نیشنل ہیومن رائٹس کمیشن نے آج اتر پردیش کے مختلف اضلاع میں اینٹوں کے بھٹوں میں مبینہ طور پر بندھوا مزدوری کے 216 مقدمات کی آن لائن سماعت کی۔ چیئرپرسن، جسٹس وی راما سبرامنیم نے سکریٹری جنرل،جناب بھرت لال، رجسٹرار (قانون)،جناب جوگندر سنگھ اور سینئر افسران کی موجودگی میں ورچوئل سماعت کی صدارت کی۔ سماعت میں ریاستی حکومت کے سینئر عہدیداروں بشمول لیبر کمشنر، ڈسٹرکٹ مجسٹریٹس اور ایڈیشنل ڈسٹرکٹ مجسٹریٹس کی فعال شرکت دیکھی گئی۔

جسٹس راما سبرامنیم نے ان کی موجودگی کی تعریف کی لیکن کہا کہ اگر افسران اپنی ذمہ داریاں پوری تندہی سے انجام دیتے تو اس طرح کی سماعت کی ضرورت نہ پڑتی۔ دیگر خلاف ورزیوں کے علاوہ ریکارڈ کی عدم پیداوار اور کم از کم اجرت کے اصولوں کی عدم تعمیل کو اجاگر کرنے والی رپورٹس کے باوجود، حکام بندھوا مزدوری کے مسئلے کو حل کرنے میں ناکام رہے ہیں۔ انہوں نے کہا کہ اس طرح کی کوتاہی مزدوروں کے بانڈڈ لیبر سسٹم (ابولیشن) ایکٹ، 1976 اور سنٹرل سیکٹر سکیم کے تحت بچاؤ، رہائی اور بحالی کے ان کے جائز دعوے کی تردید کرتی ہے۔

 

نیشنل ہومین رائٹس کمیشن کے سکریٹری جنرل، جناببھرت لال نے بندھوا مزدوری کے نظام (ختم کرنے) ایکٹ، 1976 کے نفاذ اور بندھوا مزدوروں کی بحالی میں پائے جانے والے خلاء پر زور دیا۔ انہوں نے ضلعی عہدیداروں پر زور دیا کہ وہ مزدوروں کی حالت زار کا ازالہ کریں اور قانون پر عمل درآمد کرکے انہیں باوقار زندگی دیں۔ انہوں نے اس بات پر زور دیا کہ حکام کی جانب سے کسی کوتاہی یا بے عملی سے ان مزدوروں کو تنگدستی کا سامنا کرنا پڑتا ہے اور وہ استحصال کا شکار ہو جاتے ہیں۔

کمیشن نے اپنے زیر غور شکایات پر ڈی ایم کے ذریعہ پیش کردہ ایکشن ٹیکن رپورٹس (اے ٹی آر) کا جائزہ لیا۔ ریاستی لیبر کمشنر نے یقین دلایا کہ تمام 216 معاملات کا جائزہ لیا جائے گا، جس کے بعد تین ہفتوں کے اندر مطلوبہ معلومات اور رپورٹیں کمیشن کو پیش کی جائیں گی۔ حکام نے یہ بھی یقین دلایا کہ وہ بندھوا مزدوری کے مسئلے سے نمٹنے کے لیے فوری تدارک کے لیے سپریم کورٹ کی ہدایات اور قابل اطلاق قوانین کی مکمل تعمیل کو یقینی بنائیں گے۔

***

 

(ش ح۔اص)

UR No 5940

(ریلیز آئی ڈی: 2252753) وزیٹر کاؤنٹر : 14