مواصلات اور شمال مشرقی خطے کی ترقی کے مرکزی وزیر جیوتیرادتیہ سندھیا نے دہلی یونیورسٹی کے ہندو کالج میں منعقد ہونے والے این ای ٹائم 2026 کے 15ویں ایڈیشن سے خطاب کیا، جو شمال مشرق سیل کا سالانہ ثقافتی میلہ ہے۔ اس موقع پر انہوں نے شمال مشرقی خطے کی ثقافت، صلاحیتوں اور امکانات کے جشن کو ایک اہم سنگِ میل قرار دیا۔

 

مرکزی وزیر جیوتیرادتیہ سندھیا نے دعوت دینے پر منتظمین اور طلبہ کا شکریہ ادا کرتے ہوئے این ای ٹائم کو ایک متحرک پلیٹ فارم قرار دیا جو شمال مشرقی خطے کی صلاحیت، توانائی اور ثقافتی دولت کی عکاسی کرتا ہے، جسے احترام کے ساتھ ہندوستان کی “اشٹ لکشمی” کہا جاتا ہے۔

انہوں نے کہا کہ گزشتہ دو برسوں کے دوران وزارت ڈونر کے وزیر کے طور پر ان کی ذمہ داری نے انہیں اس خطے کی بے پناہ صلاحیت کو بہتر طور پر سمجھنے کا موقع دیا ہے، جو نہ صرف ہندوستان کے لیے اہم ہے بلکہ جنوب مشرقی ایشیا اور وسیع عالمی منظرنامے تک ایک اسٹریٹجک پل کا کردار بھی ادا کرتا ہے۔

 

 

اپنے 125ویں سال کے قریب پہنچنے والے ایک تاریخی تعلیمی ادارے میں خطاب کرتے ہوئے مرکزی وزیر جیوتیرادتیہ سندھیا نے شمال مشرق کے غیر معمولی انسانی سرمائے پر روشنی ڈالی۔ انہوں نے کہا کہ اس خطے کی شرح خواندگی اوسطاً 93 فیصد کے قریب ہے اور یہاں کے نوجوانوں کو ملک کی ترقی کی کہانی میں ہر شعبے میں قیادت کرنی چاہیے۔

شمال مشرق کے ساتھ اپنے گہرے ذاتی تعلق کا ذکر کرتے ہوئے جیوتیرادتیہ سندھیا نے کہا کہ اس خطے سے ان کے خاندانی روابط ہیں اور وہ تمام آٹھ ریاستوں کے متعدد دورے کر چکے ہیں، جو اس خطے کی ترقی کے لیے ان کے وژن کو مسلسل تقویت دیتے ہیں۔

انہوں نے خطے کی ثقافتی گہرائی کا ذکر کرتے ہوئے کہا کہ آسام اور دیگر ریاستوں کی ثقافتی پیشکشیں “منترمگدھ” کر دینے والی ہوتی ہیں، جہاں ہر انداز اور ہر حرکت صدیوں پرانی روایت اور معنی اپنے اندر سموئے ہوتی ہے۔ انہوں نے ثقافتی شخصیات بھپین ہزاریکا اور زوبین گرگ کو خراجِ تحسین پیش کرتے ہوئے کہا کہ شمال مشرق بے مثال فنون اور ثقافتی ورثے کا خزانہ ہے۔

 

 

 

خطے کی اسٹریٹجک اہمیت کو اجاگر کرتے ہوئے مرکزی وزیر جیوتیرادتیہ سندھیا نے کہا کہ شمال مشرق کی آٹھ ریاستیں ہندوستان اور عالمِ جنوب کے درمیان ایک قدرتی پل کی حیثیت رکھتی ہیں، جو عالمی سطح پر معاشی اور ثقافتی تبادلے کو فروغ دینے کی صلاحیت رکھتی ہیں۔ انہوں نے وزارت کی اہم پہلوں کا ذکر کرتے ہوئے خطے کے نوجوانوں کو بااختیار بنانے کے لیے حکومت کی خصوصی کوششوں پر روشنی ڈالی۔ اس موقع پر انہوں نے این ای اسپارکس پروگرام، اشٹ لکشمی درشن پروگرام اور ایڈوانسنگ این ای آر پورٹل کے بارے میں بھی تفصیل بیان کی۔

این ای اسپارکس پروگرام:

اس پروگرام کو اسرو کے اشتراک سے نافذ کیا جا رہا ہے، جس کے تحت ہر سال 800 طلبہ (ہر شمال مشرقی ریاست سے 100 طلبہ) کو خلائی سائنس اور جدید ٹیکنالوجی سے آگاہی فراہم کی جاتی ہے۔ اب تک اس کے آٹھ بیچ مکمل ہو چکے ہیں۔

اشٹ لکشمی درشن پروگرام:

یہ ایک منظم ثقافتی تبادلہ پروگرام ہے جس کے ذریعے شمال مشرق اور ملک کے دیگر حصوں کے طلبہ کے درمیان رابطہ اور باہمی سمجھ کو فروغ دیا جاتا ہے۔ اس پروگرام کے تحت 32 بیچز میں 1,280 طلبہ شامل کیے جا چکے ہیں اور 2030 تک اسے 8,000 طلبہ تک وسعت دینے کا ہدف رکھا گیا ہے۔

ایڈوانسنگ این ای آر پورٹل:

یہ ایک جامع ڈیجیٹل پلیٹ فارم ہے جسے اپریل 2026 میں شروع کیا جانا ہے۔ یہ پورٹل نیشنل کیریئر سروس کے ساتھ مربوط ہوگا اور اس کے ذریعے 1,000 سے زیادہ ملازمتوں کے مواقع، 300 سے زائد کیریئر راستے، 200 سے زیادہ داخلہ امتحانات، شمال مشرق میں 3,000 سے زیادہ کورسز اور 800 سے زیادہ قومی اداروں تک رسائی فراہم کی جائے گی۔ اس کا مقصد مہارتوں اور روزگار کے مواقع کے درمیان خلا کو کم کرنا ہے۔

 

 

مرکزی وزیر جیوتیرادتیہ سندھیا نے کہا کہ جناب نریندر مودی کی قیادت میں شمال مشرق کے حوالے سے حکمتِ عملی صرف ارادوں تک محدود نہیں رہی بلکہ عملی اقدامات میں تبدیل ہو چکی ہے، جس کے ذریعے مواقع تک رسائی اور شمولیت کو یقینی بنایا جا رہا ہے۔

اپنے خطاب کے اختتام پر انہوں نے نوجوانوں کی تعریف کرتے ہوئے کہا کہ وہ شمال مشرق کے مستقبل کی تشکیل میں اہم کردار ادا کر رہے ہیں۔ انہوں نے کہا کہ گفتگو اب اس بات سے آگے بڑھنی چاہیے کہ یہ خطہ کیا ہے، اور اس طرف توجہ دینی چاہیے کہ یہ کیا بن رہا ہے اور یہاں کے نوجوان اسے کیا بنانے میں کردار ادا کر رہے ہیں۔

انہوں نے کہا کہ این ای ٹائم صرف ایک ثقافتی میلہ نہیں بلکہ شناخت، امنگ اور وکست ہندوستان کی جانب ہندوستان کے اجتماعی سفر کا ایک مضبوط اظہار ہے۔

 

 

اس تقریب میں طلبہ، فنکاروں اور اساتذہ نے پُرجوش انداز میں شرکت کی اور شمال مشرقی خطے کی ثقافتی رنگا رنگی اور اس کے خوابوں و امنگوں کا بھرپور جشن منایا۔

************

ش ح ۔   م  د ۔  م  ص

(U :  5078  )

(ریلیز آئی ڈی: 2246565) وزیٹر کاؤنٹر : 9