عالمی یوم خواتین کے موقع پر ارضیاتی سائنسز کی وزارت نے آج اپنے افسران اور عملے کے لیے ایک خصوصی آگاہی سیشن کا انعقاد کیا۔ اس پروگرام میں خواتین کی صحت کے فروغ اور ذہنی فلاح و بہبود کے دو اہم موضوعات پر توجہ دی گئی، جس میں وزارت صحت و خاندانی بہبود کے محکمہ صحت تحقیق (ڈی ایچ آر) کے ماہرین نے پریزنٹیشن پیش کیں۔

عطائے اختیار اور احتیاطی صحت کی دیکھ بھال

ڈاکٹر چنچل گوئل، سائنس دان ایف، ڈی ایچ آر-آئی سی ایم آر سینٹر فار ایویڈنس بیسڈ گائیڈ لائنز نے ”خواتین کا عطائے اختیار، سائنس میں خواتین اور خواتین کی صحت سے متعلق آگاہی“ کے عنوان سے ایک پریزنٹیشن پیش کی۔ انہوں نے اس بات پر زور دیا کہ تعلیم اور مالی خودمختاری سماجی ترقی کی بنیادی بنیادیں ہیں۔ ڈاکٹر گوئل نے اہم احتیاطی صحت کے اقدامات کو بھی اجاگر کیا، خصوصاً ایچ پی وی ویکسینیشن اور سروائیکل کینسر کی روک تھام کے لیے باقاعدہ اسکریننگ (پاپ اسمئیر ٹیسٹ) کی اہمیت پر زور دیا اور کہا کہ صحت سے متعلق آگاہی حقیقی عطائے اختیار کا ایک اہم جزو ہے۔

ذہنی فلاح و بہبود کو ترجیح دینا

نفسیاتی صحت کے اس پہلو پر روشنی ڈالتے ہوئے جسے اکثر نظر انداز کر دیا جاتا ہے، سینٹر فار ایویڈنس بیسڈ گائیڈ لائنز (ڈی ایچ آر) سے وابستہ ڈاکٹر وکاس دھیکاو، نے “خواتین میں ذہنی صحت” کے موضوع پر ایک پریزنٹیشن پیش کی۔ ان کے سیشن میں زندگی کے مختلف مراحل میں خواتین کو درپیش منفرد حیاتیاتی اور سماجی دباؤ پر تفصیل سے روشنی ڈالی گئی۔ ڈاکٹر دھیکاو نے عملے پر زور دیا کہ وہ ذہنی صحت سے متعلق موجود سماجی بدنامی کو ختم کرنے کی کوشش کریں اور بروقت مداخلت، ذہنی دباؤ کے مؤثر انتظام اور مضبوط سماجی معاون نظام کو برقرار رکھنے کی اہمیت کو اجاگر کیا تاکہ متوازن اور نتیجہ خیز زندگی کو یقینی بنایا جا سکے۔

ادارہ جاتی عزم

یہ پروگرام وزارت کے اس مسلسل عزم کی عکاسی کرتا ہے کہ ایک جامع اور باہم شمولیت پر مبنی کام کا ماحول فروغ دیا جائے اور اپنے عملے کی ہمہ جہتی صحت و بہبود کی حمایت کی جائے۔ سائنسی مباحث کو صحت سے متعلق آگاہی کے ساتھ یکجا کر کے وزارت ارضیاتی سائنسز اپنی خواتین سائنس دانوں اور پیشہ ور افراد کو بااختیار بنا رہی ہے تاکہ وہ قومی ترقی میں مؤثر کردار ادا کر سکیں۔

اس پروگرام میں دیگر سینیئر افسران نے بھی شرکت کی، جن میں ڈاکٹر کملجیت رائے (سائنس دان جی)، جناب ونود کمار (ڈائریکٹر)، ڈاکٹر جگویر سنگھ (سائنس دان جی) اور ڈاکٹر پروین کمار (سائنس دان جی) شامل تھے۔

*********

ش ح۔ ف ش ع

                                                                                                                                       U: 3713

(ریلیز آئی ڈی: 2237818) وزیٹر کاؤنٹر : 10