وزارتِ سیاحت ملک بھر میں مہمان نوازی اور سیاحت کے شعبے میں قلیل مدتی تربیتی کورسز پیش کرتی ہے، جن کا مقصد ہنرمندی کی نشوونما، مہارتوں میں اضافہ (اَپ اسکلنگ) اور مرد و خواتین تربیت یافتگان، مقامی برادریوں اور قبائلی علاقوں کے افراد کی دوبارہ مہارت سازی (ری اسکلنگ) کو فروغ دینا ہے۔ یہ پروگرام "سروس پرووائیڈرز کے لیے صلاحیت سازی" اسکیم کے تحت چلایا جاتا ہے۔ اس اسکیم کو پورے ملک میں، بشمول راجستھان اور مہاراشٹر، سرکاری اداروں اور پینل میں شامل نجی اداروں کے ذریعے نافذ کیا جاتا ہے۔ ان اداروں میں انڈین انسٹی ٹیوٹ آف ہوٹل مینجمنٹ، فوڈ کرافٹ انسٹی ٹیوٹ اور انڈین کلینری انسٹی ٹیوٹ شامل ہیں۔

سیاحت کی وزارت نے 2025 میں کوالٹی کونسل آف انڈیا کے ذریعے اس اسکیم کا تیسرے فریق سے جائزہ کرایا۔ اس جائزے نے تصدیق کی کہ سی بی ایس پی اسکیم نے مالی سال 2020-21 سے 2024-25 کے دوران 1.68 لاکھ سے زائد افراد کو تربیت فراہم کرکے اور مختلف شعبوں میں 36,000 سے زیادہ افراد کو روزگار دلانے میں مدد دے کر ہندوستان کے سیاحت اور مہمان نوازی کے شعبے کو مضبوط بنانے میں اہم کردار ادا کیا ہے۔

سیاحت کی وزارت نے 2024 میں "پریاٹن مترا/پریاٹن دیدی" کے نام سے ایک قومی ذمہ دار سیاحت کا اقدام شروع کیا۔ اس اقدام کے تحت مقامی خدمات فراہم کرنے والوں جیسے کیب ڈرائیوروں، آٹو ڈرائیوروں، ریلوے اسٹیشن، ہوائی اڈوں اور بس اڈوں کے عملے، ہوٹلوں اور ریستورانوں کے عملے، ہوم اسٹے کے مالکان، ٹور گائیڈز، پولیس اہلکاروں، اسٹریٹ وینڈرز، دکانداروں، خواتین اور طلبہ وغیرہ کو تربیت دی جاتی ہے۔ یہ تربیت سیاحت کی اہمیت، عمومی صفائی و حفظانِ صحت، حفاظت، پائیدار ترقی اور سیاحوں کو اعلیٰ معیار کی مہمان نوازی اور دیکھ بھال فراہم کرنے پر مرکوز ہے۔ اس اقدام کے تحت تقریباً 4,382 امیدواروں کو تربیت دی جا چکی ہے۔

سی بی ایس پی اسکیم کے دائرہ کار کو مزید وسیع کرنے کے لیے نصاب میں توسیع اور ترمیم کی جا رہی ہے اور صنعت کی ضروریات کے مطابق مختلف سیاحتی مقامات کو شامل کیا جا رہا ہے، تاکہ مجموعی سیاحتی تجربے کو بہتر بنایا جا سکے اور مقامی برادریوں کی پائیدار ترقی کو یقینی بنایا جا سکے۔ گزشتہ تین برسوں کے دوران، مہاراشٹر اور راجستھان سمیت مختلف ریاستوں میں تربیت حاصل کرنے والے افراد کی فنڈنگ کے نمونے، منعقد کی گئی تربیت اور تعیناتیوں کی تفصیلات ضمیمہ میں منسلک ہیں۔

مزید برآں، مہمان نوازی کی خدمات میں اعلیٰ معیار کے پیشہ ور افراد تیار کرنے کے مقصد سے 21 سینٹرل انسٹی ٹیوٹ آف ہوٹل مینجمنٹ نے مہمان نوازی کے آٹھ سرکردہ گروپوں کے ساتھ مفاہمت کی یادداشتوں (ایم او یوز) پر دستخط کیے ہیں۔ ان گروپوں میں انڈین ہوٹلز کمپنی لمیٹڈ، آئی ایچ جی ہوٹلز اینڈ ریزورٹس، میریٹ ہوٹلز، للت ہوٹل گروپ، آئی ٹی سی گروپ آف ہوٹلز، لیمن ٹری ہوٹلز، اپیجے سریندر پارک ہوٹلز اور ریڈیسن ہوٹل گروپ شامل ہیں۔

یہ معلومات سیاحت اور ثقافت کے مرکزی وزیر جناب گجیندر سنگھ شیخاوت نے آج لوک سبھا میں ایک تحریری جواب میں دی۔

ضمیمہ

مالی سال 2023-24 سے مالی سال 2025-26 تک (28 فروری 2026 تک) سروس پرووائیڈرز کے لیے صلاحیت سازی (سی بی ایس پی) اسکیم کے تحت تربیت حاصل کرنے والے افراد کی تفصیلات۔

* عارضی

ماخذ: وزارت سیاحت

 

*****

UR-3599

(ش ح۔اس ک  )

 

(ریلیز آئی ڈی: 2237216) وزیٹر کاؤنٹر : 10