وزیر اعظم  جناب نریندر مودی کی رہنمائی اور مرکزی وزیر زراعت و کسانوں کی بہبودجناب شیوراج سنگھ چوہان کی قیادت میں حکومتِ ہند اپریل-مئی 2026 کے دوران علاقائی سطح پر کانفرنسوں کا ایک جامع، ملک گیر سلسلہ شروع کرنے جا رہی ہے۔ یہ کانفرنسیں زرعی شعبے میں منظم مکالمے، جائزے اور مستقبل کی منصوبہ بندی کے لیے ایک اہم پلیٹ فارم فراہم کریں گی۔ اس پہل کا مقصد مرکزی و ریاستی وزرائے زراعت، سینئر عہدیداروں، سائنسدانوں، ترقی پسند کسانوں، کسان تنظیموں، فارمر پروڈیوسر آرگنائزیشنز (ایف پی اوز)، ایگری اسٹارٹ اپس اور نجی شعبے کے نمائندوں کو یکجا کرنا ہے، تاکہ کلیدی اسکیموں کی پیش رفت کا مشترکہ جائزہ لیا جا سکے اور آئندہ کی حکمت عملی طے کی جا سکے۔

کانفرنس سیریز: جے پور سے گوہاٹی تک

تفصیلات بیان کرتے ہوئے جناب چوہان نے کہا کہ مغربی خطے کے لیے پہلی زونل کانفرنس 7 اپریل 2026 کو جے پور میں منعقد ہوگی، جس میں راجستھان، مدھیہ پردیش، مہاراشٹر، گجرات اور گوا کے نمائندے شرکت کریں گے۔ اس موقع پر راجستھان کے وزیر اعلیٰ بھجن لال شرما سمیت شریک ریاستوں کے وزرائے زراعت اور اعلیٰ حکام بھی موجود ہوں گے۔

شمالی خطے کی کانفرنس 17 اپریل کو لکھنؤ میں منعقد کی جائے گی، جس میں دہلی، چندی گڑھ، جموں و کشمیر، اتر پردیش، ہریانہ، ہماچل پردیش، لداخ، پنجاب اور اتراکھنڈ شامل ہوں گے۔

مشرقی خطے کی کانفرنس 24 اپریل کو بھونیشور میں شیڈول ہے، جس میں بہار، جھارکھنڈ، اڈیشہ اور مغربی بنگال کی شرکت متوقع ہے۔ یہ سلسلہ مئی کے آخر تک حیدرآباد اور گوہاٹی میں کانفرنسوں کے ساتھ جاری رہے گا، جہاں جنوبی اور شمال مشرقی خطوں کی مخصوص ضروریات اور مواقع پر خصوصی توجہ دی جائے گی۔

مقصد: نفاذ اور کسانوں کی خوشحالی کو مضبوط بنانا

جناب چوہان نے کہا کہ ان زونل کانفرنسوں کا بنیادی مقصد مرکز اور ریاستوں کے درمیان تال میل کو مزید مستحکم کرنا اور وزیر اعظم مودی کے وژن کے مطابق مقامی ضروریات کے تحت مرکزی اسکیموں کے مؤثر نفاذ کو یقینی بنانا ہے۔ اہم توجہ کے شعبوں میں آتم نربھر دالیں مشن، نیشنل ایڈیبل آئل مشن، نیچرل فارمنگ مشن اور ڈیجیٹل ایگریکلچر مشن شامل ہیں۔

انہوں نے مزید کہا کہ یہ کانفرنسیں عمل درآمد کے چیلنجوں کی نشاندہی میں بھی مدد دیں گی اور باہمی مشاورت کے ذریعے بروقت حل ممکن بنائیں گی۔ اس کے علاوہ آبپاشی، کھاد کی تقسیم، زرعی اسٹیک ویلیو چین کی ترقی، باغبانی اور ویلیو چین مینجمنٹ جیسے شعبوں میں ریاستوں کے کامیاب ماڈلز کو دیگر خطوں میں اپنانے کے لیے شیئر کیا جائے گا۔

جامع شرکت اور آئندہ کی حکمت عملی

ان کانفرنسوں میں ریاستی وزرائے زراعت، سینئر عہدیداروں، انڈین کونسل آف ایگریکلچرل ریسرچ کے کرشی وگیان کیندروں (کے وی کے) کے ماہرین، نیشنل بینک فار ایگریکلچر اینڈ رورل ڈیولپمنٹ کے نمائندے، بینکنگ شعبہ، ترقی پسند کسان، ایف پی اوز، ایگری اسٹارٹ اپس اور نجی کاروباری ادارے شریک ہوں گے۔

انٹرایکٹو سیشنز کے ذریعے کسانوں کو اپنے تجربات اور تجاویز پیش کرنے کا براہِ راست موقع ملے گا، جس سے پالیسی سازی کو زمینی حقائق اور مارکیٹ کی ضروریات کے مطابق بہتر بنایا جا سکے گا۔ اس شراکت دارانہ طرزِ عمل سے شفافیت، جوابدہی اور عمل درآمد کی مؤثریت میں اضافہ متوقع ہے۔

اس پہل پر اعتماد کا اظہار کرتے ہوئے جناب چوہان نے کہا کہ یہ زونل کانفرنسیں زراعت میں اختراع، سرمایہ کاری اور ٹیکنالوجی کے استعمال کو فروغ دیں گی، جس کے نتیجے میں کسانوں کی آمدنی میں اضافہ، پیداواری صلاحیت میں بہتری اور پائیدار دیہی ترقی ممکن ہوگی۔ انہوں نے مزید کہا کہ زراعت میں بامعنی پیش رفت صرف زمینی سطح پر مسلسل رابطے اور مشاورت سے ہی ممکن ہے۔

انہوں نے اس بات پر بھی زور دیا کہ عہدہ سنبھالنے کے بعد سے وہ مختلف ریاستوں کے مسلسل دورے کر رہے ہیں اور کسانوں، سائنسدانوں اور دیگر متعلقہ فریقین سے براہِ راست گفتگو کر رہے ہیں تاکہ پالیسیاں عملی، مؤثر اور نتیجہ خیز ثابت ہوں۔

 

***

(ش ح۔اس ک  )

UR-5257

(ریلیز آئی ڈی: 2248039) وزیٹر کاؤنٹر : 5