مشن سکشم آنگن واڑی اور پوشن 2.0 کے تحت آنگن واڑی مراکز (اے ڈبلیو سی) میں بنیادی ڈھانچے کی سہولیات کو بہتر بنانے کے لیے مختلف اقدامات کیے گئے ہیں۔ پندرہویں مالیاتی کمیشن کے دور کے دوران 50,000 آنگن واڑی مراکز کی تعمیر منریگا کے ساتھ اشتراک میں کی جا رہی ہے، جس کے تحت ہر سال 10,000 آنگن واڑی مراکز تعمیر کیے جائیں گے۔ اس کے لیے منریگا کے تحت 8.00 لاکھ روپے، پندرہویں مالیاتی کمیشن (ایف سی) کے تحت 2.00 لاکھ روپے (یا کوئی دیگر غیر منسلک فنڈ) اور خواتین و بچوں کی ترقی کی وزارت (ایم ڈبلیو سی ڈی) کے ذریعے مرکز اور ریاستوں/مرکز کے زیر انتظام علاقوں کے درمیان مقررہ لاگت کے اشتراک کے تناسب کے مطابق 2.00 لاکھ روپے فراہم کیے جا رہے ہیں۔

مزید برآں، ریاستوں اور مرکز کے زیر انتظام علاقوں کو یہ بھی مشورہ دیا گیا ہے کہ وہ آنگن واڑی مراکز (اے ڈبلیو سی) کی عمارتوں کی تعمیر کے لیے مختلف اسکیموں جیسے ممبر پارلیمنٹ لوکل ایریا ڈیولپمنٹ اسکیم (ایم پی لیڈز)، رورل انفراسٹرکچر ڈیولپمنٹ فنڈ (آر آئی ڈی ایف)، پنچایتی راج اداروں کو فنانس کمیشن گرانٹس، اور اقلیتی امور کی وزارت کے ملٹی سیکٹرل ڈیولپمنٹ پروگرام (ایم ایس ڈی پی) وغیرہ سے بھی فنڈز حاصل کرتے رہیں۔

قبائلی آبادی کی ترقی کے لیے پی ایم جنمان اور دھرتی آبا جنجاتیہ گرام اتکرش ابھیان کے تحت، نیز شمالی سرحدی علاقوں پر توجہ مرکوز کرتے ہوئے وائبرینٹ ولیج پروگرام (وی وی پی) – فیز 1 کے تحت آنگن واڑی مراکز کی تعمیر کے لیے بھی مختلف اقدامات کیے گئے ہیں۔

اس کے علاوہ آنگن واڑی مراکز میں بنیادی ڈھانچے کی سہولیات کو بہتر بنانے کے لیے وزارت کی جانب سے متعدد اقدامات کیے گئے ہیں، جن میں آنگن واڑی مراکز میں پینے کے پانی اور بیت الخلاء کی سہولیات کے لیے فنڈز میں اضافہ شامل ہے۔ پینے کے پانی کے لیے رقم 10,000 روپے سے بڑھا کر 17,000 روپے اور بیت الخلاء کے لیے 12,000 روپے سے بڑھا کر 36,000 روپے کر دی گئی ہے۔

مشن پوشن 2.0 کے تحت پندرہویں مالیاتی کمیشن کے دور میں بہتر غذائیت کی فراہمی اور ابتدائی بچپن کی دیکھ بھال و تعلیم کے فروغ کے لیے سرکاری عمارتوں میں واقع دو لاکھ آنگن واڑی مراکز کو ہر سال 40,000 مراکز کی شرح سے سکشم آنگن واڑی کے طور پر مضبوط کیا جا رہا ہے۔ سکشم آنگن واڑی مراکز کو روایتی آنگن واڑی مراکز کے مقابلے میں بہتر بنیادی ڈھانچہ فراہم کیا جاتا ہے، جن میں ایل ای ڈی اسکرین، واٹر فلٹریشن سسٹم، پوشن واٹیکا، ابتدائی بچپن کی دیکھ بھال و تعلیم (ای سی سی ای) کا تعلیمی مواد اور بلڈنگ ایز لرننگ ایڈ (بالا) پینٹنگز شامل ہیں۔

مزید برآں، اسکولی تعلیم اور خواندگی کے محکمے کے ساتھ مل کر ابتدائی بچپن کی دیکھ بھال و تعلیم (ای سی سی ای) اور بنیادی خواندگی و عددی صلاحیت (ایف ایل این) کی خدمات کو مضبوط بنانے کے لیے سرکاری پرائمری اسکولوں کے اندر آنگن واڑی مراکز کو مربوط کرنے کے لیے وزارتِ تعلیم کے رہنما خطوط 3 ستمبر 2025 کو مشترکہ طور پر جاری کیے گئے۔ جہاں جسمانی طور پر ایک ہی جگہ قائم کرنا ممکن نہ ہو، وہاں آنگن واڑی مرکز کو قریبی پرائمری اسکول کے ساتھ منسلک (میپ) کیا جائے گا۔

(ب):۔مشن سکشم آنگن واڑی اور پوشن 2.0 ایک مرکزی اسپانسر شدہ اسکیم ہے۔ اس اسکیم کا نفاذ ریاستی حکومتوں اور مرکز کے زیر انتظام علاقوں کی انتظامیہ کے دائرۂ کار میں آتا ہے۔ آنگن واڑی مراکز کے کام کرنے والی ریاستوں اور مرکز کے زیر انتظام علاقوں کی تفصیلات اور اس میں رجسٹرڈ مستفیدین کی تعداد درج ذیل لنک پر دستیاب ہے:
https://www.poshantracker.in/statistics

(ج):۔ پوشن ٹریکر ایپلی کیشن کو ایک اہم گورننس ٹول کے طور پر متعارف کرایا گیا ہے، جو تمام آنگن واڑی مراکز (اے ڈبلیو سیز)، آنگن واڑی کارکنوں اور مستفیدین کی مختلف متعین اشاریوں کی بنیاد پر نگرانی اور ٹریکنگ کو ممکن بناتا ہے۔ بچوں میں اسٹنٹنگ، ویسٹنگ (بربادی) اور کم وزنی کے پھیلاؤ کی متحرک شناخت کے لیے پوشن ٹریکر کے تحت ٹیکنالوجی سے بھرپور فائدہ اٹھایا جا رہا ہے۔

اس کے ذریعے آنگن واڑی خدمات کے حوالے سے قریباً حقیقی وقت میں ڈیٹا جمع کرنے کی سہولت بھی فراہم کی گئی ہے، جیسے کہ آنگن واڑی مراکز کا کھلنا، بچوں کی روزانہ حاضری، ابتدائی بچپن کی دیکھ بھال و تعلیم (ای سی سی ای) کی سرگرمیاں، بچوں کی نشوونما کی نگرانی، گرم پکا ہوا کھانا (ایچ سی ایم) کی فراہمی، ٹیک ہوم راشن (ٹی ایچ آر) کی تقسیم، اور بچوں کی گروتھ میژرمنٹ وغیرہ۔

سروس کی فراہمی کے آخری مرحلے تک مؤثر نگرانی کے لیے خواتین و بچوں کی ترقی کی وزارت (ایم ڈبلیو سی ڈی) نے ٹیک ہوم راشن (ٹی ایچ آر) کی تقسیم کے لیے چہرے کی شناخت کا نظام (ایف آر ایس) تیار کیا ہے، تاکہ یہ یقینی بنایا جا سکے کہ فائدہ صرف پوشن ٹریکر میں رجسٹرڈ مستحق مستفید کو اس کی شناخت کی تصدیق کے بعد ہی فراہم کیا جائے۔

سکشم آنگن واڑی اور مشن پوشن 2.0 کے تحت تمام حاملہ خواتین، دودھ پلانے والی ماؤں اور نوعمر لڑکیوں کو ٹیک ہوم راشن (ٹی ایچ آر) کی بلا رکاوٹ فراہمی کو یقینی بنانے کے لیے پوشن ٹریکر میں ایک مخصوص ماڈیول متعارف کرایا گیا ہے۔ اگر کسی وجہ سے رجسٹرڈ مستفید (حاملہ خواتین، دودھ پلانے والی مائیں اور نوعمر لڑکیاں) ایف آر ایس کے ذریعے اپنا ٹی ایچ آر حاصل کرنے کے لیے آنگن واڑی مرکز جانے سے قاصر ہوں، تو وہ اپنی جانب سے کسی نامزد شخص کو ٹی ایچ آر حاصل کرنے کے لیے مقرر کر سکتی ہیں۔

نامزد شخص کو صرف ایک مرتبہ ای-کے وائی سی کے عمل سے گزرنا ہوگا، تاہم مستفید کی جانب سے ٹی ایچ آر حاصل کرنے کے لیے ہر مرتبہ چہرے کی شناخت (فیس میچنگ) کی تصدیق کی جائے گی۔ نامزد شخص کے شامل ہونے کے بعد بھی مستفید خود آنگن واڑی مرکز سے ٹی ایچ آر حاصل کر سکتی ہے، بشرطیکہ نامزد شخص نے اس سے پہلے وہ راشن وصول نہ کیا ہو۔

یہ معلومات خواتین و بچوں کی ترقی کی مرکزی وزیر محترمہ انپورنا دیوی نے آج لوک سبھا میں ایک سوال کے تحریری جواب میں فراہم کی۔

***

UR-4005

(ش ح۔اس ک  )

 

(ریلیز آئی ڈی: 2239925) وزیٹر کاؤنٹر : 13