مرکزی وزیر تعلیم نے آج این آئی ٹی کروکشیتر اور آئی آئی ای ایس ٹی شب پور سے متعلق امور اور اعلیٰ تعلیمی اداروں میں طلبہ کی مجموعی فلاح و بہبود پر ایک اعلیٰ سطحی جائزہ اجلاس کی صدارت کی۔ اجلاس میں چیئرپرسن، بورڈ آف گورنرز، این آئی ٹی کروکشیتر؛ سیکرٹری (اعلیٰ تعلیم)؛ اور وزارت کے دیگر اعلیٰ حکام نے شرکت کی۔

اہم مباحثہ اجلاس میں ان اداروں کے تعلیمی ماحول، کیمپس کی زندگی اور ہاسٹل کے انتظام کا تفصیلی جائزہ لیا گیا۔ یہ مشاہدہ کیا گیا کہ کیمپس کو متحرک بنانے اور طلبہ کی مثبت شمولیت کے نظام کو مضبوط کرنے کے لیے فوری اقدامات کی ضرورت ہے۔ وزیر موصوف نے مداخلت کے لیے مخصوص موضوعات کی نشاندہی پر زور دیا جن میں طلبہ کی شمولیت، فیکلٹی کی واقفیت، سابق طلبہ کا تعاون، تعلیمی مدد، اختراعی کلچر، ہاسٹل کی حکمرانی، کھیلوں کی ثقافت اور کیمپس کا مجموعی انتظام شامل ہے۔ فیکلٹی کی بھرتی کو معیاری بنانے، بورڈ آف گورنرز میں فیکلٹی کی حساس اور فعال نمائندگی کو یقینی بنانے اور مناسب وقت دینے والی مثالی شخصیات کو بطور چیئرپرسن بورڈ آف گورنرز مقرر کرنے کی ضرورت پر بھی تبادلہ خیال کیا گیا۔

ادارے کے مجموعی انتظامی اور تعلیمی مسائل کے حوالے سے وزارت نے 29 مارچ 2026 کو این آئی ٹی ایس ای آر ایکٹ 2007 کے تحت این آئی ٹی کروکشیتر کے کام، پیشرفت، گورننس اور مجموعی کام کاج کا جائزہ لینے کے لیے ایک اعلیٰ سطحی کمیٹی تشکیل دی تھی۔ پروفیسر انل سہسربدھے (چیئرمین، این ای ٹی ایف و سابق چیئرمین، اے آئی سی ٹی ای)، جناب ایم مدن گوپال، آئی اے ایس (ریٹائرڈ) (چیئرپرسن، بورڈ آف گورنرز، وی این آئی ٹی ناگپور) اور پروفیسر کے کے شکلا (ڈائریکٹر، ایم اے این آئی ٹی بھوپال) پر مشتمل اس کمیٹی کو تعلیمی اور انتظامی کارکردگی، بھرتی اور شکایات سے متعلق مسائل اور این آئی آر ایف رینکنگ جیسے ادارہ جاتی اشاریوں کا جائزہ لینے کا کام سونپا گیا ہے۔ کمیٹی ان مسائل کی جانچ کر رہی ہے اور امکان ہے کہ وہ جلد ہی اپنی رپورٹ پیش کر دے گی۔

سیکرٹری (اعلیٰ تعلیم) کی قیادت میں ایک وفد نے 24 اپریل 2026 کو این آئی ٹی کروکشیتر کا دورہ بھی کیا اور متعلقہ فریقین سے بات چیت کی۔ اسی دن این آئی ٹی کے معزز وزیٹر نے ڈائریکٹر، این آئی ٹی کروکشیتر کا استعفیٰ قبول کر لیا اور ادارے کے اس وقت کے انچارج رجسٹرار کو بھی فوری طور پر معطل کر دیا گیا۔

طلبہ دوست کیمپس کو یقینی بنانے کے لیے کئے گئے فیصلے:

الف۔ فوری اقدامات

• ہاسٹل کی تجدید کاری: ہاسٹل کی سہولیات میں فوری بہتری۔
• فیکلٹی کی تجدید کاری: مئی-جون 2026 کے دوران فیکلٹی کے لیے ایک منظم تربیتی پروگرام منعقد کیا جائے گا جس میں کیمپس کی زندگی، بشمول طلبہ کی رہنمائی، فلاح و بہبود، تعلیمی مدد اور مثبت کیمپس کلچر پر توجہ دی جائے گی، جس کے واضح نتائج جولائی 2026 تک متوقع ہیں۔
• طلبہ کی شمولیت کے لیے ایس او پیز: تعلیمی اور دیگر شعبوں میں طلبہ کی شمولیت اور اختراع کو ادارہ جاتی شکل دینے کے لیے معیاری طریقہ کار (ایس او پیز) وضع کیے جائیں گے۔

ب۔ درمیانی مدت کے اقدامات

• کھیل اور تفریح: کھیلوں کی مناسب سہولیات کو یقینی بنایا جائے گا اور ہمہ جہت ترقی کے لیے باقاعدہ مقابلوں کا انعقاد کیا جائے گا۔
• صلاحیت سازی: فیکلٹی اور تعلیمی منتظمین کے لیے ایک معاون ادارہ جاتی کلچر بنانے کے لیے منظم پروگرامز۔
• سابق طلبہ کی شمولیت: کیمپس میں سابق طلبہ کے ساتھ قائدانہ گفتگو اور سرگرمیوں کا انعقاد تاکہ اختراع، انٹرپرینیورشپ، مسائل کے حل اور "ہم کر سکتے ہیں" والے کلچر کو فروغ دیا جا سکے۔

وزارت تعلیم کے تحت تمام اعلیٰ تعلیمی اداروں کے لیے اقدامات

• کیمپس کلچر پر اعلیٰ کمیٹی: اعلیٰ تعلیمی اداروں کے ڈائریکٹرز، نامور سابق طلبہ، فیکلٹی اور طلبہ پر مشتمل ایک کمیٹی تشکیل دی جائے گی جو ایک متحرک اور طلبہ دوست کیمپس کے لیے اقدامات تجویز کرے گی اور ان کی نگرانی کرے گی۔
• جامع فریم ورک: وزارت اعلیٰ تعلیمی اداروں میں تعلیمی اور بنیادی ڈھانچے کے مسائل کو حل کرنے کے لیے ایک فریم ورک تیار کرے گی، جس کی توجہ طلبہ کی فلاح و بہبود اور ادارہ جاتی ماحول پر ہوگی۔
• کھیلوں کا فروغ اور بنیادی ڈھانچہ: کھیلوں کی ثقافت کو فروغ دینے اور ترجیحی بنیادوں پر تعلیمی بلاکس، لیبز، لائبریریوں، ہاسٹلز، میس اور تفریحی کلبوں کے جائزے اور ان کی بہتری کے لیے مربوط کوششیں کی جائیں گی۔

حکومت ہندوستان ملک بھر میں ایک تجدید شدہ، اپ گریڈ شدہ اور طلبہ دوست کیمپس کلچر کو یقینی بنانے کے لیے پرعزم ہے۔

***

ش ح ۔   م  د ۔  م  ص

U : 6428

(ریلیز آئی ڈی: 2256392) وزیٹر کاؤنٹر : 8