વર્તમાન ઉનાળાની ઋતુ દરમિયાન ચાલી રહેલી હીટવેવની સ્થિતિ અને સામાન્યથી વધુ તાપમાનને ધ્યાનમાં રાખીને, NHAIએ કર્મચારીઓના સ્વાસ્થ્યનું રક્ષણ કરવા અને હીટવેવ દરમિયાન રાષ્ટ્રીય ધોરીમાર્ગ વપરાશકર્તાઓની સુરક્ષા સુનિશ્ચિત કરવાના હેતુથી સાવચેતીના પગલાં ફરજિયાત કરતી વ્યાપક માર્ગદર્શિકા બહાર પાડી છે. આ માર્ગદર્શિકા NHAIના અધિકારક્ષેત્ર હેઠળના બાંધકામ સ્થળો, જાળવણી કાર્ય અને ટોલ પ્લાઝા માટે ફરજિયાત સુરક્ષા પ્રોટોકોલની રૂપરેખા આપે છે. સ્ટાફ અને કામદારોની સુખાકારી સુનિશ્ચિત કરવા માટે તમામ કોન્ટ્રાક્ટરો, કન્સેશનર્સ અને ટોલ વસૂલાત એજન્સીઓ દ્વારા શ્રેષ્ઠ પદ્ધતિઓ પર આધારિત સુરક્ષા પગલાં તાત્કાલિક લાગુ કરવામાં આવશે.

બાંધકામ અને જાળવણી પ્રોજેક્ટ્સ માટેની માર્ગદર્શિકા

NHAIએ કોન્ટ્રાક્ટરો અને કન્સેશનર્સને કામદારો માટે કામના કલાકોમાં ફેરફાર કરવા સૂચના આપી છે જેથી બપોરે 12:00 PM થી 4:00 PM સુધીના પીક હીટ કલાકો ટાળી શકાય. વધુ શ્રમ માંગતી અને ગરમી પેદા કરતી પ્રવૃત્તિઓ જેવી કે ડામર પાથરવો, વેલ્ડીંગ વગેરે વહેલી સવારના અથવા મોડી સાંજના કલાકો દરમિયાન હાથ ધરવાની રહેશે. અતિશય ગરમીના એલર્ટ દરમિયાન વધેલી આવૃત્તિ સાથે નિયમિત અંતરાલે ફરજિયાત કૂલિંગ બ્રેક (વિરામ) લેવાનું નિર્ધારિત કરવામાં આવ્યું છે.

કામદારોના અનુકૂલન પર વિશેષ ભાર મૂકવામાં આવ્યો છે, જે એ સુનિશ્ચિત કરે છે કે નવા અથવા પરત ફરતા કર્મચારીઓને 3-5 દિવસના સમયગાળા દરમિયાન ધીમે-ધીમે સખત કાર્યોમાં સંપર્ક કરાવવામાં આવે. કામદારોને હીટસ્ટ્રોક સહિત ગરમી સંબંધિત બિમારીઓ અથવા સ્વાસ્થ્ય સમસ્યાઓને ઓળખવા અને તેનો પ્રતિસાદ આપવા માટે પણ તાલીમ આપવામાં આવશે.

સ્થળ પર પૂરતો સહયોગ સુનિશ્ચિત કરવા માટે, યોગ્ય વેન્ટિલેશન સાથેના કામચલાઉ છાયડાવાળા આરામ વિસ્તારોની સાથે ઠંડા અને પીવાલાયક પાણીની અવિરત પહોંચ પૂરી પાડવાની રહેશે. ફર્સ્ટ-એઇડ સ્ટેશનો, પેટ્રોલિંગ વાહનો અને સાઇટ સુપરવાઇઝરોએ ઓરલ રીહાઇડ્રેશન સોલ્ટ્સ (ORS) અને ગ્લુકોઝનો સ્ટોક રાખવો જરૂરી છે. બાંધકામ સ્થળો પર સુરક્ષા સાધનો પહેરવાનું પાલન ફરજિયાત હોવા છતાં, શ્વાસ લઈ શકાય તેવા સુતરાઉ હાઈ-વિઝિબિલિટી વેસ્ટના ઉપયોગની સલાહ આપવામાં આવી છે.

ઇમરજન્સીની તૈયારીઓને પણ મજબૂત કરવામાં આવી છે. NHAI પેટ્રોલિંગ એમ્બ્યુલન્સ આઇસ પેક, ઠંડુ પાણી અને IV પ્રવાહીથી સજ્જ હોવી જોઈએ. રૂટ પેટ્રોલિંગ યુનિટ્સને હીટ-સંબંધિત સમસ્યાઓ અને ઓવરહિટીંગને કારણે વાહન બ્રેકડાઉનનો સામનો કરી રહેલા હાઇવે વપરાશકર્તાઓને સહાય કરવા માટે દેખરેખની આવૃત્તિ વધારવા સૂચના આપવામાં આવી છે.

ટોલ પ્લાઝા અને સંચાલન માટેની માર્ગદર્શિકા    

ટોલ કામગીરી માટે, NHAI એ ઓપ્ટિમાઇઝ શિફ્ટ મેનેજમેન્ટ અને રોટેશનલ રોસ્ટર્સ દ્વારા સવારે 11:00 AM થી 3:00 PM સુધીના પીક હીટ કલાકો દરમિયાન કર્મચારીઓના આઉટડોર એક્સપોઝરને ઘટાડવાની સલાહ આપી છે. વહીવટી અને જાળવણી સંચાલન પ્રવૃત્તિઓ કે જેમાં પીક-અવર લેન હાજરીની જરૂર નથી, તેના માટે રાત્રિના કલાકોનો અસરકારક ઉપયોગ કરવામાં આવશે. ટોલ પ્લાઝા સ્ટાફને સ્ટાફ અને મુસાફરોને મદદ કરવા માટે ગરમી સંબંધિત સ્વાસ્થ્ય પરિસ્થિતિઓને ઓળખવા અને પ્રતિસાદ આપવા માટે પણ તાલીમ આપવામાં આવશે.

સાથે જ, ટોલ બૂથ, આરામ વિસ્તારો અને ઓફિસ બ્લોકમાં એર-કંડિશનિંગ ધરાવતા કૂલિંગ રૂમ બનાવવામાં આવશે. લેન પાસે અને ખુલ્લા વિસ્તારોમાં કામ કરતા કર્મચારીઓને છાયડો પૂરો પાડવા માટે કામચલાઉ શેડ અને યોગ્ય છાયા માટેની સુવિધા સ્થાપિત કરવામાં આવશે. આ ઉપરાંત, તમામ ટોલ સ્થાનો પર ORS અને ગ્લુકોઝની સાથે ઠંડા પીવાના પાણીની સતત ઉપલબ્ધતા ફરજિયાત બનાવવામાં આવી છે. પાલન સુનિશ્ચિત કરવા માટે, NHAI ફીલ્ડ અધિકારીઓ પ્રોજેક્ટ સાઇટ્સ અને ટોલ પ્લાઝા પર સાપ્તાહિક નિરીક્ષણ કરશે.

આ પગલાં રાષ્ટ્રીય ધોરીમાર્ગના નિર્માણ અને કામગીરીને અવિરત સુનિશ્ચિત કરવાની સાથે હીટવેવની અસરોને ઘટાડવામાં મદદ કરશે. NHAI દેશભરમાં કાર્યબળની સુખાકારી અને રાષ્ટ્રીય ધોરીમાર્ગ વપરાશકર્તાઓની સુરક્ષાને પ્રાથમિકતા આપવા માટે પ્રતિબદ્ધ છે.

 

SM/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(રીલીઝ આઈડી: 2256524) મુલાકાતી સંખ્યા : 33