U Myntri Sorkar Pdeng ba dei peit ia ka tnad Communications bad Development of North Eastern Region (DoNER), u la ai jingkren ha ka bynta kaba 15 jong ka NEtym 2026, ka tamasa ba iadei bad ka kolshor kaba man la u snem jong ka Northeast Cell ha Hindu College, University of Delhi, kaba long u mawmer ba kongsan ha kaba rakhe ïa ka sap bad ka kolshor jong ka thaiñ shatei lammihngi.

Haba ai khublei ïa ki nongpynïaid bad ki samla pule na ka bynta ka jingkhot sngewbha, u Myntri Sorkar Pdeng u la ïaroh ïa ka NEtym kum ka rynsan kaba biang tam kaba pyni ïa ka bor bad ka jingriewspah ha ka kolshor jong ka thaiñ shatei lammihngi kaba la khot ka ‘Ashtalakshmi’ jong ka India. U la ong ba ha kine ki ar snem ba ladep, ka samoi treikam jong u kum u Myntrika tnad DoNER ka la pynjylliew ïa ka jingsngewthuh jong u shaphang ka lad kaba khraw ba don ha kane ka thaiñ, ym tang na ka bynta ka India hynrei kum ka lad kaba kongsan sha ka Southeast Asia bad ki jinglong jingman ha ka pyrthei.

 

 

Haba ai jingkren ha ka jaka pule kaba don ïa ka pateng kaba riewspah katba ka nang jan sha ka jingdap 125 snem jong ka, u Myntri Sorkar Pdeng u la ban jur sha ka jingbun sap jong ki briew ka thain shatei lammihngi, da kaba kdew sha ka jingnang jingstad kaba la poi haduh 93% bad u la ban jur ba ki samla jong ka thaiñ kidei ban ïalam ïa ka jingkiew jong ka India ha kylleng ki bynta.

U Scindia u la kren shaphang ka jingiadei kaba jan bha jong u bad ka thain shatei lammihngi, bad u la kren shaphang ka jingsngewthuh bad ka jingleit ba man ka por jong u sha baroh phra tylli ki jylla, kiba dang iai bteng ban ai mynsiem bad pynkhlaiñ ia ka jingthmu jong u na ka bynta ka roi ka par jong ka. U la kren ruh shaphang ka jingiar ka kolshor jong ka thaiñ, da kaba batai ïa ki jingshad na Assam bad kiwei kiwei ki jylla kum ka “mantramugdh,” ha kaba man ka kam ka don ka jingiadei kaba jylliew bha bad ka riti dustur. U la pyndon burom ïa ki riew pawkhmat ha kaba iadei bad ka kolshor kum u Bhupen Hazarika bad u Zubeen Garg, da kaba ong ba ka thaiñ Shatei Lammihngi kadei ka tyllong jong ka kam saindur bad ka kolshor ka bym lah ban ianujor.

 

Haba ban jur ïa ka jingdonkam ba kongsan jong ka thaiñ, u Myntri Sorkar pdeng u la batai ïa ki phra tylli ki jylla jong ka thaiñ shatei lammihngi kum ka lad hapdeng ka India bad ka Global South, kaba lah ban kyntiew ïa ka ioh ka kot bad ka jingiasam ia ka kolshor ha ka pyrthei. Haba ban jur ïa ki sienjam ba kongsan jong ka Tnad, u Scindia u la batai ïa ki sienjam jong ka sorkar ban pynkupbor ïa ki samla jong ka thaiñ. U la kren ruh shaphang ka prokram NE SPARKS, ka Ashtalakshmi Darshan Programme bad ka Advancing NER Portal.

Ka NE SPARKS Programme: La pyntreikam ha ka jingiatreilang bad ka ISRO, kane ka prokram ka plie lad ia 800 ngut ki samla pule man la u snem (100 ngut na kawei pa kawei ka jylla jong ka thain shatei lammihngi) ban iohi ia ka ka saian kaba iadei bad ka haw haw bad ka teknoloji katkum ka juk mynta. La pyndep ia phra tylli ki kynhun.

Ka Ashtalakshmi Darshan Programme: Ka sienjam na ka bynta ka jingiasam ia ka kolshor kaba pynsuk ia ka jingiakren hapdeng ki samla pule na ka thain shatei lammihngi bad kiwei kiwei ki bynta jong ka ri. Baroh ki don 1,280 ngut ki samla pule ha kylleng ki 32 tylli ki kynhun ki la ioh bynta, ha kaba ka prokram kan pyniar sha ka 8,000 ngut ki samla pule shuwa u snem 2030.

Ka Advancing NER Portal: La buh por ban sdang ha u bnai Iaiong 2026, kane ka rynsan digital, kaba la pyniasoh bad ka National Career Service, kan plie lad ban ioh palat 1,000 tylli ki lad ioh kam, palat 300 tylli ki lad sha kiwei kiwei ki kam, palat 200 tylli ki eksamin ban ioh kam, palat 3,000 tylli ki jingpule hapoh ka thain shatei lammihngi, bad palat 8000 tylli ki jaka pule jong ka ri. Ka portal ka thmu ban pyndap ia ka jingduna hapdeng ki sap treikam bad ki lad ioh kam.

 

U Myntri u la ban jur ba hapoh ka jingialam jong u Myntri Rangbah duh Narendra Modi, ka rukom treikam sha ka thaiñ shatei lammihngi ka la kylla na ka jingthmu sha ka jingpyntreikam, da kaba pynthikna ba ïa ka lad la batai da ka jingïoh bad ka jingai bynta lang ia baroh. Haba pynkut ia ka jingkren jong u, u Scindia u la iaroh ia ki samla na ka bynta ka bynta jong ki ban pynwandur ia ka lawei jong ka thain shatei lammihngi, da kaba ong ba ka jingiakren kadei ban long na kaei kaba ka thain ka long sha kaei kaba ka la kylla long bad kaei kaba ki samla jong ka ki plie lad ia ka ban long. U la batai ïa ka NEtym ym tang kum ka tamasa ba iadei bad ka kolshor, hynrei kum ka jingpynpaw kaba khlaiñ ïa ka nongrim, ka jingangnud bad ka jingïaid lynti lang jong ka India sha ka Viksit Bharat.

 

Ka jingïalang ka la sakhi ïa ka jingïashim bynta shitrhem na ki samla pule, bad ki nonghikai, da kaba rakhe ïa ka kolshor kaba iphuh iphieng bad ki jingangnud jong ka thaiñ shatei lammihngi.

*****

(Release ID: 2246584) visitor counter : 2