انڈین فارماکوپیا کمیشن (آئی پی سی) نے کونسل آف سائنٹفک اینڈ انڈسٹریل ریسرچ  (سی ایس آئی آر) کے اشتراک سے 17 اپریل 2026 کو سی ایس آئی آر-انڈین انسٹی ٹیوٹ آف انٹیگریٹو میڈیسن(سی ایس آئی آر- آئی آئی آئی ایم)، جموں میں انڈین فارماکوپیا (آئی پی)2026 پر ایک سائنسی کانکلیو اور انٹرایکٹو سیشن کا انعقاد کیا۔

اس کانکلیو میں انضباطی  اداروں، تعلیمی حلقوں اور دوا ساز صنعت  کاروں کے ماہرین نے شرکت کی، جہاں فارماکوپیائی معیارات میں اہم پیش رفت اور ادویات کے معیار، سلامتی اور افادیت کو یقینی بنانے میں ان کے کردار پر تبادلہ خیال کیا گیا۔

افتتاحی اجلاس میں سینئر عہدیداران اور ماہرین نے خطابات کیے، جنہوں نے بدلتی ہوئی سائنسی اور ریگولیٹری ضروریات کے مطابق ادویات کے معیارات کو مضبوط بنانے کی اہمیت پر زور دیا۔ مباحثوں میں اس بات کو اجاگر کیا گیا کہ انڈین فارماکوپیا ملک بھر میں ادویات کے یکساں معیارات کو برقرار رکھنے کے لیے ایک اہم ذریعہ ہے۔

تکنیکی اجلاسوں میں انڈین فارماکوپیا (آئی پی)2026 میں حالیہ اپڈیٹس پر توجہ مرکوز کی گئی، جن میں مونوگرافس کی تیاری اور نظرِ ثانی، کثافت کے معیارات کو مضبوط بنانا، اور جدید تجزیاتی طریقۂ کار کو اپنانا شامل ہے۔ مباحثوں میں انضباطی نقطۂ نظر، فائٹو فارماسیوٹیکلز کی معیاری سازی، اور مائیکرو بایولوجیکل اور خون سے متعلقہ معیارات کو بہتر بنانے جیسے موضوعات بھی زیرِ غور آئے، جو ادویاتی معیار کے نظام کو بہتر بنانے کے لیے ایک جامع حکمتِ عملی کی عکاسی کرتے ہیں۔

بات چیت کے سیشن نے متعلقہ فریقین کو ایک ایسا پلیٹ فارم فراہم کیا جہاں انہوں نے آئی پی 2026 کے نفاذ کے پہلوؤں، صنعت کی تیاری، اور عالمی معیارات کے ساتھ مسلسل ہم آہنگی کی ضرورت پر اپنے خیالات کا تبادلہ کیا۔ شرکاء نے اس بات پر زور دیا کہ اپڈیٹ شدہ معیارات کے مؤثر نفاذ کو یقینی بنانے کے لیے ریگولیٹرز، صنعت اور سائنسی اداروں کے درمیان تعاون نہایت اہم ہے۔

کانکلیو نے انڈین فارماکوپیا کمیشن (آئی پی سی) کے اس عزم کا اعادہ کیا کہ وہ سائنسی ترقی اور متعلقہ فریقوں کی شمولیت کے ذریعے فارماکوپیائی معیارات کو مسلسل بہتر بناتا رہے گا، جس کے نتیجے میں ملک میں عوامی صحت کے تحفظ کو مزید مضبوط بنایا جا سکے گا۔

*****

ش ح-ا ع خ   ۔ر  ا

U-No- 6005

(ریلیز آئی ڈی: 2253260) وزیٹر کاؤنٹر : 11