تجارتی گاڑیوں کے ڈرائیوروں اور فلیٹ آپریٹروں کے لیے سفر کو آسان بنانے کے اقدام کے تحت انڈین ہائی وے مینجمنٹ کمپنی لمیٹڈ (آئی ایچ ایم سی ایل)، جو نیشنل ہائی وے اتھارٹی آف انڈیا (این ایچ اے آئی) کی جانب سے فروغ دی گئی ایک کمپنی ہے، نے نئی دہلی میں این ایچ اے آئی کے ہیڈکوارٹر میں تجارتی گاڑیوں کے ایگریگیٹر پلیٹ فارموں کے ساتھ ایک ایم او یو پر دستخط کیے۔ اس مفاہمت کا مقصد قومی شاہراہوں پر سفر کرنے والے تجارتی گاڑیوں کے ڈرائیوروں اور فلیٹ آپریٹروں کے لیے تحفظ، کارکردگی اور مجموعی صارف تجربے کو بہتر بنانے کے لیے باہم مربوط اور ٹیکنالوجی پر مبنی حل کو فروغ دینا ہے۔ یہ مفاہمتی یادداشت این ایچ اے آئی کے چیئرمین جناب سنتوش کمار یادو اور آئی ایچ ایم سی ایل کے چیئرمین و منیجنگ ڈائریکٹر جناب وشال چوہان کی موجودگی میں دستخط کی گئی۔ اس موقع پر این ایچ اے آئی اور آئی ایچ ایم سی ایل کے سینیئر افسران کے علاوہ پانچ ایگریگیٹر پلیٹ فارموں کے نمائندے بھی موجود تھے، جن میں وہیلز آئی ٹیکنالوجی انڈیا پرائیویٹ لمیٹڈ، بلیک بک لمیٹڈ، ٹرکس اپ سلوشنز پرائیویٹ لمیٹڈ، ٹرک سویدھا – سروودیا انفوٹیک پرائیویٹ لمیٹڈ اور سیفرن نیویگیٹرز پرائیویٹ لمیٹڈ شامل ہیں۔ اس موقع پر این ایچ اے آئی کے چیئرمین نے قومی شاہراہوں پر محفوظ اور ذمہ دارانہ ڈرائیونگ کے اصولوں پر عمل کرنے والے تجارتی ڈرائیوروں کو ”وششٹ سارتھی“ اعزاز سے بھی نوازا۔

اس تعاون کے تحت تجارتی گاڑیوں کے ایگریگیٹر پلیٹ فارمز ‘راج مارگ یاترا ایپ’ کو اپنے نظام میں شامل کریں گے تاکہ بروقت اور مؤثر حفاظتی معلومات فراہم کی جا سکیں۔ اس کے ذریعے ڈرائیوروں کو حقیقی وقت میں حفاظتی انتباہات مل سکیں گے، جن میں حادثات کے خدشے والے مقامات، متبادل راستے (ڈائیورژن)، تعمیراتی علاقے، آوارہ مویشیوں کی موجودگی اور خراب موسمی حالات سے متعلق معلومات شامل ہوں گی۔ ایگریگیٹر پلیٹ فارمز ‘راج مارگ یاترا ایپ’ پر صارفین کی رضاکارانہ رجسٹریشن کو بھی فروغ دیں گے اور وقتاً فوقتاً استعمال کے اعداد و شمار اور آراء بھی فراہم کریں گے۔

یہ اقدام ”جن بھاگیداری – ڈرائیور کی قیادت میں رپورٹنگ“ کو بھی فروغ دے گا، جس کے تحت شراکتی حکمرانی کے ذریعے ڈرائیوروں کی جانب سے رپورٹنگ کا نظام قائم کیا جائے گا۔ اس کے ذریعے قومی شاہراہوں سے متعلق مسائل جیسے گڑھے، خراب حفاظتی رکاوٹیں، خراب اسٹریٹ لائٹس، مدھم یا مٹ چکی سڑک کی نشاندہیاں اور دیگر غیر محفوظ سڑک کنارے حالات کو جیو ٹیگ کے ساتھ رپورٹ کیا جا سکے گا۔ ان رپورٹوں کو ’راج مارگ یاترا‘ نظام کے ساتھ مربوط کر کے مرکزی سطح پر حل کیا جائے گا۔

قومی شاہراہوں پر ہنگامی ردعمل کو مزید مؤثر بنانے کے لیے ایگریگیٹر پلیٹ فارم اپنے ایپ میں خصوصی ’کال 1033‘ فیچر بھی شامل کریں گے، جس کے ذریعے نیشنل ہائی وے ہیلپ لائن تک ایک کلک میں رسائی ممکن ہوگی۔ پلیٹ فارموں کے رضامند صارفین اپنی جغرافیائی لوکیشن بھی شیئر کر سکیں گے تاکہ فوری ردعمل کو ممکن بنایا جا سکے اور ایمبولینس روانگی کی صورتحال اور قریبی اسپتال کی معلومات بھی حاصل کی جا سکیں۔

اس ایم او یو میں قومی شاہراہوں سے متعلق حفاظتی آگاہی ویڈیو کی ترسیل کے ذریعے ذمہ دارانہ ڈرائیونگ کے رویوں کو فروغ دینے کا بھی تصور پیش کیا گیا ہے۔ اس میں اہم رویہ جاتی پہلوؤں کا احاطہ کیا جائے گا، جیسے حد سے زیادہ رفتار سے گریز، غلط سمت میں گاڑی چلانے کی روک تھام، لین ڈسپلن برقرار رکھنا، غیر محفوظ طریقے سے گاڑی روکنے یا ریورس کرنے سے بچنا اور ہنگامی حالات میں 1033 ہیلپ لائن کے بروقت استعمال کی حوصلہ افزائی کرنا۔ یہ پلیٹ فارم اس مواد کو اپنی ایپ کے اندر موجود انگیجمنٹ ماڈیول اور آگاہی مہمات کے ذریعے پھیلائیں گے، جبکہ وقتاً فوقتاً شرکت سے متعلق اعداد و شمار بھی فراہم کریں گے۔

اس کے علاوہ، تجارتی گاڑیوں کے ڈرائیوروں میں محفوظ اور ذمہ دارانہ ڈرائیونگ کے رجحان کو فروغ دینے کے لیے ”وششٹ سارتھی“ کے نام سے ایک اعزازی پہل بھی متعارف کرائی گئی ہے۔ اس پروگرام کے تحت ایگریگیٹر پلیٹ فارم ایسے ڈرائیوروں کی نشاندہی کریں گے جو قومی شاہراہوں کے حفاظتی اصولوں کی مثالی پابندی کا مظاہرہ کریں گے اور انہیں سرٹیفکیٹ اور ڈیجیٹل بیج کے ذریعے اعزاز سے نوازا جائے گا۔

شفافیت اور خدمات کے معیار کو مزید بہتر بنانے کے لیے ایگریگیٹر پلیٹ فارم تجارتی ڈرائیوروں سے ٹول پلازہ کے آپریشن کے بارے میں منظم فیڈبیک حاصل کریں گے، جس میں انتظار کا وقت، ٹول چارجنگ کی درستگی، لین کی کارکردگی، اور راستے میں موجود سہولیات سے متعلق امور جیسے صفائی کے معیار، قیمتوں میں شفافیت اور خدمات کے معیار شامل ہوں گے۔

یہ ایم او یو ایک اہم قدم ہے جس کے ذریعے ڈیجیٹل پلیٹ فارموں کو بروئے کار لاتے ہوئے تجارتی گاڑیوں کے ڈرائیوروں کی کمیونٹی کو قومی شاہراہوں کی سلامتی کو مضبوط بنانے، ہنگامی ردعمل کے نظام کو بہتر بنانے اور قومی شاہراہوں کے نیٹ ورک میں شفافیت اور خدمات کے معیار کو فروغ دینے میں فعال کردار ادا کرنے کا موقع فراہم کیا جائے گا۔

                                               **************

ش ح۔ ف ش ع

10-03-2026

                                                                                                                                       U: 3714

 

(ریلیز آئی ڈی: 2237843) وزیٹر کاؤنٹر : 7