ਭਾਰਤ ਸਰਕਾਰ ਦੇ ਵਣਜ ਅਤੇ ਉਦਯੋਗ ਮੰਤਰਾਲੇ ਦੇ ਉਦਯੋਗ ਅਤੇ ਅੰਦਰੂਨੀ ਵਪਾਰ ਪ੍ਰਮੋਸ਼ਨ ਵਿਭਾਗ (ਡੀਪੀਆਈਆਈਟੀ) ਨੇ ਭਾਰਤ ਦੇ ਸਟਾਰਟਅੱਪ ਈਕੋਸਿਸਟਮ ਨੂੰ ਮਜ਼ਬੂਤ ​​ਕਰਨ ਲਈ ਇੱਕ ਪ੍ਰਮੁੱਖ ਫਿਨਟੈਕ ਪਲੈਟਫਾਰਮ , Razorpay ਨਾਲ ਇੱਕ ਰਣਨੀਤਕ ਭਾਈਵਾਲੀ ਕੀਤੀ ਹੈ। ਇੱਕ ਸਮਝੌਤੇ 'ਤੇ ਦਸਤਖਤ ਕਰਕੇ ਇਸ ਸਹਿਯੋਗ ਨੂੰ ਰਸਮੀ ਰੂਪ ਦਿੱਤਾ ਗਿਆ। ਇਸ ਸਮਝੌਤੇ ਦਾ ਉਦੇਸ਼ ਦੇਸ਼ ਭਰ ਦੇ ਸਟਾਰਟਅੱਪਸ, ਇਨੋਵੇਟਰਾਂ ਅਤੇ ਉੱਦਮੀਆਂ ਦਾ ਸਮਰਥਨ ਕਰਨਾ ਹੈ।

ਇਸ ਸਾਂਝੇਦਾਰੀ ਦਾ ਉਦੇਸ਼ ਸਟਾਰਟਅੱਪਸ ਨੂੰ ਵਿੱਤੀ ਸਾਧਨਾਂ, ਸੰਸਥਾਪਕ-ਯੋਗਤਾ ਪ੍ਰੋਗਰਾਮਾਂ ਅਤੇ ਈਕੋਸਿਸਟਮ ਸਹਾਇਤਾ ਤੱਕ ਪਹੁੰਚ ਪ੍ਰਦਾਨ ਕਰਕੇ ਉਨ੍ਹਾਂ ਨੂੰ ਸਸ਼ਕਤ ਬਣਾਉਣਾ ਹੈ ਤਾਂਕਿ ਉਨ੍ਹਾਂ ਦੇ ਵਾਧੇ  ਨੂੰ ਗਤੀ ਮਿਲ ਸਕੇ। ਇਸ ਸਹਿਯੋਗ ਤੋਂ ਡਿਜੀਟਲ ਭੁਗਤਾਨ ਹੱਲਾਂ, ਵਿੱਤੀ ਬੁਨਿਆਦੀ ਢਾਂਚੇ ਅਤੇ ਸਟਾਰਟਅੱਪ ਸਹਾਇਤਾ ਪ੍ਰੋਗਰਾਮਾਂ ਦਾ ਲਾਭ ਉਠਾ ਕੇ ਸ਼ੁਰੂਆਤੀ ਅਤੇ ਵਿਕਾਸ-ਪੜਾਅ ਦੇ ਸਟਾਰਟਅੱਪਸ ਨੂੰ ਕੁਸ਼ਲਤਾ ਨਾਲ ਸਕੇਲ ਕਰਨ ਵਿੱਚ ਮਦਦ ਕਰਨ ਦੀ ਉਮੀਦ ਹੈ। ਇਹ ਸਹਿਯੋਗ ਸਟਾਰਟਅੱਪਸ ਨੂੰ ਆਪਣੇ ਕਾਰਜਾਂ ਨੂੰ ਰਸਮੀ ਰੂਪ ਦੇਣ, ਬਣਾਉਣ ਅਤੇ ਵਿਸਤਾਰ ਕਰਨ ਵਿੱਚ ਮਦਦ ਕਰਨ ਲਈ ਇਨਕਾਰਪੋਰੇਸ਼ਨ ਸਪੋਰਟ, ਸਲਾਹ ਅਤੇ ਢਾਂਚਾਗਤ ਮਾਰਗਦਰਸ਼ਨ ਵੀ ਪ੍ਰਦਾਨ ਕਰੇਗਾ। 

ਇਸ ਪਹਿਲ ਦੇ ਹਿੱਸੇ ਦੇ ਰੂਪ ਵਿੱਚ, ਸ਼ੁਰੂਆਤੀ ਪੜਾਅ ਦੇ ਸੰਸਥਾਪਕਾਂ ਦੀ ਮਦਦ ਲਈ 'ਸਟਾਰਟਅੱਪ ਸਹਾਇਕ' ਨਾਮਕ ਸਮਰਪਿਤ ਪਲੈਟਫਾਰਮ ਸ਼ੁਰੂ ਕੀਤਾ ਗਿਆ ਹੈ। ਇਸ ਪਲੈਟਫਾਰਮ  ਦਾ ਉਦੇਸ਼ ਸ਼ੁਰੂ ਤੋਂ ਅੰਤ ਤੱਕ ਸਹਾਇਤਾ ਪ੍ਰਦਾਨ ਕਰਨਾ ਹੈ, ਜਿਸ ਵਿੱਚ ਕੰਪਨੀ ਨਿਗਮ, ਕੇਂਦਰ ਅਤੇ ਰਾਜ ਸਰਕਾਰ ਦੀਆਂ ਯੋਜਨਾਵਾਂ ਅਤੇ ਪ੍ਰੋਗਰਾਮਾਂ ਤੱਕ ਪਹੁੰਚ, ਫੰਡਿੰਗ ਦੇ ਮੌਕਿਆਂ 'ਤੇ ਮਾਰਗਦਰਸ਼ਨ ਸ਼ਾਮਲ ਹੈ; ਇਸ ਤਰ੍ਹਾਂ, ਇਹ ਸਟਾਰਟਅੱਪਸ ਨੂੰ ਇੱਕ ਢਾਂਚਾਗਤ ਇੰਟਰਫੇਸ ਰਾਹੀਂ ਜ਼ਰੂਰੀ ਈਕੋਸਿਸਟਮ ਸਹਾਇਤਾ ਤੱਕ ਪਹੁੰਚ ਕਰਨ ਦੇ ਯੋਗ ਬਣਾਉਂਦਾ ਹੈ।

ਡੀਪੀਆਈਆਈਟੀ ਦੇ ਸੰਯੁਕਤ ਸਕੱਤਰ ਸ਼੍ਰੀ ਸੰਜੀਵ ਨੇ ਕਿਹਾ ਕਿ ਇਹ ਸਹਿਯੋਗ ਪ੍ਰਮੁੱਖ ਫਿਨਟੈਕ ਕੰਪਨੀਆਂ ਨਾਲ ਸਾਂਝੇਦਾਰੀ ਰਾਹੀਂ ਭਾਰਤ ਦੇ ਸਟਾਰਟਅੱਪ ਈਕੋਸਿਸਟਮ ਨੂੰ ਮਜ਼ਬੂਤ ​​ਕਰਨ ਲਈ ਵਿਭਾਗ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ। ਉਨ੍ਹਾਂ ਇਸ ਗੱਲ ‘ਤੇ ਜ਼ੋਰ ਦਿੱਤਾ ਕਿ ਵਿੱਤੀ ਬੁਨਿਆਦੀ ਢਾਂਚੇ ਅਤੇ ਸਾਧਨਾਂ ਤੱਕ ਨਿਰਵਿਘਨ ਪਹੁੰਚ ਦੀ ਸਹੂਲਤ ਸਟਾਰਟਅੱਪ ਵਿਕਾਸ ਨੂੰ ਤੇਜ਼ ਕਰਨ ਵਿੱਚ ਮੁੱਖ ਭੂਮਿਕਾ ਨਿਭਾਏਗੀ।

Razorpay ਦੇ ਸੀਈਓ ਅਤੇ ਸਹਿ-ਸੰਸਥਾਪਕ ਸ਼੍ਰੀ ਹਰਸ਼ਿਲ ਮਾਥੁਰ ਨੇ ਕਿਹਾ ਕਿ ਇਹ ਭਾਈਵਾਲੀ ਨਵੀਨਤਾ ਨੂੰ ਸਮਰੱਥ ਬਣਾਉਣ ਅਤੇ ਉੱਦਮੀ ਯਾਤਰਾ ਨੂੰ ਵਧੇਰੇ ਪਹੁੰਚਯੋਗ ਅਤੇ ਸਕੇਲੇਬਲ ਬਣਾਉਣ ਦੇ ਸਾਂਝੇ ਦ੍ਰਿਸ਼ਟੀਕੋਣ ਦੁਆਰਾ ਸੰਚਾਲਿਤ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਦੇਸ਼ ਭਰ ਵਿੱਚ ਸਟਾਰਟਅੱਪਸ ਦੇ ਵਧਦੇ ਉਭਾਰ ਦੇ ਨਾਲ, ਖਾਸ ਕਰਕੇ ਟੀਅਰ 2 ਅਤੇ ਟੀਅਰ 3 ਸ਼ਹਿਰਾਂ ਵਿੱਚ, ਮਜ਼ਬੂਤ ​​ਬੁਨਿਆਦੀ ਢਾਂਚੇ, ਸਲਾਹ ਅਤੇ ਈਕੋਸਿਸਟਮ ਸਹਾਇਤਾ ਦੀ ਜ਼ਰੂਰਤ ਵੀ ਵਧ ਰਹੀ ਹੈ।

ਇਸ ਸਹਿਯੋਗ ਦੇ ਤਹਿਤ, ਡੀਪੀਆਈਆਈਟੀ ਅਤੇ Razorpay ਸਟਾਰਟਅੱਪ ਇੰਡੀਆ ਹੱਬ ਰਾਹੀਂ ਲਾਗੂ ਆਰਟੀਫਿਸ਼ੀਅਲ ਇੰਟੈਲੀਜੈਂਸ, ਮਾਰਕੀਟਿੰਗ, ਉਤਪਾਦ ਵਿਕਾਸ ਅਤੇ ਵਿੱਤੀ ਪ੍ਰਬੰਧਨ ਵਰਗੇ ਵਿਸ਼ਿਆਂ 'ਤੇ ਨਿਯਮਿਤ ਗਿਆਨ ਸੈਸ਼ਨ ਆਯੋਜਿਤ ਕਰਨਗੇ ਤਾਂ ਜੋ ਵੱਧ ਤੋਂ ਵੱਧ ਪਹੁੰਚ ਨੂੰ ਯਕੀਨੀ ਬਣਾਇਆ ਜਾ ਸਕੇ। ਡੀਪੀਆਈਆਈਟੀ  ਦੁਆਰਾ ਮਾਨਤਾ ਪ੍ਰਾਪਤ ਸਟਾਰਟਅੱਪਸ ਨੂੰ ਬਿਨਾ ਕਿਸੇ ਪੇਸ਼ੇਵਰ ਫੀਸ (ਲਾਗੂ ਸਰਕਾਰੀ ਫੀਸਾਂ ਨੂੰ ਛੱਡ ਕੇ) ਕੰਪਨੀ ਬਣਾਉਣ ਵਿੱਚ ਸਹਾਇਤਾ ਕੀਤੀ ਜਾਵੇਗੀ। ਉਨ੍ਹਾਂ ਨੂੰ ਵੱਖ-ਵੱਖ ਵਿੱਤੀ ਅਤੇ ਬਿਜਨਸ ਟੂਲਸ 'ਤੇ ਕਰਜ਼ਿਆਂ ਅਤੇ ਛੋਟਾਂ ਦਾ ਲਾਭ ਵੀ ਮਿਲੇਗਾ ।

ਸਟਾਰਟਅੱਪਸ ਨੂੰ ਉਨ੍ਹਾਂ ਦੇ ਸ਼ੁਰੂਆਤੀ ਪੜਾਅ ਦੇ ਵਿਕਾਸ ਵਿੱਚ ਸਹਾਇਤਾ ਲਈ ਸਲਾਹਕਾਰ ਸਹਾਇਤਾ, ਪਿੱਚ ਡੈੱਕ ਰਿਵਿਯੂ, ਐਪਲੀਕੇਸ਼ਨ ਮਾਰਗਦਰਸ਼ਨ ਅਤੇ ਵਿਸ਼ੇਸ਼ ਤੌਰ ‘ਤੇ ਸਰੋਤ ਵੀ ਪ੍ਰਾਪਤ ਹੋਣਗੇ। ਚੁਣੇ ਹੋਏ ਸਟਾਰਟਅੱਪਸ ਨੂੰ ਵਿਸ਼ੇਸ਼ ਤੌਰ 'ਤੇ ਤਿਆਰ ਕੀਤੇ ਗਏ ਸੰਸਥਾਪਕ ਭਾਈਚਾਰਿਆਂ ਵਿੱਚ ਸ਼ਾਮਲ ਕੀਤਾ ਜਾਵੇਗਾ ਤਾਂ ਜੋ ਉਹ ਆਪਣੇ ਸਾਥੀਆਂ, ਨੈੱਟਵਰਕ ਤੋਂ ਸਿੱਖ ਸਕਣ, ਅਤੇ ਇੰਜੀਨੀਅਰਿੰਗ, ਹਾਈਰਿੰਗ ਅਤੇ ਮਾਰਕੀਟਿੰਗ ਵਰਗੇ ਖੇਤਰਾਂ ਵਿੱਚ ਵਾਧੂ ਈਕੋਸਿਸਟਮ ਸਹਾਇਤਾ ਪ੍ਰਾਪਤ ਕਰ ਸਕਣ।

ਇਹ ਸਹਿਯੋਗ 'ਭਾਰਤ ਸਟਾਰਟਅੱਪ ਗ੍ਰੈਂਡ ਚੈਲੇਂਜ' ਫਰੇਮਵਰਕ ਦੇ ਤਹਿਤ ਇਨੋਵੇਸ਼ਨ ਚੁਣੌਤੀਆਂ ਦੇ ਆਯੋਜਨ ਦੀਆਂ ਸੰਭਾਵਨਾਵਾਂ ਦੀ ਵੀ ਪੜਚੋਲ ਕਰੇਗਾ, ਜਿਸ ਵਿੱਚ ਫਿਨਟੈਕ-ਅਧਾਰਿਤ ਸਮੱਸਿਆਵਾਂ ਅਤੇ ਡਿਜੀਟਲ ਇਨੋਵੇਸ਼ਨ 'ਤੇ ਵਿਸ਼ੇਸ਼ ਧਿਆਨ ਦਿੱਤਾ ਜਾਵੇਗਾ।

ਇਸ ਸਮਝੌਤੇ 'ਤੇ ਡੀਪੀਆਈਆਈਟੀ ਦੇ ਡਿਪਟੀ ਸੈਕਟਰੀ ਸ਼੍ਰੀ ਟੀ. ਐਲ. ਕੇ. ਸਿੰਘ ਅਤੇ Razorpay ਦੇ ਮੁੱਖ ਸੂਚਨਾ ਅਧਿਕਾਰੀ ਸ਼੍ਰੀ ਆਰਿਫ ਖਾਨ ਨੇ ਦੋਵਾਂ ਸੰਗਠਨਾਂ ਦੇ ਅਧਿਕਾਰੀਆਂ ਦੀ ਮੌਜੂਦਗੀ ਵਿੱਚ ਦਸਤਖਤ ਕੀਤੇ।

 

*****

ਅਭਿਸ਼ੇਕ ਦਯਾਲ/ਸ਼ਬੀਰ ਆਜ਼ਾਦ/ਅਨੁਸ਼ਕਾ ਪਾਂਡੇ 

(Release ID: 2245818) ਵਿਜ਼ੀਟਰ ਕਾਊਂਟਰ : 8