ٹیکسٹائل کے مرکزی وزیر، جناب گری راج سنگھ نے اتر پردیش کے شہر آگرہ کا سرکاری دورہ کیا، جس کا مقصد قالین، دستکاری، جوتے سازی اور تکنیکی ٹیکسٹائل جیسے اہم شعبوں کی پیش رفت اور امکانات کا جائزہ لینا تھا۔ اس دورے میں ان شعبوں میں پائیداری، جدت طرازی اور عالمی سطح پر بھارت کی مسابقتی صلاحیت کو بڑھانے پر خصوصی توجہ دی گئی۔

دورے کے دوران وزیر نے ایک قالین سازی کے کارخانے کا معائنہ کیا اور صنعت میں اختیار کیے جانے والے پائیدار پیداواری طریقوں کا جائزہ لیا۔ ان طریقوں میں سبزیوں سے تیار کردہ رنگ، نامیاتی اون اور ماحول دوست عمل شامل ہیں، جو اس شعبے کو بین الاقوامی معیار اور پائیداری کے تقاضوں سے ہم آہنگ بناتے ہیں۔

 

 

جناب گری راج سنگھ نے قالین صنعت سے وابستہ اسٹیک ہولڈروں، بشمول برآمد کنندگان اور ڈیزائنروں سے بھی ملاقات کی۔ گفتگو کے دوران ابھرتے ہوئے عالمی ڈیزائن رجحانات، پائیدار اور متبادل ریشوں جیسے کیلے کے فائبر کی بڑھتی ہوئی اہمیت، اور ”انڈیا ہینڈ میڈ“ برانڈ کی عالمی سطح پر مضبوط پوزیشننگ پر تبادلہ خیال کیا گیا۔ وزیر نے مقامی ٹرینڈ فورکاسٹنگ ٹول جیسے ویژن این ایکس ٹی کے کردار پر زور دیا، جو ڈیزائن کی صلاحیتوں کو بہتر بنانے اور برآمدی مسابقت کو بڑھانے میں مددگار ہیں۔

اس کے بعد وزیر نے جوتے سازی کے ایک یونٹ کا دورہ کیا، جہاں انہوں نے اس شعبے میں ہونے والی پیش رفت کا جائزہ لیا۔ انہوں نے نشاندہی کی کہ تکنیکی ٹیکسٹائل کا استعمال مصنوعات کے معیار اور برآمدی امکانات کو نمایاں طور پر بہتر بنا رہا ہے۔ انہوں نے جوتے سازی کی صنعت میں جدت طرازی کو فروغ دینے میں نوجوان پیشہ ور افراد کے کردار کی بھی تعریف کی۔

 

 

جوتا سازی کی صنعت، تکنیکی ٹیکسٹائل کے شعبے اور متعلقہ صنعتوں کے نمائندگان کے ساتھ ایک اسٹیک ہولڈر میٹنگ منعقد کی گئی۔ اس اجلاس میں درج ذیل اہم امور پر تبادلۂ خیال کیا گیا:

 

• جوتا سازی میں تکنیکی ٹیکسٹائل کے استعمال کو فروغ دینا
• پیداوار اور ڈیزائن میں مصنوعی ذہانت (AI) اور جدید ٹیکنالوجیز کے استعمال کو بڑھانا
• مصنوعات میں جدت اور ڈیزائن کی صلاحیتوں کو مضبوط بنانا
• اعلیٰ معیار اور برآمدات پر مبنی جوتا سازی کی جانب منتقلی کو آسان بنانا
• عالمی جوتا سازی کی منڈی میں بھارت کے حصے کو بڑھانے کے لیے ایک حکمتِ عملی تیار کرنا
• اس شعبے میں تکنیکی ٹیکسٹائل کے بارے میں آگاہی اور اس کے استعمال کو فروغ دینا

وزیر نے اس بات پر زور دیا کہ تکنیکی ٹیکسٹائل بھارت کی جوتا سازی کی صنعت کو ایک اعلیٰ قدر، ڈیزائن پر مبنی اور عالمی سطح پر مسابقتی شعبہ بنانے میں کلیدی کردار ادا کریں گے۔ انہوں نے روایتی صنعتوں جیسے قالین اور دستکاری اور ابھرتے ہوئے شعبوں جیسے تکنیکی ٹیکسٹائل کی معاونت کے لیے حکومت کے عزم کا اعادہ کیا۔

اس دورے کے دوران ایک دستکاری نمائش بھی منعقد کی گئی، جس میں مقامی کاریگروں کی بھرپور ثقافتی وراثت اور ہنر مندی کو پیش کیا گیا۔

مجموعی طور پر، اس دورے میں اس بات کو اجاگر کیا گیا کہ پائیداری، جدت طرازی، ٹیکنالوجی کے استعمال اور اسٹیک ہولڈروں کے باہمی تعاون کے ذریعے بھارت کے ٹیکسٹائل اور متعلقہ شعبوں کو مضبوط بنایا جا سکتا ہے اور ان کی عالمی مسابقت میں اضافہ کیا جا سکتا ہے۔

**********

ش ح۔ ف ش ع

U: 4576

 

(ریلیز آئی ڈی: 2243181) وزیٹر کاؤنٹر : 8