اگست 2019 سے حکومتِ ہند، ریاستوں کے ساتھ شراکت داری میں جل جیون مشن (جے جے ایم) – ہر گھر جل نافذ کر رہی ہے، جس کا مقصد ملک کے ہر دیہی گھرانے کو یقینی طور پر پینے کے صاف پانی تک رسائی فراہم کرنا ہے۔ یہ پہل نل کے پانی کے کنکشن کے ذریعے باقاعدہ اور طویل مدتی بنیادوں پر مقررہ معیار کے مطابق مناسب مقدار میں پانی کی فراہمی کو یقینی بناتی ہے۔

مشن کے آغاز کے وقت صرف 3.23 کروڑ (16.7 فیصد) دیہی گھرانوں کے پاس نل کے پانی کے کنکشن موجود تھے۔ جل جیون مشن کے تحت 03.03.2026 تک ریاستوں اور مرکز کے زیرِ انتظام علاقوں کی جانب سے 12.58 کروڑ سے زائد اضافی دیہی گھرانوں کو نل کے پانی کے کنکشن فراہم کیے جا چکے ہیں۔ اس طرح، 03.03.2026 تک ملک کے تقریباً 19.36 کروڑ دیہی گھرانوں میں سے تقریباً 15.82 کروڑ (81.71 فیصد) گھرانوں تک نل کے پانی کی فراہمی پہنچ چکی ہے۔

دیہی علاقوں میں نل کے پانی کے کنکشن کی سال وار، ریاست/مرکز کے زیرِ انتظام علاقوں، اضلاع اور دیہات کے لحاظ سے تفصیلات عوامی ڈومین میں دستیاب ہیں اور جے جے ایم ڈیش بورڈ پر دیکھی جا سکتی ہیں:
https://ejalshakti.gov.in/jjmreport/JJMIndia.aspx

محکمہ ایک آزاد تیسرے فریق کی ایجنسی کے ذریعے، معیاری شماریاتی نمونے کی بنیاد پر، گھریلو نل کے پانی کے کنکشن کی فعالیت کا جائزہ لیتا ہے۔ فنکشنلٹی اسسمنٹ 2024 کے دوران یہ پایا گیا کہ سروے شدہ دیہات میں 98.1 فیصد گھروں میں نل کے کنکشن موجود تھے۔ ان میں سے 87 فیصد گھرانوں نے گزشتہ ہفتے پانی کی فراہمی کی تصدیق کی، جو مجموعی پیش رفت کو ظاہر کرتا ہے۔ مزید یہ کہ 84 فیصد گھرانوں کو طے شدہ شیڈول کے مطابق پانی ملتا ہے، 80 فیصد کو کم از کم 55 لیٹر فی کس یومیہ (ایل پی سی ڈی) پانی دستیاب ہے، 76 فیصد گھروں کا پانی بیکٹیریائی آلودگی سے پاک پایا گیا، جبکہ 81 فیصد گھروں میں پانی کیمیائی آلودگی سے پاک تھا۔ مقدار، معیار اور باقاعدگی کے معیارات کو مدنظر رکھتے ہوئے 76 فیصد گھریلو نل کنکشن فعال پائے گئے۔

ملک بھر میں جے جے ایم کی مؤثر منصوبہ بندی اور عمل درآمد کے لیے متعدد اقدامات کیے گئے ہیں، جن میں باقاعدہ جائزہ اجلاس، صلاحیت سازی کے لیے ورکشاپس، کانفرنسز اور ویبینارز، تربیتی پروگرام، علم کا تبادلہ اور تکنیکی معاونت کے لیے کثیر شعبہ جاتی ٹیموں کے فیلڈ دورے شامل ہیں۔ اس کے علاوہ، ایک تفصیلی آپریشنل گائیڈ لائن، گرام پنچایتوں اور وی ڈبلیو ایس سی کے لیے رہنما ہدایات، اور آنگن واڑی مراکز، آشرم شالاؤں اور اسکولوں میں پائپ کے ذریعے پانی کی فراہمی کے لیے خصوصی مہم سے متعلق ہدایات ریاستوں اور مرکز کے زیرِ انتظام علاقوں کو فراہم کی گئی ہیں۔

آن لائن نگرانی کے لیے جے جے ایم – انٹیگریٹڈ مینجمنٹ انفارمیشن سسٹم (آئی ایم آئی ایس) اور جے جے ایم ڈیش بورڈ قائم کیے گئے ہیں، جبکہ شفاف مالیاتی انتظام کے لیے پبلک فنانشل مینجمنٹ سسٹم (پی ایف ایم ایس) کے ذریعے آن لائن نظام بھی نافذ کیا گیا ہے۔

مزید برآں، کارکردگی اور مؤثریت کو بہتر بنانے کے لیے نگرانی کے موجودہ نظام کو مزید مضبوط کیا گیا ہے۔ اس ضمن میں گاؤں اور ضلع سطح کے ڈیش بورڈز کو ای گرام سوراج پورٹل سے منسلک کرنا، ضلع کلکٹرز کے ساتھ “پیجل سمواد”، آئی ایم آئی ایس ماڈیول کے ذریعے نیشنل واش ایکسپرٹس کے کردار کو ادارہ جاتی بنانا، تھرڈ پارٹی انسپکشن ایجنسی (ٹی پی آئی اے) کی شمولیت، متعلقہ وزارتوں کے ساتھ اشتراک کو فروغ دینا، ماخذ کی پائیداری کے لیے فیصلہ سازی کے نظام، کمیونٹی کے زیرِ انتظام پائپڈ واٹر سسٹمز پر ہینڈ بک، اور مربوط پائپڈ واٹر سسٹمز کے لیے منفرد شناختی نمبر جیسے اقدامات شامل ہیں۔

یہ معلومات وزیر مملکت برائے جل شکتی، جناب وی سومنا نے آج راجیہ سبھا میں ایک تحریری سوال کے جواب میں فراہم کیں۔

 

***

UR-5148

(ش ح۔اس ک  )

(ریلیز آئی ڈی: 2247096) وزیٹر کاؤنٹر : 5