مرکزی وزیرتعلیم  جناب دھرمیندر پردھان نے آج آئی آئی ٹی بمبئی میں منعقدہ ’بھارت انوویٹس ڈیپ ٹیک پری سمٹ‘ کے اختتامی اجلاس سے خطاب کیا۔

مرکزی وزیرتعلیم کی صدارت میں پری سمٹ کے موقع پر تقریباً 175 سرمایہ کاروں اور صنعتی رہنماؤں نے ایک راؤنڈ ٹیبل اجلاس میں شرکت کی۔ انہوں نے مختلف شعبوں سے تعلق رکھنے والے جدت کاروں سے بھی تبادلۂ خیال کیا، جن میں توانائی، آب و ہوا و پائیداری، سیمی کنڈکٹرز، خلاء و دفاع، صحت و میڈٹیک، جدید کمپیوٹنگ، بایوٹیکنالوجی، نقل و حرکت و اسمارٹ سٹیز اور انڈسٹری 4.0 شامل ہیں۔ یہ تبادلۂ خیال نمائش کے اسٹالز اور آئی آئی ٹی پویلین کے دورے کے دوران ہوا، جہاں ادارہ جاتی جدتوں کے تحت جدید ترین تحقیق پر مبنی حل پیش کیے گئے۔

وزیر نے سرمایہ کاروں اور تعلیمی ماہرین کے ساتھ ایک راؤنڈ ٹیبل اجلاس میں شرکت کی۔ انہوں نے کہا کہ فرانس کے شہر نیس میں منعقد ہونے والے ’بھارت انوویٹس 2026‘ کے پیش خیمے کے طور پر آج کی اس غور و فکر کی نشست کا مرکز ڈیپ ٹیک جدت کو فروغ دینا، صنعت و تعلیمی اداروں کے درمیان شراکت داری کو مضبوط بنانا اور اسٹارٹ اپ ماحولیاتی نظام کو مستحکم کرنا تھا۔ انہوں نے ابھرتے ہوئے منصوبوں میں مسلسل سرمایہ کاری کی ضرورت پر زور دیا تاکہ وسعت کو ممکن بنایا جا سکے، جدت کی حوصلہ افزائی ہو اور تحقیق پر مبنی کاروباری سرگرمیوں کو فروغ ملے۔

انہوں نے مزید کہا کہ وزارت تعلیم کی قیادت میں منعقد ہونے والا ’بھارت انوویٹس 2026‘  کاہدف  ملک کے کونے کونے سے تحقیق و ترقی (آر اینڈ ڈی) پر مبنی جدتوں کو عالمی سطح پر پیش کرنا ہے، جہاں جدید ترین ٹیکنالوجیز کی نمائش کے ساتھ بامعنی تعاون کو فروغ دیا جائے گا، سرمایہ کاری کے مواقع کو وسعت دی جائے گی اور دیرپا عالمی شراکت داریاں قائم کی جائیں گی۔

اختتامی تقریب میں ڈاکٹر کے رادھاکرشنن، چیئرمین بورڈ آف گورنرز آئی آئی ٹی بمبئی اور سابق چیئرمین اسرو؛ ڈاکٹرونیت جونشی، سکریٹری محکمہ اعلیٰ تعلیم؛ پروفیسر ابھیے کرنڈیکر، سیکریٹری محکمہ سائنس و ٹیکنالوجی اور پروفیسر شیریش کیدارے، ڈائریکٹر آئی آئی ٹی بمبئی بھی شریک ہوئے۔

اس موقع پر خطاب کرتے ہوئے شری پردھان نے کہا کہ’بھارت انوویٹس‘ ہندوستان کے ایک جدت کے عالمی مرکز کے طور پر ابھرتے ہوئے کردار کا واضح ثبوت ہے۔ انہوں نے کہا کہ ہزاروں اسٹارٹ اپس کی شرکت اور جدید ترین ٹیکنالوجیز کی نمائش  ہندوستان کے  اختراعی نظام کی توانائی اور گہرائی کو ظاہر کرتی ہے۔

انہوں نے مشاہدہ کیا کہ ہندوستان نہ صرف اپنے لیے، بلکہ دنیا کے لیے بھی، خصوصاً گلوبل ساؤتھ اور ان ممالک کے لیے جو کم لاگت اور قابل توسیع جدتوں کے متلاشی ہیں، حل تیار کرنے کی منفرد صلاحیت رکھتا ہے۔ انہوں نے مزید کہا کہ ’بھارت انوویٹس‘ ایک ایسا پلیٹ فارم ہے جو خیالات، صلاحیتوں اور وسائل کو یکجا کرتا ہے اور اس طرح جدت کی رفتار کو تیز کرتا ہے۔

جناب پردھان نے پالیسی معاونت ادارہ جاتی تعاون اور سازگار ماحول کے ذریعے اختراع کاروں کی حمایت کے لیے حکومت کے عزم کا اعادہ کیا۔ انہوں نے زور دیا کہ حقیقی اثر پیدا کرنے کے لیے جدت کو تجربہ گاہوں سے نکل کر منڈیوں تک پہنچنا چاہیے۔ انہوں نے اس بات پر اعتماد ظاہر کیا کہ ’بھارت انوویٹس‘ پری سمٹ میں پیش کیے گئے اختراعات، خاص طور پر ٹیکنالوجی اور کاروباری میدان میں گلوبل ساؤتھ کے تناظر میں، ہندوستان کے عالمی قیادت کی جانب سفر میں نمایاں کردار ادا کریں گی۔

فرانس میں منعقد ہونے والے ’بھارت انوویٹس 2026‘ کی عالمی نمائش کے قومی پیش خیمے کے طور پر منعقدہ اس پری سمٹ میں ملک بھر سے موصول ہونے والی 1,186 سے زائد درخواستوں میں سے منتخب کیے گئے 137 باصلاحیت ڈیپ ٹیک اسٹارٹ اپس کو یکجا کیا گیا۔

آج آئی آئی ٹی بمبئی میں منعقدہ اس پری سمٹ میں اسٹارٹ اپ پچنگ سیشنز کا انعقاد کیا گیا، جہاں بانیوں نے جدید ترین جدتیں پیش کیں، جن میں ایڈوانسڈ میٹیریلز، بایوٹیکنالوجی، مصنوعی ذہانت، صاف ٹیکنالوجیز اور اگلی نسل کے مینوفیکچرنگ سسٹمز شامل تھے۔ ان سیشنز میں سرمایہ کاروں، صنعتی رہنماؤں اور جدت کے ماحولیاتی نظام سے وابستہ اہم شراکت داروں نے شرکت کی اور اشتراک و سرمایہ کاری کے مواقع کا جائزہ لیا۔

تقریب میں اسٹارٹ اپس، وینچر کیپیٹل فرموں اور صنعتی نمائندوں   کے درمیان تبادلۂ خیال بھی ہوا، جس سے بامعنی شراکت داریوں کو فروغ ملا اور اسٹارٹ اپس کو تجارتی بنانے اور عالمی منڈیوں میں توسیع کے امکانات تلاش کرنے کا موقع فراہم ہوا۔

آئی آئی ٹی بمبئی میں بھارت انوویٹس ڈیپ ٹیک پری سمٹ نے تعلیمی اداروں ، اسٹارٹ اپس ، سرمایہ کاروں اور پالیسی سازوں کو ایک پلیٹ فارم پر یکجاکرکے ہندوستان کے اختراعی سفر میں ایک اہم سنگ میل کی نشاندہی کی ۔  منتخب اسٹارٹ اپس کا تصور فرانس میں آئندہ بھارت انوویٹس 2026 بین الاقوامی نمائش میں ہندوستان کے ڈیپ ٹیک ماحولیاتی نظام کی نمائندگی کرنے کی سمت میں کام کرنے کے لیے کیا گیا ہے ، جس سے ٹیکنالوجی پر مبنی اختراع کے عالمی مرکز کے طور پر ہندوستان کی پوزیشن مزید مضبوط ہوگی ۔

مزید معلومات کے لیے ملاحظہ کریں: https://bharatinnovates.in/

https://x.com/dpradhanbjp/status/2035654233643757754?s=20

https://x.com/dpradhanbjp/status/2035673340770447847?s=20

https://x.com/dpradhanbjp/status/2035689926252233102?s=20

https://x.com/dpradhanbjp/status/2035691494284439591?s=20

***

ش ح ۔ م ع ن۔ ع ن

U. No.4644

(ریلیز آئی ڈی: 2243727) وزیٹر کاؤنٹر : 10