قبائلی امور کے مرکزی وزیر مملکت، جناب درگاداس اوئیکے نے آج راجیہ سبھا کو بتایا کہ نیشنل شیڈیولڈ ٹرائبس فنانس اینڈ ڈیولپمنٹ کارپوریشن (این ایس ٹی ایف ڈی سی)، جو وزارت قبائلی امور کے تحت ایک مرکزی عوامی شعبہ جاتی ادارہ (سی پی ایس ای) ہے، اہل شیڈیولڈ ٹرائب افراد کو آمدنی پیدا کرنے، خود روزگار اور روزی روٹی سے متعلق سرگرمیوں کے لیے رعایتی قرضے فراہم کرتا ہے۔ یہ قرض معاونت مختلف اسکیموں جیسے ٹرم لون اسکیم، آدیواسی مہلا سشکتیکرن یوجنا (اے ایم ایس وائی)، سیلف ہیلپ گروپ کے لیے مائیکرو کریڈٹ اسکیم (ایم سی ایف) اور آدیواسی شکشا رِن یوجنا (اے ایس آر وائی) کے تحت دی جاتی ہے۔ تاہم، گزشتہ پانچ برسوں کے دوران ریاست مہاراشٹر میں نافذ کرنے والی ایجنسیوں کی جانب سے آدیواسی شکشا رِن یوجنا (اے ایس آر وائی) کے تحت کوئی تجویز موصول نہیں ہوئی ہے۔

دور دراز اور قبائلی علاقوں میں آگاہی اور رسائی بڑھانے کے لیے، این ایس ٹی ایف ڈی سی اپنی نافذ کرنے والی ایجنسیوں کے ساتھ مل کر وقتاً فوقتاً آگاہی کیمپوں کا انعقاد کرتا ہے اور نمائشوں، ریاستی سطح کے پروگراموں اور دیگر رسائی سرگرمیوں میں شرکت کرتا ہے تاکہ قبائلی برادریوں میں اپنی رعایتی قرض اسکیموں کے بارے میں معلومات فراہم کی جا سکیں۔ این ایس ٹی ایف ڈی سی قرض تجاویز کی کارروائی کے وقت کو نمایاں طور پر کم کرنے کے لیے ایک لون مینجمنٹ سسٹم بھی تیار کر رہا ہے۔

وزارت قبائلی امور اور این ایس ٹی ایف ڈی سی ایسی کوئی اسکیم نافذ نہیں کرتے جو خاص طور پر قرض حاصل کرنے کے لیے مالیاتی خواندگی اور مشاورت کے لیے مخصوص ہو۔ تاہم، رعایتی مالی معاونت کی دستیابی اور حکومتی معاونتی نظام کے بارے میں آگاہی مختلف رسائی سرگرمیوں، آگاہی پروگراموں، نمائشوں اور ریاستی سطح کے پروگراموں کے ذریعے فروغ دی جاتی ہے۔ اس کے علاوہ، مالی سال 2024–25 کے دوران این ایس ٹی ایف ڈی سی نے ریاست مہاراشٹر میں ایک خصوصی مہم شروع کی، جس کا مقصد قبائلی نوجوانوں، خواتین اور ابھرتے ہوئے کاروباری افراد کے درمیان کاروبار کے فروغ، مالیاتی خواندگی میں اضافہ اور مالی معاونت کی اسکیموں کے بارے میں آگاہی پیدا کرنا تھا۔

***********

ش ح۔ ف ش ع

 U: 4374

 

(ریلیز آئی ڈی: 2242044) وزیٹر کاؤنٹر : 11