مرکزی وزیر برائے کیمیکلز و فرٹیلائزرز جناب جے پی نڈا اور وزیر مملکت برائے کیمیکلز و فرٹیلائزرز محترمہ انوپریا پٹیل نے بہترین کارکردگی دکھانے والے جن اوشدھی کیندر کے مالکان کو اعزازات پیش کیے

آج ملک بھر میں آٹھواں جن اوشدھی دیوس جوش و خروش کے ساتھ منایا گیا، جو جن اوشدھی سپتاہ 2026 کی ہفتہ بھر جاری تقریبات کا اختتام پر منایا گیا۔ یہ پروگرام فارماسیوٹیکلز اینڈ میڈیکل ڈیوائسز بیورو آف انڈیا (پی ایم بی آئی) نے محکمہ فارماسیوٹیکلز، وزارت کیمیکلز و فرٹیلائزرز کے تحت منعقد کیا۔

اس موقع کی یاد میں ملک کے 25 مقامات پر تقریبات کا اہتمام کیا گیا، جہاں پردھان منتری بھارتیہ جن اوشدھی کیندر (پی ایم بی جے کے) کے مالکان کو ان کی نمایاں کارکردگی اور پردھان منتری بھارتیہ جن اوشدھی پریوجنا (پی ایم بی جے پی) کے تحت سستی اور معیاری ادویات کے فروغ میں ان کی خدمات کے اعتراف میں اعزازات سے نوازا گیا۔

مرکزی وزیر برائے کیمیکلز و فرٹیلائزرز جناب جگت پرکاش نڈا نے نئی دہلی کے بھارت منڈپم میں منعقدہ تقریب میں بطور مہمانِ خصوصی شرکت کی۔ تقریب میں وزیر مملکت برائے کیمیکلز و فرٹیلائزرز محترمہ انوپریا پٹیل بطور مہمانِ اعزاز جبکہ محکمہ فارماسیوٹیکلز کے سکریٹری منوج جوشی بطور خصوصی مہمان موجود تھے۔ اس موقع پر اعلیٰ حکام، پی ایم بی آئی کے نمائندے، جن اوشدھی کیندر کے آپریٹرز اور اسکیم کے مستفید افراد بھی شریک ہوئے۔

اس موقع پر تمل ناڈو، مغربی بنگال اور دہلی سمیت ملک بھر کے 13 جن اوشدھی کیندروں کو اعزازات سے نوازا گیا۔ ان کیندروں کو فروخت میں نمایاں کارکردگی، مؤثر خدمات کی فراہمی اور شہریوں میں معیاری جینرک ادویات کے بارے میں بیداری پیدا کرنے کے لیے ان کی وابستگی کے اعتراف میں منتخب کیا گیا۔ اپنی مسلسل کوششوں کے ذریعے جن اوشدھی کیندر کمیونٹی سطح پر صحت خدمات تک رسائی کے اہم مراکز کے طور پر ابھرے ہیں، جہاں شہریوں کو معیاری جنرک ادویات نمایاں طور پر کم قیمت پر دستیاب ہو رہی ہیں۔

اس موقع پر خطاب کرتے ہوئے جناب جگت پرکاش نڈا نے کہا کہ پردھان منتری بھارتیہ جن اوشدھی پریوجنا نے ملک بھر کے شہریوں کے لیے صحت خدمات کو زیادہ سستا اور قابل رسائی بنانے میں انقلابی کردار ادا کیا ہے۔

مرکزی وزیر برائے کیمیکلز و فرٹیلائزرز جناب جگت پرکاش نڈا نے نئی دہلی کے بھارت منڈپم میں آٹھویں جن اوشدھی دیوس کی تقریب سے خطاب کیا

 

مرکزی وزیر جناب جگت پرکاش نڈا نے کہا کہ حکومت اس پروگرام کو مزید مضبوط بنانے کے لیے تین اہم شعبوں پر توجہ جاری رکھے گی۔ پہلا، ادویات کے معیار کے اعلیٰ ترین معیارات کو یقینی بنانا اور جینرک ادویات کے معیار کے بارے میں عوامی بیداری میں اضافہ کرنا تاکہ زیادہ سے زیادہ لوگ اعتماد کے ساتھ ان کا انتخاب کریں۔ دوسرا، ادویات کی باقاعدہ فراہمی اور تقسیم کو بہتر بنانا، جس کے لیے سپلائی چین کو مزید مضبوط بنانے کی مسلسل کوششیں کی جا رہی ہیں تاکہ ملک بھر کے تمام جن اوشدھی کیندروں پر ادویات بآسانی دستیاب رہیں۔ تیسرا، کیندر چلانے والے آپریٹرز کے لیے پائیدار منافع کو یقینی بنانا تاکہ ان مراکز کو چلانے والے کاروباری افراد کے لیے یہ اقدام مسلسل قابل عمل رہے۔

وزیر موصوف نے مزید کہا کہ جناب نریندر مودی کی قیادت میں جن اوشدھی پہل ایک تحریک اور عوامی مہم کی شکل اختیار کر چکی ہے اور حکومت عزمِ نو کے ساتھ اسے آگے بڑھانے کے لیے پُرعزم ہے۔ انہوں نے اس بات پر بھی زور دیا کہ جن اوشدھی کیندروں کے ذریعے خود روزگار کے وسیع مواقع پیدا ہو رہے ہیں، جو 2047 تک ترقی یافتہ ہندوستان کے وژن کو عملی شکل دینے میں معاون ثابت ہو رہے ہیں۔

حکومت کے قابل رسائی صحت خدمات کے عزم کا اعادہ کرتے ہوئے جناب نڈا نے کہا کہ جن اوشدھی پہل اس سمت میں ایک اہم قدم ہے تاکہ کوئی بھی شہری مالی مشکلات کے باعث ضروری ادویات سے محروم نہ رہے۔

خواتین کاروباری شخصیات جن اوشدھی پہل کی کامیابی میں اہم کردار ادا کر رہی ہیں

اس موقع پر خطاب کرتے ہوئے وزیر مملکت برائے کیمیکلز و فرٹیلائزرز محترمہ انوپریا پٹیل نے کہا کہ یہ اسکیم ملک بھر میں خواتین کاروباری شخصیات کو بااختیار بنانے میں اہم کردار ادا کر رہی ہے۔ انہوں نے کہا کہ جن اوشدھی پریوجنا نے نہ صرف سستی ادویات تک رسائی کو مضبوط کیا ہے بلکہ خواتین کے لیے روزگار اور معاشی مواقع بھی پیدا کیے ہیں۔

 

وزیرموصوف  نے بتایا کہ ملک میں قائم 18 ہزار سے زائد جن اوشدھی کیندروں میں سے 8 ہزار سے زیادہ کیندر خواتین چلا رہی ہیں، جو اس بات کی مثال ہے کہ اس اسکیم نے خواتین کو کامیاب کاروباری شخصیات بننے کے قابل بنایا ہے۔

ہفتہ بھر جاری جن اوشدھی سپتاہ میں عوام کی زبردست شرکت دیکھنے میں آئی۔

جن اوشدھی دیوس کی تقریب دراصل جن اوشدھی سپتاہ 2026 کے اختتام کی علامت تھی، جو یکم مارچ سے 7 مارچ 2026 تک ملک گیر بیداری مہم کے طور پر منعقد کی گئی۔ اس مہم کا مقصد سستی اور معیاری جینرک ادویات کے بارے میں عوام میں آگاہی پیدا کرنا تھا۔

ہفتے بھر ملک کے مختلف حصوں میں متعدد سرگرمیوں کا انعقاد کیا گیا تاکہ شہریوں کو اس مہم سے جوڑا جا سکے اور انہیں جینرک ادویات کے استعمال کی ترغیب دی جا سکے۔ یکم سے 5 مارچ کے درمیان ملک بھر میں 250 سے زیادہ صحت جانچ کیمپ منعقد کیے گئے، جہاں شہریوں کو مفت طبی مشورے، تشخیصی خدمات اور جن اوشدھی ادویات فراہم کی گئیں۔

چھٹے دن ملک کے 30 سے زیادہ مقامات پر پدیاترا کا انعقاد کیا گیا، جس میں طلبہ، صحت کے شعبے سے وابستہ افراد، جن اوشدھی کیندر کے آپریٹرز اور کمیونٹی کے ارکان نے اہم عوامی مقامات پر پیدل مارچ کیا اور سستی جینرک ادویات کے بارے میں بیداری پھیلائی۔

ان سرگرمیوں کے نتیجے میں عوام کی بڑے پیمانے پر شرکت اور بیداری پیدا ہوئی، جو ملک گیر سطح پر جن اوشدھی دیوس کی تقریبات تک جاری رہی۔

کاروباری مواقع اور عوامی شمولیت کی حوصلہ افزائی

ادویات تک رسائی کو بہتر بنانے کے ساتھ ساتھ جن اوشدھی پہل کاروبار اور روزگار کے مواقع کو بھی فروغ دیتی ہے۔ فارماسسٹ، ڈاکٹر، کاروباری افراد اور دیگر اہل افراد جو پردھان منتری بھارتیہ جن اوشدھی کیندر قائم کرنا چاہتے ہیں، وہ سرکاری ویب سائٹ www.janaushadhi.gov.in کے ذریعے درخواست دے سکتے ہیں۔ اس اسکیم کے تحت کاروباری افراد کو کیندر قائم کرنے کے لیے مالی معاونت اور مراعات بھی فراہم کی جاتی ہیں تاکہ وہ قومی صحت مشن میں اپنا کردار ادا کر سکیں۔

سستی ادویات تک ڈیجیٹل رسائی

شہری ‘جن اوشدھی سُگم’ موبائل ایپ کے ذریعے بھی جن اوشدھی کیندروں اور ادویات کے بارے میں معلومات حاصل کر سکتے ہیں۔ یہ ایپ صارفین کو قریب ترین کیندر تلاش کرنے اور دستیاب ادویات کے بارے میں معلومات فراہم کرنے میں مدد دیتی ہے۔ یہ موبائل ایپ ایک اہم ڈیجیٹل پلیٹ فارم بن چکی ہے جو شہریوں کو سستی ادویات اور قریبی جن اوشدھی کیندروں کے بارے میں معلومات تک آسان رسائی فراہم کرتی ہے۔

****

ش ح ۔   م  د ۔  م  ص

(U :3511    )

(ریلیز آئی ڈی: 2236486) وزیٹر کاؤنٹر : 12