సైన్స్ కమ్యూనికేషన్ ను బలోపేతం చేసేందుకు, సైన్స్, టెక్నాలజీ, ఇన్నోవేషన్ (ఎస్టీఐ) పాలసీలో ఉమ్మడి పరిశోధనలు ప్రోత్సహించేందుకు సీఎస్ఐఆర్ - నేషనల్ ఇన్‌స్టిట్యూట్ ఆఫ్ సైన్స్ కమ్యూనికేషన్ అండ్ పాలసీ రీసెర్చ్ ఆంధ్రప్రదేశ్ సైన్స్ సిటీ (ఎస్సీఏపీ)తో ఒక అవగాహన ఒప్పందం కుదుర్చుకుంది. సాక్ష్యాధారిత విధాన రూపకల్పనను మెరుగుపరచడం, సైన్స్ కమ్యూనికేషన్ కార్యక్రమాల ద్వారా శాస్త్ర విజ్ఞానంపై ప్రజల్లో అవగాహన పెంచడం, పరిశోధన, శిక్షణ, అవగాహన కార్యక్రమాల్లో ఉమ్మడి ప్రయత్నాల ద్వారా పటిష్టమైన శాస్త్రీయ వ్యవస్థను పెంపొందించడం ఈ ఒప్పందం లక్ష్యంగా పెట్టుకుంది.  

సీఎస్ఐఆర్- ఎన్ఐఎస్సీపీఆర్ డైరెక్టర్ డాక్టర్ గీతా వాణి రాయసం, ఆంధ్రప్రదేశ్ సైన్స్ సిటీ  సీఈఓ  శ్రీ వెంకటేశ్వర్లు కేశినేని ఈ అవగాహన ఒప్పందంపై సంతకాలు చేశారు. ఆంధ్రప్రదేశ్ ప్రభుత్వ ప్రత్యేక ప్రధాన కార్యదర్శి శ్రీ ఎం.టి. కృష్ణబాబు, రెండు సంస్థల ఉన్నతాధికారుల సమక్షంలో ఈ కార్యక్రమం జరిగింది.

ఈ ఒప్పందంలో పేర్కొన్న లక్ష్యాలను ముందుకు తీసుకెళ్లడానికి ఎన్ఐఎస్సీపీఆర్ నుంచి చీఫ్ సైంటిస్ట్ డాక్టర్ యోగేష్ సుమన్, ప్రిన్సిపల్ సైంటిస్ట్ డాక్టర్ ఎన్.కె.ప్రసన్న నోడల్ ఆఫీసర్లుగా వ్యవహరిస్తారు.

 అవగాహనా ఒప్పందం ముఖ్య ప్రయోజనాలు:

• ఆంధ్రప్రదేశ్ రాష్ట్రవ్యాప్తంగా సైన్స్ కమ్యూనికేషన్, శాస్త్రీయ అవగాహనను బలోపేతం చేయడం.

• ఎస్టీఐ పాలసీలో ఉమ్మడి పరిశోధనలను ప్రోత్సహించడం, సాక్ష్యాధారిత నిర్ణయాలకు మద్దతు ఇవ్వడం.

 • శిక్షణ కార్యక్రమాలు, వర్క్‌షాప్‌లు, మార్గదర్శన కార్యక్రమాల ద్వారా సామర్థ్యాల పెంపుదల.

• విజ్ఞానాన్ని పంచుకోవడం, ఉమ్మడి ప్రచురణలు, విద్యాపరమైన మద్దతును అందించడం. 

• పాఠశాల నుంచి   విశ్వవిద్యాలయ స్థాయి వరకు విద్యార్థులు, అధ్యాపకులు, పరిశోధకులు, విద్యావేత్తలకు ప్రయోజనం చేకూర్చడం

 ప్రధాన భాగస్వామ్య కార్యకలాపాలు:

• సైన్స్ కమ్యూనికేషన్, ఎస్టీఐ nపాలసీల్లో ఉమ్మడి పరిశోధన ప్రాజెక్టులు, ప్రచురణలు.

• సెమినార్లు, వర్క్‌షాప్‌లు, కాన్ఫరెన్స్‌లు, శిక్షణ కార్యక్రమాల నిర్వహణ.

• విద్య, శిక్షణకు సంబంధించిన సమాచారం అభివృద్ధి.

• విద్యార్థులు, పరిశోధకులకు,  మార్గదర్శకత్వం. విద్యాపరమైన సహాయ సహకారాలు. 

• శాస్త్రీయ పత్రికలు, విజ్ఞాన వనరులకు ప్రోత్సాహం 

• సుస్థిర అభివృద్ధి లక్ష్యాలకు  అనుగుణంగా అవగాహన కార్యక్రమాలు. 

ఆంధ్రప్రదేశ్ లో విజ్ఞానాధారిత, నూతన ఆవిష్కరణల దిశగా  శాస్త్రీయ వ్యవస్థను అభివృద్ధి చేయడంలో తోడ్పడే విధంగా శాస్త్ర విజ్ఞానం, విధాన రూపకల్పన, సమాజం మధ్య బంధాన్ని బలోపేతం చేయడంలో ఈ ఒప్పందం ఒక ముఖ్యమైన అడుగు.

 

***

(రిలీజ్ ఐడి: 2247163) సందర్శకుల సూచీ సంఖ్య : : 10