ہندوستانی بحری جہاز (آئی او ایس) ساگر — آئی این ایس سُنَیَنا نے 17 اپریل 2026 کو فوکٹ، تھائی لینڈ سے روانگی اختیار کی، جہاں تین دن کے مصروف آپریشنل مرحلے کی کامیاب تکمیل کے بعد یہ اقدام جاری تعیناتی کے دوران اس کے دوسرے بندرگاہی دورے کے اختتام کی علامت ہے۔

فوکٹ میں قیام کے دوران آئی او ایس ساگر نے شاہی تھائی بحریہ کے ساتھ پیشہ ورانہ، تزویراتی اور ثقافتی سرگرمیوں میں حصہ لیا، جس سے دو طرفہ بحری تعاون مزید مضبوط ہوا۔ آئی این ایس سُنَیَنا کے کمانڈنگ افسر کمانڈر سدھارتھ چودھری نے ریئر ایڈمرل ستھاپورن وجارت، چیف آف اسٹاف، تیسری بحری کمان، شاہی تھائی بحریہ سے ملاقات کی اور سمندری تعاون کے عزم کا اعادہ کیا۔

پیشہ ورانہ اور باہمی تعلقات کو فروغ دینے کے لیے دوستانہ فٹبال میچ اور مشترکہ یوگا سیشن کا بھی انعقاد کیا گیا، جس میں دونوں بحری افواج کے اہلکاروں نے حصہ لیا۔ جہاز پر منعقدہ ایک رسمی استقبالیہ تقریب میں سینئر بحری شخصیات نے شرکت کی، جہاں آئی او ایس ساگر مشن سے متعلق معلومات کا تبادلہ اور سمندری تعاون و علاقائی سلامتی پر تبادلۂ خیال ہوا۔ جہاز کو عوامی دورے کے لیے بھی کھولا گیا، جس سے عوامی روابط کو فروغ ملا۔

اس کےعلاوہ تھائی جہاز ایچ ٹی ایم ایس کلونگ یائی کے ساتھ ایک بحری مشق کے دوران عملی ہم آہنگی کا مظاہرہ کیا گیا، جس میں مواصلاتی مشقیں اور مشترکہ جہازی ترتیب شامل تھی، جو دونوں بحری افواج کے درمیان مؤثر تال میل کو ظاہر کرتی ہے۔ یہ دورہ بھارت اور تھائی لینڈ کے درمیان مضبوط اور دیرپا بحری شراکت داری کو ظاہر کرتا ہے، جو علاقائی سلامتی اور ترقی کے مشترکہ ویژن کے مطابق ہے۔

آئی او ایس ساگر اب اپنے اگلے پڑاؤ کے طور پر جکارتہ، انڈونیشیا کی جانب روانہ ہو چکا ہے، جہاں وہ جنوب مشرقی بحرِ ہند کے خطے میں بحری تعاون کو مزید مستحکم کرنے کے مشن کو جاری رکھے گا۔

******

ش ح۔ ش ا ر۔ ول

Uno-6041

 

(ریلیز آئی ڈی: 2253550) وزیٹر کاؤنٹر : 10