بھارتی فوج کا ایک دستہ بھارت-مصر مشترکہ خصوصی فورسز مشق ’سائیکلون-IV‘ کے چوتھے ایڈیشن میں شرکت کے لیے مصر روانہ ہو گیا ہے۔ یہ مشترکہ فوجی مشق 9 سے 17 اپریل 2026 تک مصر کے انشاص علاقے میں منعقد کی جا رہی ہے۔

یہ مشق بھارت اور مصر کے درمیان بڑھتے ہوئے فوجی تعاون کے تسلسل کی علامت ہے، جسے بھارت میں منعقدہ گزشتہ کامیاب ایڈیشن کے بعد مزید آگے بڑھایا جا رہا ہے۔ بھارتی دستے میں خصوصی فورسز کی یونٹوں کے 25 منتخب جوان شامل ہیں، جو اپنے مصری ہم منصبوں کے ساتھ حقیقی جنگی ماحول میں مشترکہ تربیت حاصل کریں گے۔

اس مشق کا بنیادی مقصد خصوصی آپریشنز میں بہترین طریقۂ کار کے تبادلے کے ذریعے مشترکہ مشن کی منصوبہ بندی کی صلاحیتوں کو مضبوط بنانا اور دونوں افواج کے درمیان باہمی ہم آہنگی کو مزید بہتر بنانا ہے۔ اس کے تحت شریک فوجی ریگستانی اور نیم ریگستانی علاقوں میں خصوصی آپریشنز سے متعلق حکمت عملی، تکنیک اور طریقۂ کار پر مبنی مختلف تربیتی سرگرمیوں میں حصہ لیں گے۔

یہ مشترکہ مشق پیشہ ورانہ مہارت کے باہمی تبادلے کو فروغ دے گی اور دونوں ممالک کے درمیان دوستانہ تعلقات کو مزید مستحکم کرنے کا موقع فراہم کرے گی۔ ساتھ ہی یہ ایک دوسرے کی فوجی روایات، کام کرنے کے انداز اور کارکردگی کے نقطۂ نظر کو سمجھنے کا ایک اہم پلیٹ فارم بھی ثابت ہوگی۔

مشق سائیکلون جیسے دوطرفہ فوجی پروگرام بھارت اور مصر کے درمیان دفاعی تعاون کا ایک اہم ستون ہیں۔ یہ مشقیں نہ صرف باہمی اعتماد کو مضبوط بناتی ہیں بلکہ دونوں ممالک کی مسلح افواج کے درمیان تعلقات کو بھی نئی مضبوطی فراہم کرتی ہیں۔

 

*******

 

(ش ح  ۔ع ح ۔ ش ت)

U.No. 5600

(ریلیز آئی ڈی: 2250361) وزیٹر کاؤنٹر : 11