ਪੱਤਰ ਸੂਚਨਾ ਦਫ਼ਤਰ, ਜਲੰਧਰ ਵੱਲੋਂ ਆਯੋਜਿਤ ਮੀਡੀਆ ਟੂਰ ਦੇ ਤਹਿਤ ਪੰਜਾਬ ਅਤੇ ਹਿਮਾਚਲ ਪ੍ਰਦੇਸ਼ ਦੇ ਪੱਤਰਕਾਰਾਂ ਦੇ ਵਫ਼ਦ ਨੇ ਅੱਜ ਸਾਏਰੰਗ ਰੇਲਵੇ ਸਟੇਸ਼ਨ ਦਾ ਦੌਰਾ ਕੀਤਾ। ਮੀਡੀਆ ਟੂਰ ਦੇ ਪਹਿਲੇ ਦਿਨ ਵਫ਼ਦ ਨੂੰ ਬਈਰਬੀ-ਸਾਏਰੰਗ ਨਵੀਂ ਰੇਲਵੇ ਲਾਈਨ ਦੇ ਪਰਿਵਰਤਨਕਾਰੀ ਪ੍ਰਭਾਵ ਨੂੰ ਦੇਖਣ ਦਾ ਮੌਕਾ ਮਿਲਿਆ। ਪੱਤਰਕਾਰਾਂ ਦਾ ਸਵਾਗਤ ਰੇਲਵੇ ਅਧਿਕਾਰੀਆਂ ਦੀ ਇੱਕ ਟੀਮ ਨੇ ਕੀਤਾ, ਜਿਸ ਵਿੱਚ ਟ੍ਰੈਫਿਕ ਇੰਸਪੈਕਟਰ ਸ਼੍ਰੀ ਗੌਰਵ ਯਾਦਵ ਅਤੇ ਸ਼੍ਰੀ ਸੰਜੇ ਚੰਦਾ ਅਤੇ ਸਟੇਸ਼ਨ ਮਾਸਟਰ ਸ਼੍ਰੀ ਗੁੱਡੂ ਕੁਮਾਰ ਅਤੇ ਸ਼੍ਰੀ ਮਲਯ ਨੰਦੀ ਸ਼ਾਮਲ ਸਨ।

ਬਈਰਬੀ-ਸਾਏਰੰਗ ਰੇਲਵੇ ਲਾਈਨ ਪ੍ਰੋਜੈਕਟ ਮਿਜ਼ੋਰਮ ਲਈ ਇੱਕ ਇਤਿਹਾਸਕ ਸੁਪਨੇ ਦੇ ਪੂਰਾ ਹੋਣ ਦਾ ਪ੍ਰਤੀਕ ਹੈ। ਸਤੰਬਰ, 2025 ਵਿੱਚ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਵੱਲੋਂ ਅਧਿਕਾਰਤ ਤੌਰ 'ਤੇ ਇਸ 51.38 ਕਿੱਲੋਮੀਟਰ ਲੰਬੀ ਰੇਲ ਲਾਈਨ ਦਾ ਉਦਘਾਟਨ ਕੀਤਾ ਗਿਆ ਸੀ। ਇਸ ਰੇਲ ਮਾਰਗ ਵਿੱਚ 142 ਪੁਲ ਸ਼ਾਮਲ ਹਨ—55 ਵੱਡੇ ਅਤੇ 87 ਛੋਟੇ—ਨਾਲ ਹੀ 5 ਰੋਡ ਓਵਰ-ਬ੍ਰਿਜ ਅਤੇ 8 ਰੋਡ ਅੰਡਰ-ਬ੍ਰਿਜ ਵੀ ਹਨ।

ਇਸ ਪ੍ਰੋਜੈਕਟ ਦੀਆਂ ਸਭ ਤੋਂ ਪ੍ਰਮੁੱਖ ਵਿਸ਼ੇਸ਼ਤਾਵਾਂ ਵਿੱਚੋਂ ਇੱਕ ਪੁਲ ਨੰਬਰ 196 (ਪੁਰਾਣਾ)/144 (ਨਵਾਂ) ਹੈ। ਇਹ ਪੁਲ ਨਦੀ ਦੇ ਤਲ ਤੋਂ 114 ਮੀਟਰ ਦੀ ਹੈਰਾਨੀਜਨਕ ਉਚਾਈ ਤੱਕ ਪਹੁੰਚਦਾ ਹੈ। ਕੁਤੁਬ ਮੀਨਾਰ ਤੋਂ 42 ਮੀਟਰ ਉੱਚਾ ਇਹ ਪੁਲ ਵਰਤਮਾਨ ਵਿੱਚ ਭਾਰਤੀ ਰੇਲਵੇ ਨੈੱਟਵਰਕ ਦਾ ਸਭ ਤੋਂ ਉੱਚਾ ਪੀਅਰ ਬ੍ਰਿਜ (pier bridge) ਹੈ। 160 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਿਆ ਇਹ ਪੁਲ ਪਹਾੜੀ ਖੇਤਰ ਵਿੱਚ ਰੇਲ ਸੰਪਰਕ ਲਿਆਉਣ ਲਈ ਲੋੜੀਂਦੀ ਤਕਨੀਕੀ ਉੱਤਮਤਾ ਦਾ ਪ੍ਰਤੀਕ ਹੈ।

ਵਰਤਮਾਨ ਵਿੱਚ, ਇਹ ਟ੍ਰੈਕ ਲੰਬੀ ਦੂਰੀ ਦੀਆਂ ਅਤੇ ਖੇਤਰੀ ਸੇਵਾਵਾਂ ਦਾ ਸਮਰਥਨ ਕਰਦਾ ਹੈ, ਜਿਨ੍ਹਾਂ ਵਿੱਚ ਆਈਜ਼ੌਲ-ਦਿੱਲੀ ਰਾਜਧਾਨੀ ਐਕਸਪ੍ਰੈੱਸ (ਆਨੰਦ ਵਿਹਾਰ ਟਰਮੀਨਲ ਰਾਹੀਂ), ਆਈਜ਼ੌਲ-ਕੋਲਕਾਤਾ ਐਕਸਪ੍ਰੈੱਸ, ਆਈਜ਼ੌਲ-ਗੁਹਾਟੀ ਐਕਸਪ੍ਰੈੱਸ ਅਤੇ ਸਾਏਰੰਗ-ਸਿਲਚਰ ਪੈਸੰਜਰ ਰੇਲ ਸ਼ਾਮਲ ਹਨ। ਇਹ ਸੇਵਾਵਾਂ ਮਿਜ਼ੋਰਮ ਦੇ ਲੋਕਾਂ ਨੂੰ ਸੁਰੱਖਿਅਤ, ਕੁਸ਼ਲ ਅਤੇ ਲਾਗਤ-ਪ੍ਰਭਾਵਸ਼ਾਲੀ ਯਾਤਰਾ ਵਿਕਲਪ ਪ੍ਰਦਾਨ ਕਰਦੀਆਂ ਹਨ, ਜਿਸ ਨਾਲ ਦਹਾਕਿਆਂ ਦੀ ਭੂਗੋਲਿਕ ਅਲਹਿਦਗੀ ਖ਼ਤਮ ਹੋ ਗਈ ਹੈ ਅਤੇ ਰਾਜ ਸਿੱਧਾ ਰਾਸ਼ਟਰੀ ਰੇਲ ਗਰਿੱਡ ਨਾਲ ਜੁੜ ਗਿਆ ਹੈ।

ਇਹ ਰੇਲਵੇ ਕਨੈਕਸ਼ਨ ਸਿਰਫ਼ ਬੁਨਿਆਦੀ ਢਾਂਚਾ ਮਾਤਰ ਨਹੀਂ ਹੈ; ਇਹ ਇੱਕ ਜੀਵਨ ਰੇਖਾ ਹੈ, ਜੋ ਮਿਜ਼ੋਰਮ ਦੇ ਲੋਕਾਂ ਦੇ ਜੀਵਨ ਅਤੇ ਰੋਜ਼ੀ-ਰੋਟੀ ਵਿੱਚ ਕ੍ਰਾਂਤੀ ਲਿਆ ਰਹੀ ਹੈ। ਸਥਾਨਕ ਕਿਸਾਨਾਂ ਅਤੇ ਕਾਰੋਬਾਰਾਂ ਨੂੰ ਵੱਡੀਆਂ ਰਾਸ਼ਟਰੀ ਮੰਡੀਆਂ ਤੱਕ ਪਹੁੰਚ ਪ੍ਰਦਾਨ ਕਰਕੇ, ਇਹ ਰੇਲ ਲਿੰਕ ਆਰਥਿਕ ਵਿਕਾਸ ਨੂੰ ਹੁਲਾਰਾ ਦਿੰਦਾ ਹੈ। ਇਹ ਸਿਹਤ ਸੰਭਾਲ ਅਤੇ ਸਿੱਖਿਆ ਤੱਕ ਪਹੁੰਚ ਨੂੰ ਵੀ ਵਧਾਉਂਦਾ ਹੈ ਅਤੇ ਸੈਰ-ਸਪਾਟਾ ਤੇ ਪ੍ਰਾਹੁਣਚਾਰੀ ਖੇਤਰਾਂ ਵਿੱਚ ਰੁਜ਼ਗਾਰ ਦੇ ਨਵੇਂ ਮੌਕੇ ਪੈਦਾ ਕਰਦਾ ਹੈ। ਇਸ ਤੋਂ ਇਲਾਵਾ, ਇਹ ਲਾਈਨ ਅਨਾਜ ਅਤੇ ਖਾਦਾਂ ਵਰਗੀਆਂ ਜ਼ਰੂਰੀ ਵਸਤੂਆਂ ਦੀ ਭਰੋਸੇਯੋਗ ਅਤੇ ਸਮੇਂ ਸਿਰ ਸਪਲਾਈ ਯਕੀਨੀ ਬਣਾਉਂਦੀ ਹੈ, ਜਿਸ ਨਾਲ ਖੇਤਰੀ ਪਹੁੰਚ ਅਤੇ ਲੌਜਿਸਟਿਕ ਕੁਸ਼ਲਤਾ ਵਿੱਚ ਮਹੱਤਵਪੂਰਨ ਸੁਧਾਰ ਹੋਇਆ ਹੈ।

 

***********

(Release ID: 2244284) ਵਿਜ਼ੀਟਰ ਕਾਊਂਟਰ : 6