ای-فائلنگ، ہائبرڈ سماعت کی سہولت، اور ای-ڈی آر ٹی 2.0 کے تحت مسلسل بہتری کے اقدامات سے کارکردگی اور شفافیت میں اضافہ ہو رہا ہے۔ شرکاء کی اس بات پر حوصلہ افزائی کی گئی کہ وہ ان تکنیکی سہولیات سے زیادہ سے زیادہ فائدہ اٹھائیں۔نئے انداز میں تیار کردہ بانک نیٹ ای-نیلامی پلیٹ فارم کے ذریعے اثاثوں کی بہتر نمائش اور ان کی مناسب قدر حاصل کرنے میں بھی مدد مل رہی ہے۔

محکمہ مالیاتی خدمات (ڈی ایف ایس) ایک مضبوط، شفاف اور مؤثر عدالتی نظام کی فراہمی کے لیے اپنے عہد  پر مسلسل قائم ہے۔

***

(ش ح۔ م ش ع ۔ م ا)

U.no-6574

(ریلیز آئی ڈی: 2257569) وزیٹر کاؤنٹر : 12