قومی صاف گنگا مشن (این ایم سی جی) نے مالی سال 2025–26 کے دوران دریائے گنگا اور اس کی معاون ندیوں کے کنارے سیوریج ٹریٹمنٹ کے بنیادی ڈھانچے کو مضبوط بنانے اور آلودگی میں کمی کے اقدامات میں نمایاں پیش رفت کی ہے۔ اس سال کی کامیابیاں علاجی صلاحیت میں اضافے، اہم منصوبوں کی تکمیل اور مختلف ریاستوں میں آلودگی کے اہم مقامات سے نمٹنے کے لیے ایک مربوط اور مسلسل کوشش کی عکاسی کرتی ہیں۔

مالی سال 2025–26 کے دوران، اتر پردیش، اتراکھنڈ، جھارکھنڈ، مغربی بنگال اور بہار میں 18 منصوبوں کے ذریعے مجموعی طور پر 538.03 ایم ایل ڈی کی اضافی ٹریٹمنٹ صلاحیت شامل کی گئی۔ خاص طور پر، اس سال 28 سیوریج ٹریٹمنٹ پلانٹس (ایس ٹی پی) مکمل کیے گئے، جو پچھلے سال مکمل ہونے والے 22 ایس ٹی پی کے مقابلے میں نمایاں اضافہ ہے۔ ان منصوبوں پر تقریباً 4700 کروڑ روپے کی لاگت آئی، جو گنگا بیسن میں سیوریج کے بنیادی ڈھانچے کو مضبوط بنانے اور آلودگی کم کرنے کے لیے مسلسل کوششوں کو ظاہر کرتی ہے۔

اتر پردیش ان کامیابیوں میں ایک اہم شراکت دار کے طور پر سامنے آیا، جہاں مرادآباد، شکلاگنج، وارانسی، وِرنداون، پریاگ راج اور آگرہ میں متعدد منصوبے نافذ کیے گئے، جس سے ریاست میں سیوریج ٹریٹمنٹ کے بنیادی ڈھانچے کو نمایاں طور پر مضبوطی ملی ہے۔ ان میں وارانسی کے اسی–بی ایچ یو علاقے میں قائم منصوبہ سب سے زیادہ 55 ایم ایل ڈی صلاحیت کے اضافے کا باعث بنا ہے۔ پریاگ راج میں 13 نالوں کی روک تھام اور انحراف کے ساتھ سالوری ایس ٹی پی کی توسیع پر مبنی ایک بڑے منصوبے کے تحت 331.75 کروڑ روپے کی لاگت سے اضافی 43 ایم ایل ڈی صلاحیت پیدا کی گئی ہے۔

اسی بی ایچ یو، وارانسی میں 55 ایم ایل ڈی ایس ٹی پی

اسی بی ایچ یو، وارانسی میں 55 ایم ایل ڈی ایس ٹی پی

 

 

مرادآباد میں بھی نمایاں پیش رفت دیکھنے میں آئی، جہاں دریائے رام گنگا کے لیے آلودگی میں کمی کے اقدامات کے تحت 25 ایم ایل ڈی صلاحیت کا اضافہ کیا گیا، جبکہ کانپور کے شکلاگنج میں انٹرسپشن، ڈائیورژن اور سیوریج ٹریٹمنٹ کے کاموں کے ذریعے 5 ایم ایل ڈی کی اضافی صلاحیت شامل کی گئی۔

 

مرادآباد میں 25 ایم ایل ڈی ایس ٹی پی

شکلا گنج میں 5 ایم ایل ڈی ایس ٹی پی

 

ورنداون میں انٹرسپشن و ڈائیورژن (آئی اینڈ ڈی) اور سیوریج ٹریٹمنٹ پلانٹس (ایس ٹی پی) کے کاموں کے ذریعے مزید 13 ایم ایل ڈی صلاحیت کا اضافہ کیا گیا۔ آگرہ میں بھی ایک نمایاں اضافہ ریکارڈ کیا گیا، جہاں 166 ایم ایل ڈی صلاحیت شامل کی گئی، جس سے ریاست کی مجموعی سیوریج ٹریٹمنٹ صلاحیت میں مزید اضافہ ہوا۔

یہ تمام منصوبے، جن میں ہائبرڈ اینوئٹی ماڈل (ایچ اے ایم) کے تحت نافذ کیے گئے پروجیکٹ بھی شامل ہیں، اتر پردیش بھر میں گندے پانی کے مؤثر انتظام اور دریاؤں کی بحالی کے لیے ایک جامع اور کثیر شہری کوشش کی عکاسی کرتے ہیں۔

 

آگرہ میں 31 ایم ایل ڈی ایس ٹی پی           آگرہ میں 100 ایم ایل ڈی ایس ٹی پی

آگرہ میں 35 ایم ایل ڈی ایس ٹی پی

 

اتراکھنڈ میں اودھم سنگھ نگر، ہریدوار، دہرادون اور مونی کی ریتی کے اہم منصوبوں کے ذریعے گندے پانی کے انتظام میں بہتری لائی گئی۔ اودھم سنگھ نگر کے منصوبے نے متعدد آلودہ دریا ئی حصوں کا احاطہ کرتے ہوئے 10.3 ایم ایل ڈی صلاحیت کا اضافہ کیا، جبکہ دہرادون کے سپیرا بستی منصوبے کے تحت 15 ایم ایل ڈی صلاحیت شامل کی گئی۔ ہریدوار میں جگجیت پور، سرائے، رشی کیش، سری نگر اور دیو پریاگ جیسے مقامات پر چھوٹے مگر اہم غیر مرکزی اقدامات کیے گئے، جن کے ذریعے مجموعی طور پر 0.23 ایم ایل ڈی صلاحیت کا اضافہ ہوا۔ مونی کی ریتی میں مزید 11 ایم ایل ڈی صلاحیت شامل کی گئی، جس سے خطے کے بنیادی ڈھانچے کو مزید مضبوطی ملی۔

 

 

منی کی ریتی میں 8 ایم ایل ڈی ایس ٹی پی                                منی کی ریتی میں 3 ایم ایل ڈی ایس ٹی پی

 

جھارکھنڈ میں بھی مستحکم پیش رفت دیکھنے میں آئی، جہاں فوسرو میں انٹرسپشن و ڈائیورژن (آئی اینڈ ڈی) اور سیوریج ٹریٹمنٹ پلانٹ (ایس ٹی پی) کے منصوبے کی تکمیل کے ذریعے 14 ایم ایل ڈی کی ٹریٹمنٹ صلاحیت شامل کی گئی، جس کی منظور شدہ لاگت 61.05 کروڑ روپے ہے۔ یہ ریاست میں سیوریج ٹریٹمنٹ کے بنیادی ڈھانچے کی توسیع اور اہم آلودہ علاقوں سے نمٹنے کی جانب ایک اہم قدم ہے۔

مغربی بنگال میں جنگی پور، مہیشتالہ اور چکدہ میں مکمل ہونے والے منصوبوں کے ذریعے نمایاں پیش رفت ہوئی، جس سے زیریں گنگا بیسن میں آلودگی پر قابو پانے کی کوششوں کو مضبوطی ملی۔ مہیشتالہ کا منصوبہ ایک اہم شراکت دار کے طور پر سامنے آیا، جس کے تحت 286.97 کروڑ روپے کی منظور شدہ لاگت سے 35 ایم ایل ڈی کی صلاحیت کا اضافہ کیا گیا۔

 

 

مہیشتالہ میں 35 ایم ایل ڈی ایس ٹی پی شمالی بیرک پور ایس ٹی پی

 

جنگی پور میں آلودگی میں کمی کے اقدامات کے تحت 68.47 کروڑ روپے کی سرمایہ کاری سے 13 ایم ایل ڈی صلاحیت کا اضافہ کیا گیا، جبکہ چکدہ منصوبے نے انٹرسپشن، ڈائیورژن اور ایس ٹی پی کے کاموں کے ذریعے 121.66 کروڑ روپے کی لاگت سے مزید 15 ایم ایل ڈی صلاحیت فراہم کی۔ نارتھ بیرک پور میں مزید 30 ایم ایل ڈی صلاحیت کا اضافہ کیا گیا، جس سے زیریں گنگا بیسن میں کوششوں کو مزید تقویت ملی۔ مجموعی طور پر یہ اقدامات مغربی بنگال میں سیوریج ٹریٹمنٹ کی صلاحیت بڑھانے اور دریائی پانی کے معیار کو بہتر بنانے کی ایک جامع کوشش کی عکاسی کرتے ہیں۔

بہار میں دیگھا، کنکر باغ اور بھاگلپور کے منصوبوں نے بھی صلاحیت میں نمایاں اضافہ کیا، جہاں بالترتیب 30 ایم ایل ڈی، 35 ایم ایل ڈی اور 22.5 ایم ایل ڈی کی گنجائش شامل کی گئی۔ یہ منصوبے شہری گندے پانی کے مسائل سے نمٹنے اور ریاست میں دریائی پانی کے معیار کو بہتر بنانے میں اہم کردار ادا کرتے ہیں۔

 

کنکر باغ دیگھا

بھاگلپور ایس ٹی پی

 

اس کے علاوہ، زمینی سطح پر نگرانی کو مضبوط بنانے اور بروقت مداخلت کو ممکن بنانے کے لیے، نمامی گنگے پروگرام کے تحت ”ڈرین ڈیش بورڈ“ نامی ایک ڈیجیٹل ٹول متعارف کرایا گیا ہے، جو دریا میں شامل ہونے والے نالوں کی نگرانی کرتا ہے۔ یہ ڈیش بورڈ نالوں کی ٹیپنگ کی صورتحال، سیوریج کو سیوریج ٹریٹمنٹ پلانٹس (ایس ٹی پی) کی جانب موڑنے اور متعلقہ بہاؤ کی حالتوں کی نگرانی کی سہولت فراہم کرتا ہے۔ اس کے ذریعے حقیقی وقت میں آلودگی کے خطرات کی نشاندہی ممکن ہوتی ہے، جبکہ جوابدہی، شفافیت اور ردِعمل کی صلاحیت میں بھی بہتری آتی ہے۔

این ایم سی جی نے ایس ٹی پی بنیادی ڈھانچے کی نگرانی کو مضبوط بنانے کے لیے ”گنگا پلس پبلک پورٹل“ بھی تیار کیا ہے، جو شفافیت اور جوابدہی کو یقینی بناتا ہے۔ یہ ڈیجیٹل نظام ایک مانیٹرنگ پلیٹ فارم ہے جو گنگا بیسن کی پانچ ریاستوں—اتراکھنڈ، اتر پردیش، بہار، جھارکھنڈ اور مغربی بنگال میں موجود ایس ٹی پی سے حاصل ہونے والا حقیقی وقت کا ڈیٹا ظاہر کرتا ہے۔ اس میں ہر مقام کی بنیادی معلومات کے ساتھ چار اہم پیرامیٹر شامل ہیں: پی ایچ، بی او ڈی اور ٹی ایس ایس۔ پورٹل ان لیٹ (داخلہ) اور آؤٹ لیٹ (اخراج) دونوں مقامات کی ریڈنگ پیش کرتا ہے تاکہ ٹریٹمنٹ کے بعد پانی کے معیار میں بہتری کو واضح کیا جا سکے۔ اس سے ٹریٹمنٹ کی کارکردگی اور ضوابط کی پاسداری کا جائزہ لینے میں مدد ملتی ہے اور نمامی گنگے پروگرام کے تحت شفاف اور مؤثر نگرانی کو یقینی بنایا جاتا ہے۔ اس پورٹل کو عوامی سطح پر جاری کیا گیا ہے تاکہ جوابدہی میں اضافہ ہو اور یہ یقینی بنایا جا سکے کہ قائم کردہ بنیادی ڈھانچہ مؤثر انداز میں کام کر رہا ہے۔

مجموعی طور پر، اس سال حاصل ہونے والی پیش رفت ایک حکمت عملی پر مبنی اور علاقائی طور پر متوازن نفاذ کے طریقۂ کار کی عکاسی کرتی ہے۔ جاری منصوبوں کی مضبوط پائپ لائن اور بروقت تکمیل پر مسلسل توجہ کے ساتھ، این ایم سی جی صاف اور صحت مند گنگا کے اپنے ہدف کی جانب مسلسل پیش رفت کر رہا ہے۔ اس عرصے کے دوران پیدا کی گئی نمایاں صلاحیت نہ صرف موجودہ ماحولیاتی چیلنجوں سے نمٹنے میں مدد دیتی ہے بلکہ دریائی بیسن کے اطراف بڑھتی شہری آبادی کی مستقبل کی ضروریات کو پورا کرنے کے لیے بھی مضبوط بنیاد فراہم کرتی ہے۔

*************

ش ح۔ ف ش ع

                      U: 6141

 

(ریلیز آئی ڈی: 2254354) وزیٹر کاؤنٹر : 11