حکومتِ ہند پائیدار ترقی کے ہدف 6.1 کے مطابق، یعنی ’’2030 تک سب کے لیے محفوظ اور سستی پینے کے پانی تک عالمی اور مساوی رسائی‘‘ کو یقینی بنانے کے لیے ملک کے تمام دیہی گھرانوں کو مقررہ معیار کے مطابق مناسب مقدار میں محفوظ اور صاف پینے کا پانی نل کے کنکشن کے ذریعے باقاعدہ اور طویل مدتی بنیاد پر فراہم کرنے کے لیے پُرعزم ہے۔ اس مقصد کے تحت حکومتِ ہند اگست 2019 سے ریاستوں کے اشتراک سے جل جیون مشن (جے جے ایم) نافذ کر رہی ہے۔ پینے کے پانی کا معاملہ ریاستی دائرہ اختیار میں آتا ہے، اس لیے منصوبہ بندی، منظوری، نفاذ، آپریشن اور دیکھ بھال کی ذمہ داری، بشمول جل جیون مشن کے تحت چلنے والی اسکیموں کے، ریاستی حکومتوں اور مرکز کے زیر انتظام علاقوں کی حکومتوں پر عائد ہوتی ہے، جبکہ حکومتِ ہند تکنیکی اور مالی معاونت فراہم کر کے ریاستوں کی مدد کرتی ہے۔

جل جیون مشن کے آغاز کے بعد سے ملک میں دیہی گھرانوں تک نل کے پانی کی رسائی بڑھانے میں نمایاں پیش رفت ہوئی ہے۔ مشن کے آغاز کے وقت صرف 3.23 کروڑ (16.7 فیصد) دیہی گھرانوں کے پاس نل کے پانی کا کنکشن تھا۔ ریاستوں اور مرکز کے زیر انتظام علاقوں کی جانب سے 03 مارچ 2026 تک فراہم کردہ معلومات کے مطابق جل جیون مشن کے تحت اب تک 12.58 کروڑ سے زیادہ اضافی دیہی گھرانوں کو نل کے پانی کے کنکشن فراہم کیے جا چکے ہیں۔ اس طرح 03 مارچ 2026 تک ملک کے تقریباً 19.36 کروڑ دیہی گھرانوں میں سے تقریباً 15.82 کروڑ (81.71 فیصد) گھرانوں کو گھروں میں نل کے ذریعے پانی کی فراہمی حاصل ہو چکی ہے۔ مزید برآں مشن کے تحت دیہی علاقوں میں فراہم کیے گئے نل کے کنکشن کی ریاست، ضلع اور گاؤں کی سطح پر صورتحال عوامی ڈومین میں دستیاب ہے اور جل جیون مشن کے ڈیش بورڈ پر دیکھی جا سکتی ہے:
https://ejalshakti.gov.in/jjmreport/JJMIndia.aspx

جل جیون مشن کے اہداف کے حصول کے لیے معزز وزیر خزانہ نے اپنے بجٹ 26-2025 کی تقریر میں اس مشن کو 2028 تک توسیع دینے کا اعلان کیا ہے۔

مزید برآں جل جیون مشن کے تحت گھروں تک نل کے ذریعے پانی کی فراہمی کے منصوبے تیار کرتے وقت کیمیائی آلودگی سے متاثرہ بستیوں کو ترجیح دی جاتی ہے۔ ریاستوں اور مرکز کے زیر انتظام علاقوں کو ہدایت دی گئی ہے کہ پانی کے معیار سے متاثرہ گاؤں کے لیے متبادل محفوظ آبی ذرائع کی بنیاد پر پائپ لائن کے ذریعے پانی کی فراہمی کی اسکیمیں تیار اور نافذ کریں۔ اسی طرح آرسینک اور فلورائیڈ سے متاثرہ بستیوں میں پانی صاف کرنے کےکمیونٹی پلانٹس (سی ڈبلیو پی پیز) نصب کرنے کا بھی مشورہ دیا گیا ہے تاکہ پائپ لائن اسکیموں کے مکمل نفاذ تک ہر گھرانے کو پینے اور کھانا پکانے کے لیے فی کس روزانہ تقریباً 8 تا 10 لیٹر محفوظ پانی فراہم کیا جا سکے۔ ریاستوں کی جانب سے جل جیون مشن آئی ایم آئی ایس پر فراہم کردہ معلومات کے مطابق اس وقت ملک کے دیہی علاقوں کی تمام بستیوں کو کم از کم عارضی اقدامات کے ذریعے آرسینک اور فلورائیڈ سے پاک محفوظ پینے کا پانی فراہم کیا جا رہا ہے۔ پانی کے معیار سے متاثرہ بستیوں کی ضلع وار تفصیلات (03 مارچ 2026 تک) ضمیمے میں فراہم کی گئی ہیں۔

مزید برآں وزارتِ ہاؤسنگ و شہری امور نے اطلاع دی ہے کہ حکومتِ ہند مختلف اسکیموں اور مشنز کے ذریعے ریاستوں کو مالی اور تکنیکی معاونت فراہم کرتی ہے، جن میں اٹل مشن فار ریجووینیشن اینڈ اربن ٹرانسفارمیشن (امرت) اور امرت 2.0 شامل ہیں۔ اٹل مشن فار ریجووینیشن اینڈ اربن ٹرانسفارمیشن (امرت) کا آغاز 25 جون 2015 کو ملک کی تمام ریاستوں اور مرکز کے زیر انتظام علاقوں کے 500 شہروں (485 شہر بشمول 15 ضم شدہ شہر) کے لیے کیا گیا تھا۔ اس مشن کے اہم شعبوں میں پانی کی فراہمی، سیوریج اور سیپٹیج مینجمنٹ، بارش کے پانی کی نکاسی، سبز مقامات و پارکس اور غیر موٹرائزڈ شہری ٹرانسپورٹ شامل تھے۔ امرت کے تحت پانی کی فراہمی کے 1,403 منصوبے، جن کی مالیت 43,378.59 کروڑ روپے ہے، شروع کیے جا چکے ہیں۔

امرت 2.0 اسکیم کا آغاز سال 2021 میں تمام شہری بلدیاتی اداروں اور شہروں میں کیا گیا تاکہ شہر خود کفیل اور آبی تحفظ کے لحاظ سے مضبوط بن سکیں۔ امرت 2.0 کے تحت 500 امرت شہروں میں سیوریج اور سیپٹیج مینجمنٹ کی ہمہ گیر کوریج فراہم کرنا اہم ترجیحات میں شامل ہے۔ اب تک امرت 2.0 کے تحت پانی کی فراہمی کے 3,531 منصوبوں کو منظوری دی جا چکی ہے جن کی مجموعی لاگت 1,19,670.51 کروڑ روپے ہے۔

یہ معلومات آج راجیہ سبھا میں ایک سوال کے تحریری جواب میں جل شکتی کے وزیر مملکت جناب وی سومنا نے فراہم کیں۔

ضمیمہ

4 مارچ 2026 تک کے اعداد و شمار کے مطابق، ہندوستان کی مختلف ریاستوں میں پینے کے پانی کے معیار سے متاثرہ بستیوں کی صورتحال درج ذیل ہے:

 

معیار سے متاثرہ رہائش گاہوں کی ضلع وار تفصیلات (04.03.26 تک)

 

************

ش ح ۔   م  د ۔  م  ص

(U : 3591   )

(ریلیز آئی ڈی: 2237187) وزیٹر کاؤنٹر : 6