‘‘సేవ, సంచాలన్ కోసం భాషిణి- ఓ భాషిణి సహయోగి కార్యక్రమం’’ పేరిట చేపట్టిన కార్యక్రమంలో భాగంగా డిజిటల్ ఇండియా భాషిణి విభాగం (డీఐబీడీ),  ఎలక్ట్రానిక్స్, సమాచార సాంకేతిక విజ్ఞాన విభాగం (ఎమ్ఈఐటీవై), పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ (పీఎఫ్ఆర్‌డీఏ)లు ఓ అవగాహన ఒప్పందంపై సంతకాలు చేశాయి. దేశంలో జాతీయ భాషా డిజిటల్ పబ్లిక్ ఇన్‌ఫ్రాస్ట్రక్చర్ ‘భాషిణి వేదిక’తో అనుసంధానాన్ని ఏర్పరుచుకోవడం ద్వారా పింఛన్ నిధి సేవల అనుబంధ విస్తారిత వ్యవస్థలో వివిధ భాషల్లో డిజిటల్ సామర్థ్యాల్ని బలోపేతం చేయడం ఈ సహకార పూర్వక ఒప్పందాన్ని కుదుర్చుకోవడంలో ముఖ్యోద్దేశం.

ఈ అవగాహన ఒప్పందం (ఎమ్ఓయూ) పింఛన్ రంగంలో భాష వ్యాప్తిని పెంచుతుంది. డిజిటల్ వేదికలలో, వినియోగదారురకు ఎలాంటి ఇబ్బందులూ లేకుండా పీఎఫ్‌ఆర్‌డీఏ ప్రణాళికలనూ, భాషిణి అనువాద ఏపీఐలూ, బహుభాషా ఏఐ మాడళ్లు, స్వర-ఆధారిత సాంకేతికతల ఏకీకరణనూ దృష్టిలో పెట్టుకొని ఒక ప్రణాళిక (ఫ్రేమ్‌వర్క్)ను కూడా రూపొందిస్తుంది.
రాజ్యాంగం ఎనిమిదో షెడ్యూలులో పేర్కొన్న 22 భాషల్లో చాలా వరకూ భాషల్లో పీఎఫ్ఆర్‌డీఏ కార్యకలాపాలూ, సమాచార వ్యవస్థలు అందుబాటులోకి రావడానికి ఈ కార్యక్రమం మార్గాన్ని సుగమం చేస్తుంది. ఈ క్రమంలో మరింత మంది వినియోగదారులకూ, ఆసక్తిదారులకూ మేలు కలుగుతుంది.
ఈ సహకార ప్రభావాన్ని పీఎఫ్ఆర్‌డీఏ కార్యనిర్వాహక డైరెక్టరు మమతా రోహిత్ వివరిస్తూ... ‘‘పింఛన్ వ్యవస్థలు ప్రభావాన్వితంగా విస్తరించాలంటే భాషా సంబంధమైన ఇబ్బందుల్ని తొలగించడం ఎంతయినా అవసరం. భాషిణి వంటి వేదిక మాకు ప్రజలు వారికి నచ్చిన భాషల్లో లావాదేవీలను పూర్తి చేసుకోవడానికి అవకాశాన్ని కల్పిస్తుంది. ఫలితంగా కమ్యూనికేషన్ ఇప్పటి కన్నా చాలా సులభంగానూ, సందర్భాధారితంగానూ మారిపోతుంది. ఇది మొదటి సారి పొదుపు చేస్తున్న వారికీ, భాష పరమైన ఇబ్బందుల వల్ల సాంప్రదాయిక పదవీ విరమణ ప్రణాళిక పరిధికి వెలుపలే ఉండిపోయిన వారి చెంతకూ చేరుకోవడంలో ముఖ్య పాత్రను పోషిస్తుంది. ఈ విధంగా ఆర్థిక సేవల్ని సమాజంలో ఎక్కువ మందికి అందించే కార్యక్రమానికి బలం చేకూరుతుంద’’న్నారు.
ఈ సహకారంలో, నిర్దిష్ట తోడ్పాటు ద్వారా భాషాపరమైన డేటాసెట్లను సమృద్ధపరచడాన్ని ఒక భాగంగా చేర్చారు. దీంతో సంస్థాగత ఉపయోగం కోసం బహుభాషా ఏఐ వ్యవస్థల పనితీరునీ, వ్యాప్తి సామర్థ్యాన్నీ నిరంతరంగా మెరుగు పరచడం సాధ్య పడుతుంది. ఈ ప్రయత్నాలను విశాల ‘భాషిణి సహయోగి’ ప్రణాళికలో భాగంగా చేపడతారు. దీంతో మారుతున్న ప్రాంతీయ అవసరాలకు అనుగుణంగా ఏఐ మాడళ్లను వినియోగించుకోవచ్చును.
డిజిటల్ ఇండియా భాషిణి విభాగం ముఖ్య కార్యనిర్వహణ అధికారి (సీఈఓ) శ్రీ అమితాబ్ నాగ్ మాట్లాడుతూ, ‘‘కీలక ఆర్థిక సేవల్ని వివిధ భాషల్లోనూ, స్వరాధారితంగానూ అందించడాన్ని ఇప్పటి కన్నా విస్తరించే దిశగా పీఎఫ్ఆర్‌డీఏతో కుదిరిన ఈ సహకారం ఒక మేలి మలుపు. దీంతో పెద్ద ఎత్తున సేవల లభ్యత సాధ్యపడుతుంది. పౌర ప్రయోజనాలకు పెద్దపీట వేస్తూ, డిజిటల్ పాలనను దేశంలో ప్రతి ఒక్కరి వద్దకూ తీసుకు పోవచ్చు’’ అని కూడా ఆయన అన్నారు.
ఈ అవగాహన ఒప్పందం కుదరడం దేశ జన సంఖ్య విస్తృతి, భాషల స్వరూపం.. ఈ అంశాలను దృష్టిలో పెట్టుకొంటే ‘భాషిణి’ పోషించగల భూమికను పటిష్ఠ పరుస్తుంది. పాలనతో పాటు ఆర్థిక సేవల రంగాల్లో సమ్మిళిత, సురక్షిత, అంతర్ నిర్వహణీయ బహుభాషా ఏఐ వ్యవస్థల అభివృద్ధికీ ఈ ఒప్పందం తన వంతు తోడ్పాటును అందిస్తుంది.
పీఎఫ్ఆర్‌డీఏ కేంద్ర ప్రభుత్వం ఏర్పాటు చేసిన ఒక చట్టబద్ధ నియంత్రణ సంస్థ. దేశంలో పింఛన్ రంగం నియంత్రించడంతో పాటు, ఈ రంగాన్ని ప్రోత్సహించే, ప్రగతిపథంలో నడిపే బాధ్యతలను ఈ సంస్థకు అప్పగించారు.

 

‘భాషిణి’ని గురించి
భాషా ఇంటర్‌ఫేస్ ఫర్ ఇండియా (బీహెచ్ఏఎస్‌హెచ్ఐఎన్ఐ..‘భాషిణి’) కేంద్ర ప్రభుత్వ ఎలక్ట్రానిక్స్, సమాచార సాంకేతిక విజ్ఞాన మంత్రిత్వ శాఖ (ఎమ్ఈఐటీవై)లో భాగంగా ఉన్న కృత్రిమ మేధ (ఏఐ) చోదక శక్తిగా పనిచేస్తున్న ఒక భాషా ప్రధాన సాంకేతిక కార్యక్రమం. ఇది 36 కన్నా ఎక్కువ టెక్స్టులు, 23 వాయిసులతో పాటు 35 అంతర్జాతీయ భాషలకు విస్తరించిన బహుభాషా ఏఐ సామర్థ్యాలకు దన్నుగా నిలుస్తోంది. ఇది అక్షరాస్యత, భాషల మధ్య అంతరాన్ని భర్తీ చేస్తోంది. ఎలక్ట్రానిక్స్, సమాచార సాంకేతిక విజ్ఞాన శాఖ ‘జాతీయ భాషా అనువాద మిషన్’లో భాగంగా మొదలుపెట్టిన ఈ కార్యక్రమాన్ని డిజిటల్ సేవలను బహుళ భాషల్లో అందించేందుకు అనువుగా రూపొందించారు. దీని ఏఐ ఆధారిత వేదిక భారతీయ భాషల్లో అనువాదానికీ, స్వర-ఆధారిత ఇంటరాక్షన్‌‌కీ వీలు కల్పిస్తుంది. ప్రభుత్వ కార్యక్రమాల్నీ, ప్రభుత్వ రంగ సంస్థలకు చెందిన కార్యక్రమాల్నీ విస్తృత జనసమూహం చెంతకు ప్రభావవంతంగా చేర్చడంలో ఇది సాయపడుతోంది.

 

***

(రిలీజ్ ఐడి: 2245749) సందర్శకుల సూచీ సంఖ్య : : 5