اقلیتی زبانوں کے تحفظ کو مصنوعی ذہانت پر مبنی اختراعات کے ذریعے مضبوط بنانے کی ایک اہم پیش رفت کے طور پر بھاشِنی سنچالن/سیوا ورکشاپ برائے گرمکھی زبان کے تحفظ اور ڈیجیٹل اے آئی ماڈل کی تیاری 17 اپریل 2026 کو دہلی یونیورسٹی کے ایس جی ٹی بی خالصہ کالج میں منعقد کی گئی۔

یہ ورکشاپ وزارتِ الیکٹرانکس و اطلاعاتی ٹیکنالوجی کے تحت ڈیجیٹل انڈیا بھاشِنی ڈویژن نے ایس جی ٹی بی خالصہ کالج کے اشتراک سے منعقد کی۔

 

ورکشاپ میں خاص طور پر گرمکھی رسم الخط پر توجہ مرکوز کی گئی، جو پنجابی زبان و ادب کا اہم حصہ ہے اور بالخصوص سکھ روایات اور مذہبی متون میں گہری ثقافتی، تاریخی اور مذہبی اہمیت رکھتا ہے۔ مصنوعی ذہانت کے نظام میں ایک لسانی وسیلے کے طور پر گرمکھی کو مؤثر طریقے سے ڈیجیٹل پلیٹ فارمز اور خدمات میں شامل کرنے کے لیے ڈیجیٹائزیشن، ڈیٹا سیٹ کی تیاری اور لسانی توثیق جیسے منظم اقدامات کی ضرورت ہے۔ یہ اقدام وزارتِ اقلیتی امور کے اس وسیع تر مقصد سے ہم آہنگ ہے جس کا ہدف اقلیتی اور ورثہ زبانوں کے تحفظ اور فروغ کو یقینی بنانا ہے۔

ایس جی ٹی بی خالصہ کالج نے ایک اہم تعلیمی و علمی شراکت دار کے طور پر کردار ادا کیا اور لسانی درستگی اور ثقافتی سیاق و سباق کو یقینی بنانے کے لیے اپنی مہارت فراہم کی۔ یہ اشتراک کم وسائل رکھنے والی اور ورثہ زبانوں کے لیے تحقیق، علمی ترقی اور ایک مضبوط ماحولیاتی نظام کی تشکیل کی جاری کوششوں کی عکاسی کرتا ہے۔

ورکشاپ کے دوران ڈیجیٹل انڈیا بھاشِنی ڈویژن کے سینئر جنرل منیجر شیلندر پال سنگھ نے اس بات پر زور دیا کہ مصنوعی ذہانت کے ذریعے ہندوستانی زبانوں میں علم اور ڈیجیٹل خدمات تک جامع رسائی کو ممکن بنایا جا سکتا ہے۔ انہوں نے اعلیٰ معیار کے ڈیٹا سیٹس اور مضبوط لسانی ماڈلز کی تیاری کے لیے تعلیمی اداروں اور زبان سے وابستہ برادریوں کی فعال شمولیت کی ضرورت کو اجاگر کیا۔

ورکشاپ میں گرمکھی زبان کے لیے اے آئی ماڈلز کی تیاری پر توجہ دی گئی، جس کے لیے ہدفی ڈیٹا جمع کرنے، توثیقی نظام اور کمیونٹی کی شمولیت پر مبنی طریقہ کار اپنایا گیا۔ پروگرام میں گرمکھی کی لسانی و ثقافتی اہمیت پر سیشنز کے ساتھ ساتھ ڈیٹا سیٹ کی ضروریات جیسے متنی مواد، آڈیو ریکارڈنگز اور مخطوطات کی ڈیجیٹائزیشن پر تفصیلی گفتگو کی گئی، جنہیں معیاری ڈیٹا فریم ورک کے ذریعے تعاون دیا جائے گا۔ اس موقع پر ’’بھاشا دان‘‘ پلیٹ فارم کا بھی تعارف کرایا گیا تاکہ ماہر افراد کی مدد سے منظم ڈیٹا فراہم کیا جا سکے اور کمیونٹی کی سطح پر توثیق کو فروغ دیا جا سکے۔

ورکشاپ کے دوران بھاشِنی ٹیم نے اپنی اہم اے آئی ٹیکنالوجیوں اور ایپلی کیشنز کا عملی مظاہرہ بھی کیا، جس میں متن، آواز اور دستاویزات کے میدان میں کثیر لسانی صلاحیتوں کو پیش کیا گیا۔ ان مظاہروں میں متن سے متن کا ترجمہ، آواز کی پہچان، آپٹیکل کریکٹر کی پہچان اور دیگر کثیر لسانی ٹولز شامل تھے، جن کے استعمالات حکمرانی، تعلیم اور ڈیجیٹل عوامی ڈھانچے میں دکھائے گئے۔

اس موقع پر ایس جی ٹی بی خالصہ کالج کے پرنسپل پروفیسر گرمہندر سنگھ نے کہا، ’’بھاشِنی ہندوستانی زبانوں کے درمیان ڈیجیٹل خلا کو کم کرنے میں اہم کردار ادا کرے گا۔ ہم ایس جی ٹی بی خالصہ کالج میں اس ٹیم کے ساتھ طویل مدتی تعاون جاری رکھیں گے تاکہ گرمکھی زبان سے متعلق ایپلی کیشنز کو فروغ دیا جا سکے۔‘‘

ان نمائشوں اور مباحثوں نے بر وقت مداخلت، قابلِ توسیع تعیناتی (اسکیل ایبل ڈیپلائمنٹ) اور اے پی آئی پر مبنی انضمام کی صلاحیتوں کو اجاگر کیا، جس سے بھاشِنی کے اس کردار کو مزید تقویت ملی کہ وہ ایک قومی پلیٹ فارم کے طور پر کثیر لسانی رسائی، شمولیت اور ڈیجیٹل بااختیاری کو فروغ دیتا ہے، جبکہ تعلیمی اداروں اور زبان سے وابستہ برادریوں کے ساتھ اشتراکی نظام کو بھی مسلسل مضبوط بنا رہا ہے۔

 

 

ڈیجیٹل انڈیا بھاشِنی ڈویژن  کے بارے میں:

ڈیجیٹل انڈیا بھاشِنی ڈویژن (ڈی آئی بی ڈی )، جو وزارتِ الیکٹرانکس و اطلاعاتی ٹیکنالوجی (ایم ای آئی ٹی وائی) کے تحت کام کرتا ہے، ہندوستان میں مصنوعی ذہانت پر مبنی لسانی ٹیکنالوجی اور کثیر لسانی ڈیجیٹل شمولیت کے لیے ایک قومی اقدام ہے۔ بھاشِنی محض ماڈل فراہم کرنے والا پلیٹ فارم نہیں بلکہ اس نے نیشنل ہب فار لینگویج ٹیکنالوجی (این ایچ ایل ٹی) بھی تیار کیا ہے، جو دنیا کے بڑے اے آئی مداخلت پلیٹ فارموں میں شمار ہوتا ہے اور جدید آواز و متن ٹیکنالوجی کے ذریعے ہندوستانی اور بین الاقوامی زبانوں میں کثیر لسانی سہولیات فراہم کرتا ہے۔

ڈی آئی بی ڈی ایک مضبوط اوپن سورس ایکو سسٹم کی بنیاد رکھتا ہے، جو ماڈل انجینئرنگ و آپٹیمائزیشن، اے پی آئی انجینئرنگ و مینجمنٹ، اور حکومتی و ادارہ جاتی پلیٹ فارمز پر حقیقی دنیا کے استعمال کے لیے اسکیل ایبل حل فراہم کرنے پر مرکوز ہے۔ یہ پلیٹ فارم منظم فیڈبیک سسٹم کے ذریعے ماڈلز کی مسلسل بہتری کو ممکن بناتا ہے اور بڑے پیمانے پر ڈیٹا سیٹ کی تیاری—جس میں کثیر لسانی اور صوتی مواد شامل ہے—کے ذریعے اپنی کارکردگی کو مزید بہتر بناتا ہے، جس کے لیے ’’بھاشا دان‘‘ جیسے اقدامات اہم کردار ادا کرتے ہیں۔

یہ پلیٹ فارم 800 سے زائد سرکاری ویب سائٹس کو تقویت فراہم کرتا ہے، روزانہ 1.5 کروڑ سے زیادہ مداخلتوں کو پراسیس کرتا ہے اور 36 متنی اور 23 صوتی زبانوں میں 20 سے زائد خصوصی نیچرل لینگویج پروسیسنگ خدمات فراہم کرتا ہے، جن میں قبائلی بولیوں کی معاونت بھی شامل ہے۔

ڈی آئی بی ڈی تحقیق و ترقی کو فروغ دینے، زبان سے متعلق اے آئی کے شعبے میں اسٹارٹ اپس کی حوصلہ افزائی، تعلیمی اداروں کے ساتھ اشتراک اور بین الاقوامی تعاون کو آگے بڑھانے میں بھی سرگرم ہے، جس کے ذریعے بھاشِنی کو ایک قابلِ توسیع، جامع اور مستقبل کے تقاضوں سے ہم آہنگ ڈیجیٹل عوامی ڈھانچے کے طور پر مستحکم کیا جا رہا ہے۔

************

 

ش ح ۔   م  د ۔  م  ص

(U :6020  )

(ریلیز آئی ڈی: 2253355) وزیٹر کاؤنٹر : 9