بھارت سرکار کی ماہی پروری، مویشی پروری اور ڈیری کی وزارت  کے محکمہ ماہی پروری کے سکریٹری ڈاکٹر ابھیلکش لکھی نے ایک اعلیٰ سطحی وفد کی قیادت کی، جس نے 27 سے 30 اپریل 2026 تک تھائی لینڈ کے ہوا ہین (Hua Hin) میں منعقدہ پانچویں عالمی سمال اسکیل فشریز کانگریس  میں شرکت کی۔ یہ کانگریس فوڈ اینڈ ایگریکلچر آرگنائزیشن (FAO) اور ٹی بی ٹی آئی گلوبل (TBTI Global) کے زیر اہتمام منعقد کی جا رہی ہے۔ پانچویں عالمی سمال اسکیل فشریز کانگریس کا مرکزی موضوع ’’چھوٹے پیمانے کی ماہی پروری: منصفانہ ہم آہنگی، نوجوانوں کے مستقبل اور تخلیقی دانش کے فروغ کے لیے‘‘ ہے، جس میں ساحلی اور سمندری خطوں میں انصاف اور تنازعات کے حل کو فروغ دینے، ماہی پروری اور سمندری نگہداشت میں نوجوانوں کو بااختیار بنانے، اور روایتی علم پر مبنی ماحولیات دوست اور تخلیقی طریقوں کو فروغ دینے پر توجہ مرکوز کی گئی ہے۔ اس تقریب میں تقریباً 50 ممالک کے 300 مندوبین نے شرکت کی اور اس میں 45 تکنیکی سیشنز شامل ہوں گے۔

 

27 اپریل 2026 کو پانچویں عالمی سمال اسکیل فشریز کانگریس میں اپنے خطاب کے دوران، محکمہ ماہی پروری (MoFAH&D) کے سکریٹری، ڈاکٹر ابھیلکش لکھی نے سماجی و اقتصادی ترقی، خوراک اور غذائی تحفظ، اور ماحولیاتی پائیداری میں چھوٹے پیمانے کی ماہی پروری اور آبی زراعت (aquaculture) کے اہم کردار کو نمایاں کیا۔ انھوں نے دنیا کے دوسرے سب سے بڑے مچھلی پیدا کرنے والے ملک کے طور پر بھارت کے مقام پر زور دیا، جس کی ریکارڈ پیداوار 19.7 ملین ٹن ہے، اور جدید کاری، اختراعات اور مسلسل سرمایہ کاری کے ذریعے سمندری خوراک (seafood) کی برآمدات میں مضبوط ترقی کا ذکر کیا۔ انھوں نے مزید پائیدار اور قابلِ سراغ (traceable) ماہی پروری، ڈیجیٹل تبدیلی اور کمیونٹی پر مبنی طریقوں کے تئیں بھارت کے عزم پر زور دیا، جب کہ خلیج بنگال پروگرام بین الحکومتی تنظیم (BOBP-IGO) کے ذریعے مضبوط علاقائی تعاون کو بھی نمایاں کیا، جس کی صدارت فی الحال بھارت کے پاس ہے۔

محکمہ ماہی پروری (MoFAH&D) کے سکریٹری نے چھوٹے پیمانے کی ماہی پروری کے قومی لائحۂ عمل(NPOA-SSF) پر FAO کے زیرِ اہتمام منعقدہ ایک سیشن میں پینلسٹ کے طور پر بھی شرکت کی، جہاں پائیدار اور جامع چھوٹے پیمانے کی ماہی پروری کے لیے پالیسی فریم ورک کو مضبوط بنانے پر تبادلہ خیال کیا گیا۔ انھوں نے کہا کہ چھوٹے پیمانے کی ماہی پروری غذائی تحفظ، معاش، ثقافتی شناخت اور ساحلی معیشتوں، خاص طور پر خلیج بنگال کے خطے میں، مرکزی حیثیت رکھتی ہے۔ انھوں نے چھوٹے پیمانے کی ماہی پروری کی متنوع اور سیاق و سباق کے لحاظ سے مخصوص نوعیت کو نمایاں کیا، اور ایسے طرزِ حکمرانی کے فریم ورک کی ضرورت پر زور دیا جو مختلف مقامی حقائق کو تسلیم کریں اور ویلیو چین میں پسماندہ گروہوں کی شمولیت کو یقینی بنائیں۔ انھوں نے چھوٹے پیمانے کی ماہی پروری کے قومی لائحۂ عمل(NPOA-SSF) کی تیاری کے لیے BOBP-IGO کے رکن ممالک کی اجتماعی کوششوں کو سراہا اور جامع، کمیونٹی پر مرکوز اور ایکو سسٹم پر مبنی طریقوں کی اہمیت پر زور دیا، نیز اداروں کو مضبوط بنانے، اتفاقِ رائے پیدا کرنے اور ماہی پروری کی پائیدار حکمرانی کو یقینی بنانے کے لیے بتدریج اور شراکتی پالیسی کے عمل پر زور دیا۔

پینل ڈسکشن میں کہا گئی کہ چھوٹے پیمانے کی ماہی پروری کے مؤثر قومی لائحۂ عمل(NPOA-SSF) کا نفاذ چھوٹے ماہی گیروں اور ان کی تنظیموں کی ادارہ جاتی اور تکنیکی صلاحیتوں کو مضبوط بنانے، جامع اور غیر مرکزی (decentralized) مشاورت کو یقینی بنانے، اور مالیات اور بنیادی ڈھانچے تک رسائی کو بہتر بنانے پر منحصر ہے۔ شرکا نے NPOA-SSF کو موجودہ طرزِ حکمرانی کے فریم ورک میں ضم کرنے، بین الوزارتی ہم آہنگی کو فروغ دینے، اور SSF کے اداکاروں کی بامعنی شرکت کو ممکن بنانے کے لیے قومی اسکیموں سے فائدہ اٹھانے پر زور دیا۔ اس عمل کو چھوٹے ماہی گیروں کی آواز کو بلند کرنے اور شراکتی، مساوی، اور پائیدار ماہی پروری کی حکمرانی کو آگے بڑھانے کے لیے ایک کلیدی پلیٹ فارم قرار دیا گیا۔

 

چھوٹے پیمانے کی ماہی پروری (SSF) عالمی کیپچر فشریز (capture fisheries) کی ریڑھ کی ہڈی کی حیثیت رکھتی ہے، جو دنیا کے تقریباً 90 فیصد ماہی گیروں کو روزگار فراہم کرتی ہے اور سمندری اور اندرونِ ملک مچھلیوں کے شکار میں تقریباً 40 فیصد حصہ ڈالتی ہے، جب کہ غذائی تحفظ، غذائیت، غربت کے خاتمے اور صنفی مساوات میں اہم کردار ادا کرتی ہے، خاص طور پر فصل کی کٹائی کے بعد کی سرگرمیوں میں خواتین کی شمولیت کے ذریعے۔ ایشیا میں، جہاں SSF کارکنوں اور صارفین کا سب سے بڑا حصہ ہے، ماہی پروری بنیادی طور پر کثیر الانواع، کثیر آلات (multi-gear) اور خاندانی نوعیت کی ہے، جو لاکھوں ساحلی اور اندرونِ ملک روزگار کو سہارا دیتی ہے۔ اس کے ساتھ ہی، اس شعبے کو ملکیت کے عدم تحفظ (tenure insecurity)، ڈیٹا کی حدود، ساحلی ہجوم، وسائل کی تنزلی، صنعتی ماہی گیری کے ساتھ تنازعات، اور موسمیاتی خطرات جیسے چیلنجز کا سامنا ہے۔ پیداوار سے ہٹ کر اس کی اہمیت کو تسلیم کرتے ہوئے، چھوٹے پیمانے کی ماہی پروری کو بین الاقوامی سطح پر تسلیم کیا گیا ہے، جس میں پائیدار چھوٹے پیمانے کی ماہی پروری کو محفوظ بنانے کے لیے FAO کی رضاکارانہ ہدایات (VGSSF) شامل ہیں، اور پائیدار انتظام، ملکیت کے حقوق اور سماجی تحفظ پر زور دینے کے ساتھ FAO-APFIC اور BOBP-IGO جیسے تعاون کے پلیٹ فارمز کے ذریعے علاقائی طور پر بھی تسلیم کیا گیا ہے۔

بھارت میں، چھوٹے پیمانے کی ماہی پروری (SSF) سمندری ماہی گیری کی سرگرمیوں پر حاوی ہے، جس میں تقریباً 4 ملین سمندری ماہی گیر زیادہ تر 12 ناٹیکل میل تک کے علاقائی پانیوں میں کام کرتے ہیں۔ یہ شعبہ بنیادی طور پر اسٹیٹ میرین فشریز ریگولیشن ایکٹس (MFRAs) کے زیرِ انتظام ہے اور اسے ساحل کے قریب ماہی گیری کے دباؤ، موسمیاتی خطرات اور مارکیٹ کے اتار چڑھاؤ جیسے چیلنجز کا سامنا ہے۔ بھارت میں حالیہ پالیسی کی توجہ ماہی پروری کوآپریٹیوز اور فش فارمر پروڈیوسر آرگنائزیشنز (FFPOs) کے ذریعے اداروں کو مضبوط بنانے پر مرکوز رہی ہے، جس میں پردھان منتری متسیا سمپدا یوجنا (PMMSY) اور EEZ رولز 2025 کے تحت مداخلتوں کی حمایت کی گئی ہے، تاکہ پائیداری اور ماہی گیروں کے روزگار کو بہتر بنایا جا سکے۔

پس منظر

بھارت دنیا کا دوسرا سب سے بڑا مچھلی پیدا کرنے والا ملک ہے، جو عالمی پیداوار میں 8 فیصد حصہ ڈالتا ہے، آبی زراعت (aquaculture) کی پیداوار میں دوسرے نمبر پر ہے، جھینگا (shrimp) کی پیداوار اور برآمد میں سرفہرست ہے، اور کیپچر فشریز میں دوسرا سب سے بڑا پیدا کنندہ ہے۔

بھارت سرکار نے ملک کے اندر ماہی پروری اور آبی زراعت کے شعبے کی جامع ترقی کو فروغ دینے کے مقصد سے تبدیلی کے کئی اقدامات کا افتتاح کیا ہے۔ گذشتہ برسوں کے دوران، اس شعبے کے لیے مختص مرکزی حکومت کی سرمایہ کاری میں نمایاں اضافہ ہوا ہے۔ 2015 میں اس کوشش کے آغاز سے لے کر اب تک، مجموعی طور پر 39,272 کروڑ روپے کی شان دار سرمایہ کاری کو مختلف اسکیموں، یعنی نیلی انقلاب (Blue Revolution)، فشریز اینڈ ایکوا کلچر انفراسٹرکچر ڈیولپمنٹ فنڈ (FIDF)، پردھان منتری متسیا سمپدا یوجنا (PMMSY) اور پردھان منتری متسیا کسان سمردھی سہ-یوجنا (PMMKSSY) کے تحت منظور یا اعلان کیا گیا ہے۔

2014 میں توثیق شدہ پائیدار چھوٹے پیمانے کی ماہی پروری کو محفوظ بنانے کے لیے FAO کی رضاکارانہ ہدایات (VGSSF)، چھوٹے پیمانے کی ماہی پروری کے لیے وقف پہلا عالمی، انسانی حقوق پر مبنی فریم ورک فراہم کرتی ہیں، جو شکار سے لے کر تجارت تک کی پوری ویلیو چین کا احاطہ کرتی ہیں۔ یہ ہدایات غذائی تحفظ، محفوظ ملکیت، صنفی مساوات، ایکو سسٹم پر مبنی انتظام، آفات کے خطرے میں کمی اور موسمیاتی لچک پر زور دیتی ہیں، جس کا قومی نفاذ چھوٹے پیمانے کی ماہی پروری کے قومی لائحۂ عمل(NPOA-SSF) کے ذریعے تصور کیا گیا ہے۔ علاقائی اور بین الاقوامی سطح پر، چھوٹے پیمانے کی ماہی پروری اب بھی بحر ہند ٹونا کمیشن (IOTC) جیسی علاقائی ماہی پروری مینجمنٹ تنظیموں میں کم نمائندگی رکھتی ہے، اس کے باوجود کہ بحر ہند کی ساحلی ماہی پروری میں ان کا غلبہ ہے۔

کثیر جہتی سطح پر، بھارت نے مسلسل WTO فشریز فریم ورک کے اندر روزگار پر مبنی چھوٹے پیمانے کی ماہی پروری کے تحفظ کی ضرورت پر زور دیا ہے، جب کہ IUU (غیر قانونی، غیر رپورٹ شدہ، اور غیر منظم) ماہی گیری اور ضرورت سے زیادہ شکار کیے گئے اسٹاک کے خلاف ضوابط کی حمایت کی ہے اور ترقی پذیر ممالک کے لیے خصوصی اور امتیازی سلوک کی وکالت کی ہے۔ ملکی سطح پر، EEZ رولز، 2025 چھوٹے ماہی گیروں کے اجتماعی گروہوں کو ترجیح دیتے ہیں، روایتی کشتیوں کو رسائی کے پاس (access pass) کی ضروریات سے مستثنیٰ قرار دیتے ہیں، تباہ کن ماہی گیری کے طریقوں پر پابندی لگاتے ہیں، اور ماہی پروری کے انتظامی منصوبوں کو فروغ دیتے ہیں۔ ماہی پروری کوآپریٹیوز اور پروڈیوسر تنظیموں کو مضبوط بنانا، ریگولیٹری اور کمیونٹی پر مبنی اقدامات کے ذریعے IUU ماہی گیری کے اثرات سے نمٹنا، اور ساحلی وسائل پر دباؤ کو کم کرنے اور FAO کے ذمہ دارانہ ماہی پروری کے ضابطہ اخلاق اور اقوام متحدہ کے پائیدار ترقی کے اہداف کے تحت وعدوں کو آگے بڑھانے کے لیے چھوٹے پیمانے کی ماہی پروری کو آبی زراعت، سمندری زراعت (mariculture) اور سمندری گھاس (seaweed) کی کھیتی کے ساتھ مربوط کرنے کے لیے کوششیں کی جا رہی ہیں۔

***

(ش ح – ع ا)

U. No. 6374

 

(ریلیز آئی ڈی: 2256066) وزیٹر کاؤنٹر : 9