سبز شاہراہ اقدامات نے قومی شاہراہوں کے ساتھ شجرکاری، ماحول دوست تعمیراتی مواد کے استعمال، آبی وسائل کے مؤثر انتظام، اور تعمیر و نگہداشت کے دوران کاربن اخراج میں کمی کے اقدامات کے ذریعے ماحول کے لیے پائیدار سڑک تعمیر کو فروغ دیا ہے۔ ان اقدامات کا مقصد ماحولیاتی توازن کو بہتر بنانا اور شاہراہوں کی ترقی کو ماحول دوست بنانا ہے۔

حکومت کی مختلف پالیسی اصلاحات اور اقدامات کے باعث بنیادی ڈھانچے کی تعمیر میں ری سائیکل شدہ مواد کے استعمال میں مسلسل اضافہ ہو رہا ہے۔ پالیسی فریم ورک پائیدار تعمیراتی طریقوں کی حوصلہ افزائی کرتا ہے اور جہاں تکنیکی طور پر ممکن ہو، منصوبوں میں ری سائیکل اور فضلہ سے تیار کردہ مواد کے استعمال کو فروغ دیتا ہے۔ رہنما خطوط، مشاورتی ہدایات اور تکنیکی ترقی کے ذریعے مسلسل کوششوں نے ایسے ماحول کو فروغ دیا ہے جس سے تعمیراتی سرگرمیوں میں ری سائیکل مواد کے استعمال کی صلاحیت اور قبولیت میں اضافہ ہوا ہے۔

گرین ہائی ویز (شجرکاری، منتقلیٔ شجر، خوبصورتی اور دیکھ بھال) پالیسی 2015 اور انڈین روڈز کانگریس (آئی آر سی): ایس پی: 21 رہنما خطوط کے تحت، قومی شاہراہ منصوبوں میں شجرکاری اور کاربن کے تدارک کے اقدامات کو ماحول دوست ترقی کا حصہ بنایا گیا ہے۔ اس فریم ورک کے تحت قومی شاہراہوں کے درمیانی حصے، اطراف اور دستیاب رائٹ آف وے (آر او ڈبلیو) میں شجرکاری کی جاتی ہے۔ اس کے علاوہ، جہاں شاہراہ کی تعمیر کے لیے درختوں کی کٹائی ضروری ہو، وہاں متبادل شجرکاری اور درختوں کی منتقلی کے اقدامات کیے جاتے ہیں۔

سڑکوں کی تعمیر میں ماحولیاتی تقاضوں کی تکمیل اور پائیدار ترقی کو فروغ دینے کے لیے جدید ٹیکنالوجی کا استعمال بڑھتا جا رہا ہے۔ شاہراہ منصوبوں میں فلائی ایش، پلاسٹک فضلہ، ری کلیمڈ اسفالٹ پیومنٹ (آر اے پی) اور تعمیر و انہدام کے فضلے جیسے ری سائیکل شدہ مواد کے استعمال کی حوصلہ افزائی کی جاتی ہے۔

اس کے علاوہ سبز اقدامات، توانائی مؤثر تعمیراتی ٹیکنالوجی، ڈیجیٹل نگرانی کے نظام اور بہتر ماحولیاتی انتظامی طریقوں کے اپنانے سے اخراج میں کمی، قدرتی وسائل کے تحفظ اور سڑکوں کی تعمیر کے دوران ماحولیاتی اثرات کو کم کرنے میں مدد ملی ہے۔ یہ تمام اقدامات متعلقہ معیارات اور آئی آر سی کے رہنما اصولوں کے مطابق نافذ کیے جاتے ہیں تاکہ شاہراہوں کی ترقی میں ماحولیاتی معیار کی مکمل پاسداری یقینی بنائی جا سکے۔

یہ معلومات مرکزی وزیر برائے سڑک نقل و حمل و شاہراہیں، جناب نتن جے رام گڈکری نے راجیہ سبھا میں ایک سوال کے تحریری جواب میں فراہم کی۔

******

ش ح۔ ش ا ر۔ ول

Uno-4415

(ریلیز آئی ڈی: 2242682) وزیٹر کاؤنٹر : 3