قبائلی کاریگروں کو بااختیار بنانے اور مقامی مصنوعات کے فروغ کی سمت ایک اہم قدم کے طور پر، محکمۂ ڈاک (ڈی او پی)، وزارتِ مواصلات نے ٹرائیفیڈ (ٹرائیبل کوآپریٹو مارکیٹنگ ڈیولپمنٹ فیڈریشن آف انڈیا) کے ساتھ، جو وزارتِ قبائلی امور کے تحت کام کرتا ہے، ایک مفاہمت نامہ پر دستخط کیے ہیں۔

اس شراکت داری کا مقصد ایک مضبوط، قابلِ اعتماد اور کم لاگت لاجسٹکس نظام قائم کرنا ہے تاکہ ٹرائیفیڈ کے ای کامرس پلیٹ فارم، بشمول ٹرائبس انڈیا ای-مارکیٹ پلیس کے ذریعے فروخت ہونے والی مصنوعات کی ترسیل کو بہتر بنایا جا سکے۔

مفاہمت نامہ کے تحت محکمۂ ڈاک ٹرائیفیڈ کے آن لائن پلیٹ فارمز کے ذریعے دیے گئے تمام آرڈرز کے لیے مکمل لاجسٹکس سہولیات فراہم کرے گا۔ اپنے وسیع قومی نیٹ ورک اور آخری میل کنیکٹیویٹی کے ذریعے محکمۂ ڈاک ملک بھر میں قبائلی مصنوعات کی ہموار وصولی، ترسیل اور ڈیلیوری کو یقینی بنائے گا۔

یہ اشتراک قبائلی کاریگروں اور کاروباری افراد کے لیے مارکیٹ تک رسائی کو مضبوط بنانے، آرڈرز کی مؤثر تکمیل اور صارفین کے بہتر تجربے کو یقینی بنانے کے لیے ترتیب دیا گیا ہے۔ محکمۂ ڈاک شپمنٹ ٹریکنگ، باقاعدہ ایم آئی ایس رپورٹنگ اور ٹرائیفیڈ کے ڈیجیٹل پلیٹ فارم کے ساتھ اے پی آئی انضمام بھی فراہم کرے گا تاکہ آرڈر پروسیسنگ اور لاجسٹکس مینجمنٹ میں آسانی ہو۔

اس معاہدے کے تحت نیشنل اکاؤنٹ فیسلٹی کے ذریعے ٹرائیفیڈ کے لیے بک ناؤ پے لیٹر (بی این پی ایل) اکاؤنٹ قائم کیا جائے گا، جس سے اسپیڈ پوسٹ کے ذریعے ترسیل کے لیے بکنگ اور ادائیگی کے عمل کو آسان بنایا جا سکے گا۔

دوسری جانب ٹرائیفیڈ مناسب پیکجنگ، لیبلنگ اور آرڈر سے متعلق معلومات کی فراہمی کو یقینی بنائے گا تاکہ لاجسٹکس کا عمل مؤثر طریقے سے انجام دیا جا سکے۔ یہ اقدام ملک بھر کے مختلف علاقائی دفاتر سے مصنوعات کی اٹھان کو ممکن بنائے گا، جس سے وسیع جغرافیائی رسائی اور آپریشنل کارکردگی میں اضافہ ہوگا۔

یہ شراکت داری حکومت کے اس عزم کی عکاسی کرتی ہے کہ قبائلی روزگار کو ڈیجیٹل معیشت سے جوڑ کر فروغ دیا جائے۔ بہتر لاجسٹکس کے ذریعے قبائلی برادریوں کی آمدنی میں اضافہ، مصنوعات کی رسائی میں توسیع اور جامع اقتصادی ترقی کو فروغ ملنے کی توقع ہے۔

یہ مفاہمت نامہ ابتدائی طور پر دو سال کے لیے مؤثر ہوگا، جس میں باہمی اتفاق سے وقتاً فوقتاً جائزہ اور توسیع کی گنجائش رکھی گئی ہے۔

 

************

ش ح ۔ ا   م    ۔  م  ص

(U : 4940   )

(ریلیز آئی ڈی: 2245422) وزیٹر کاؤنٹر : 5