کاربن مارکیٹس پر بین الاقوامی کانفرنس—پراکرتی 2026، جو حکومتِ ہند کا ایک اہم پروگرام ہے، بیورو آف انرجی ایفیشنسی کی جانب سے وزارتِ توانائی اور وزارتِ ماحولیات، جنگلات و موسمیاتی تبدیلی کی سرپرستی میں آج نئی دہلی میں شروع ہوئی۔ یہ کانفرنس بھارت الیکٹرِسٹی سمٹ 2026 کے تحت منعقد کی جا رہی ہے، جو قومی اور بین الاقوامی ماہرین، پالیسی سازوں، صنعتی رہنماؤں، محققین اور ماہرینِ عمل کو ایک اعلیٰ سطحی پلیٹ فارم فراہم کرتی ہے تاکہ وہ کاربن مارکیٹس کی بدلتی نوعیت، ماحولیاتی اقدامات میں ان کے کردار، اور ہندوستان کی گرین ترقی کے مواقع پر غور و خوض کر سکیں۔اس سال کا موضوع—“این ڈی سی کے نفاذ کے لیے کاربن فنانس کو عالمی شراکت داریوں اور ڈیجیٹل راستوں کے ذریعے فعال بنانا”—اس بات کی عکاسی کرتا ہے کہ ہندوستان مالی وسائل کو متحرک کرنے، تعاون کو مضبوط بنانے اور ڈیجیٹل جدت کو بروئے کار لا کر ماحولیاتی اقدامات کو تیز کرنا چاہتا ہے۔اس موقع پر انڈین کاربن مارکیٹ پورٹل (www.indiancarbonmarket.gov.in)—جو انڈین کاربن مارکیٹ کے نفاذ اور انتظام کے لیے ایک مرکزی پلیٹ فارم ہے—کا افتتاح مرکزی وزیر برائے توانائی و ہاؤسنگ و شہری امور منوہر لال، وزیر مملکت برائے توانائی جناب  شری پد نائک اور دیگر معزز شخصیات نے کیا۔

 

پورٹل کا افتتاح کرتے ہوئے جناب منوہر لال نے وزیر اعظم جناب نریندر مودی کی بصیرت افروز قیادت میں ہندوستان کی ماحولیاتی عہد بندیوں کو آگے بڑھانے میں قائدانہ کردار کو اجاگر کیا۔ انہوں نے کہا کہ ہندوستان نے یہ ثابت کیا ہے کہ ماحولیاتی ذمہ داری اور معاشی ترقی ایک ساتھ چل سکتی ہیں۔ کاربن کریڈٹ ٹریڈنگ اسکیم (سی سی ٹی ایس)، قابلِ تجدید توانائی کی توسیع اور توانائی کی بچت کے پروگراموں جیسے اقدامات کے ذریعے ہندوستان ایک شفاف اور قابلِ اعتماد کاربن مارکیٹ فریم ورک تیار کر رہا ہے، جو طویل مدت میں ایک قومی اثاثہ ثابت ہوگا۔

انہوں نے مزید کہا کہ ہندوستان پہلے ہی ایک شفاف کاربن کریڈٹ تجارتی اسکیم قائم کر چکا ہے، جس میں نو منظور شدہ طریقۂ کار شامل ہیں اور 40 سے زائد رجسٹرڈ ادارے بایو گیس، ہائیڈروجن اور جنگلات کے شعبوں میں منصوبے پیش کر رہے ہیں۔ تعمیل کے حوالے سے تقریباً 490 ذمہ دار اداروں کے لیے سات توانائی پر مبنی شعبوں میں جی ای آئی اہداف مقرر کیے گئے ہیں، تاکہ اخراج میں کمی کو قابلِ تصدیق اور معتبر بنایا جا سکے۔

انہوں نے کاروباری اداروں پر زور دیا کہ وہ کاربن مارکیٹس کو صرف تعمیل کی ضرورت کے طور پر نہ دیکھیں بلکہ اسے جدت، سرمایہ کاری، پائیدار ترقی اور کاروباری مواقع کے لیے ایک اسٹریٹجک موقع کے طور پر اپنائیں، اور کہا کہ یہ ایک ایسا معاشی پلیٹ فارم ثابت ہوگا جو ان تمام پہلوؤں کو فروغ دے گا۔

وزیر مملکت برائے توانائی جناب شری پد نائک نے مضبوط کاربن مارکیٹس کے لیے تین بنیادی ستونوں یا “تین سی” پر زور دیا—قابلِ تصدیق اخراج میں کمی کے لیے ڈیجیٹل ایم آر وی کے ذریعے شفافیت، صاف ٹیکنالوجیز جیسے قابلِ تجدید توانائی اور گرین ہائیڈروجن میں سرمایہ کاری کے لیے سرمایہ، اور پیرس معاہدے کے آرٹیکل 6 کے تحت تعاون۔ انہوں نے قابلِ تجدید توانائی میں ہندوستان کے تیز رفتار عالمی عروج، توانائی کی کارکردگی میں بہتری، اور کاربن کریڈٹ ٹریڈنگ اسکیم (سی سی ٹی ایس) 2023 کے مؤثر نفاذ کو اجاگر کیا، جس میں مختلف شعبوں میں طریقۂ کار کو وسعت دی جا رہی ہے۔

انہوں نے اس بات پر زور دیا کہ یہ پیش رفت اس بات کا ثبوت ہے کہ محتاط ماحولیاتی اقدامات اور معاشی ترقی ایک دوسرے کے معاون ہیں، اور کاربن مارکیٹس اعلیٰ معیار کے اہداف کو فروغ دینے، ایم ایس ایم ایز اور کسانوں کو بااختیار بنانے، اور عالمی سطح پر شفاف نظام تشکیل دینے میں اہم کردار ادا کریں گی۔

 

دو روزہ کانفرنس میں پیرس معاہدہ کریڈٹنگ میکانزم (پی اے سی ایم) کے تحت عالمی کاربن مارکیٹس، تعمیلی فریم ورک، ڈیجیٹل ایم آر وی ٹیکنالوجیز، کاربن بارڈر پالیسیز، عمارتوں اور کولنگ شعبے کو ہندوستان کی سی سی ٹی ایس میں شامل کرنے، کسانوں کو بااختیار بنانے، صاف ٹیکنالوجیوں کے لیے مالی وسائل کی فراہمی، اور کارپوریٹ ماحولیاتی اقدامات جیسے موضوعات پر سیشنز منعقد کیے جائیں گے۔ یہ تمام سیشنز ہندوستان کے اس فعال نقطۂ نظر کو ظاہر کرتے ہیں جس کے ذریعے وہ قابلِ اعتماد، جامع اور عالمی معیار سے ہم آہنگ کاربن مارکیٹس کی تشکیل کر رہا ہے۔

پراکرتی 2026 ہندوستان کے ماحولیاتی اقدامات میں عالمی قیادت کے ابھار کی توثیق کرتا ہے۔ شفافیت، اعتماد اور جدت پر مبنی کاربن مارکیٹ کی تشکیل کے ذریعے ہندوستان نہ صرف اپنی داخلی گرین منتقلی کو تیز کر رہا ہے بلکہ پائیدار ترقی کے لیے عالمی راستوں کی بھی رہنمائی کر رہا ہے۔ یہ کانفرنس ہندوستان کو ماحولیاتی حل کے ایک قابلِ اعتماد مرکز اور کم کاربن مستقبل کی جانب عالمی پیش رفت میں ایک اہم محرک کے طور پر مستحکم کرنے کی سمت ایک فیصلہ کن قدم ہے۔

************

ش ح ۔   م  د ۔  م  ص

(U : 4619   )

(ریلیز آئی ڈی: 2243449) وزیٹر کاؤنٹر : 15