భారత ప్రభుత్వ శాస్త్ర, సాంకేతిక విభాగం (డీఎస్‌టీ) పరిధిలోని స్వయం ప్రతిపత్తి సంస్థ ఇంటర్నేషనల్ అడ్వాన్స్‌డ్ రీసెర్చ్ సెంటర్ ఫర్ పౌడర్ మెటలర్జీ, న్యూ మెటీరియల్స్ (ఏఆర్‌సీఐ), హైదరాబాద్‌లో ఎన్‌డీ-ఎఫ్‌ఈ-బీ (నియోడైమియమ్-ఐరన్-బోరాన్) రేర్ ఎర్త్‌ శాశ్వత అయస్కాంతాల తయారీకి పైలట్‌ ప్లాంట్‌ను ఏర్పాటు చేశారు.

భారత ప్రభుత్వ శాస్త్ర, సాంకేతిక విభాగం డీఎస్‌టీ కార్యదర్శి ప్రొఫెసర్ అభయ్ కరందికర్ ఈ పైలట్ ప్లాంట్‌ను ప్రారంభించారు. ఏఆర్‌సీఐ డైరెక్టర్ డాక్టర్ ఆర్. విజయ్ ఆధ్వర్యంలో జరిగిన ఈ కార్యక్రమంలో... డీఎస్‌టీ మాజీ కార్యదర్శి, ఏఆర్‌సీఐ గవర్నింగ్ కౌన్సిల్ ఛైర్మన్ ప్రొఫెసర్ అశుతోష్ శర్మ, మిధాని మాజీ సీఎండీ, టెక్నికల్ రివ్యూ కమిటీ సభ్యులు డాక్టర్ ఎస్.కె. ఝా, అనుసంధాన్ నేషనల్ రీసెర్చ్ ఫౌండేషన్ (ఏఎన్ఆర్‌ఎఫ్‌) సీఈఓ డాక్టర్ శివకుమార్ కళ్యాణరామన్ తదితరులు గౌరవ అతిథులుగా పాల్గొన్నారు. వీరితో పాటు వివిధ పరిశ్రమలు, జాతీయ సంస్థల ప్రతినిధులు, ఇతర భాగస్వాములు హాజరయ్యారు.

మిశ్రమ లోహం తయారీ నుంచి పూర్తి స్థాయి సింటర్డ్‌ మ్యాగ్నెట్ల ఉత్పత్తి వరకు అన్నీ ఒకేచోట పూర్తి చేసే సమగ్ర విధానంతో ఏఆర్‌సీఐలో ఈ సదుపాయాన్ని ఏర్పాటు చేశారు. పటిష్టమైన, స్వావలంబన తయారీ వ్యవస్థ అభివృద్ధికి ఇది దోహదపడుతుంది.

కీలక ఖనిజాల రంగంలో స్వావలంబన సాధించేందుకు ప్రపంచ రేర్ ఎర్త్ విలువ వ్యవస్థలో భారత్ స్థానాన్ని బలోపేతం చేయటానికి ఈ పైలట్ ప్లాంట్ కీలక ముందడుగుని సూచిస్తుంది. ఎలక్ట్రిక్ వాహనాలు, పునరుత్పాదక ఇంధన వ్యవస్థలు, ఎలక్ట్రానిక్స్, అధునాతన సాంకేతికత తయారీలో ఎన్‌డీ-ఎఫ్‌-బీ అయస్కాంతాలు కీలకమైనవి.

పైలట్‌ ప్లాంట్ ప్రారంభం సందర్భంగా ప్రొఫెసర్ కరందికర్ మాట్లాడుతూ.. ప్రపంచ సరఫరా వ్యవస్థలో తలెత్తుతున్న అస్థిరతలు, స్వచ్ఛ ఇంధనం, అధునాతన తయారీ రంగాల్లో భారతదేశానికి పెరుగుతున్న డిమాండ్‌ దృష్ట్యా కీలక ఖనిజాల విషయంలో వ్యూహాత్మక స్వయంప్రతిపత్తిని సాధించే దిశగా ఈ ప్లాంట్ కీలకమని తెలిపారు. "వికసిత్ భారత్-2047 లక్ష్యంగా సాగుతున్న తరుణంలో వనరుల కొరతను అధిగమించటం, కీలక సాంకేతికతల్లో స్వదేశీ సామర్థ్యాన్ని బలోపేతం చేసుకోవటం అభివృద్ధి వ్యూహంలో అత్యంత కీలకం. ఇలాంటి కార్యక్రమాలు ఇతర దేశాలపై ఆధారపడటాన్ని తగ్గించటమే కాక.. దేశ స్థిరత్వాన్ని, పోటీతత్వాన్ని పెంపొందిస్తాయి" అని వ్యాఖ్యానించారు.

వాణిజ్యపరంగా విస్తరించదగిన ఆవిష్కరణలుగా పరిశోధనలను మార్చేందుకు.. సంస్థాగత వ్యవస్థలు, నిర్దేశిత లక్ష్యాలతో కూడిన కార్యక్రమాల ద్వారా అనుకూలమైన వ్యస్థను ఏర్పాటు చేస్తున్నట్లు ప్రొఫెసర్ కరందికర్ తెలిపారు. అభివృద్ధి చెందుతున్న సాంకేతికతల్లో ప్రపంచంలోనే అగ్రగామిగా భారత్‌ను నిలిపేందుకు పరిశ్రమలు, అంకుర సంస్థలు, విద్యా సంస్థలు తమతో కలిసి రావాలని పిలుపునిచ్చారు.

ప్రస్తుతం ప్రపంచవ్యాప్తంగా రేర్ ఎర్త్ అయస్కాంతాల సరఫరా వ్యవస్థ కేవలం కొన్ని ప్రాంతాలకే పరిమితమైంది. ఇది అభివృద్ధి చెందుతున్న దేశాల ఆర్థిక వ్యవస్థలకు ఇబ్బందికరంగా మారింది. ముడి పదార్థాల సేకరణ నుంచి అయస్కాంతాల తయారీ వరకు ప్రతి దశలోనూ స్వదేశీ పరిజ్ఞానాన్ని, సామర్థ్యాన్ని పెంపొందించుకోవటం వల్ల సరఫరాలో భద్రత, తక్కువ ధరకే లభ్యత, సాంకేతిక రంగంలో అగ్రగామిగా ఎదిగే అవకాశం లభిస్తుంది.

సాంకేతికతను ధ్రువీకరించటానికి, తయారీ ప్రక్రియను మెరుగుపరచటానికి కీలక వేదికగా ఈ పైలట్ ప్లాంట్ నిలుస్తుంది. పరిశ్రమల సహకారానికి, ప్రదర్శనలకు, స్వదేశీ ఆవిష్కరణలను వాణిజ్యపరమైన ఉత్పత్తి స్థాయికి తీసుకెళ్లటానికి.. డీప్ టెక్ అంకుర సంస్థలు, ప్రైవేటు రంగానికి మద్దతివ్వటానికి ఇది దోహదపడుతుంది.

పరిశోధన స్థాయి నుంచి తయారీకి మారడమే ఈ పైలట్ ప్లాంట్ ప్రధాన ఉద్దేశం. నిరంతర ఆవిష్కరణలకు, ప్రక్రియల మెరుగుదలకు, నూతనోత్పత్తుల అభివృద్ధికి ఇది దోహదపడుతుంది" అని ప్రొఫెసర్ శర్మ పేర్కొన్నారు.

 

భారత ఈవీ వ్యవస్థను బలోపేతం చేయటంతో పాటు కీలకమైన సాంకేతికతలను వేగవంతం చేసేందుకు ఉద్దేశించిన మిషన్ ఫర్ అడ్వాన్స్‌మెంట్ ఇన్ హై-ఇంపాక్ట్ ఏరియాస్ (మహా) కార్యక్రమాల గురించి ఏఎన్‌ఆర్‌ఎఫ్‌ సీఈఓ డాక్టర్ శివకుమార్ కళ్యాణరామన్ వివరించారు. పరిశోధనలను ఆచరణలోకి తీసుకువచ్చేందుకు క్రియాశీలక భాగస్వాములుగా ఉండాలని ప్రైవేట్ రంగాలను ఆహ్వానించారు.

అరుదైన మూలకాలను వెలికి తీయటం నుంచి అయస్కాంతాల తయారీ వరకు పూర్తిస్థాయి 'మినరల్-టు-మార్కెట్' వ్యవస్థను ఏఆర్‌సీఐ అభివృద్ధి చేస్తోందని ఆ సంస్థ డైరెక్టర్ డాక్టర్ ఆర్. విజయ్ తెలిపారు. ఇది పరిశోధనలను వాణిజ్య ఉత్పత్తులుగా మార్చటంతో పాటు పరిశ్రమలతో సంబంధాలను మరింత బలోపేతం చేస్తుందని చెప్పారు.

పారిశ్రామిక భాగస్వామ్యాన్ని పెంపొందించటం, నూతన ఆవిష్కరణలను ప్రోత్సహించటం, స్వదేశీ రేర్ ఎర్త్ అయస్కాంత సాంకేతికతను వాణిజ్య స్థాయికి తీసుకెళ్లేందుకు ఈ పైలట్ ప్లాంట్ దోహదపడుతుంది. ఇది భారతదేశంలోని ఎలక్ట్రిక్ వాహన రంగానికి, అధునాతన పదార్థాల తయారీ రంగానికి ఊతమిస్తుంది.

ఈ కార్యక్రమం ఆత్మనిర్భర్ భారత్ సాధనకు, వికసిత్ భారత్-2047 సాకారం దిశగా వేసిన కీలక ముందడుగును సూచిస్తుంది.

 

 

***

(రిలీజ్ ఐడి: 2243349) సందర్శకుల సూచీ సంఖ్య : : 12